Odisha Janamata : ବିଧବା ବେଲ ମାଣ୍ଡିଆ ଯାଉ ବିକ୍ରି କରି ପରିବାର ଚଳାଉଛନ୍ତି ,ସରକାରୀ ସାହାଯ୍ୟ କେବେ?

ବିଧବା ବେଲ ମାଣ୍ଡିଆ ଯାଉ ବିକ୍ରି କରି ପରିବାର ଚଳାଉଛନ୍ତି ,ସରକାରୀ ସାହାଯ୍ୟ କେବେ?

08-Sep-2026

ମାଣ୍ଡିଆ ଯାଉ ବିକ୍ରି କରି ପରିବାର ଚଳାଉଛନ୍ତି ବିଧବା ବେଲ

ଓଡିଶା ଜନମତ ରାୟଗଡା ୦୯/୦୯,

କାମେଶ୍ୱର କରକରିଆ:------

ଦିନ ତମାମ ପରିଶ୍ରମ କରି ଯାହା ମିଳୁଛି, ସେଥିରେ ପରିବାରର ଭରଣପୋଷଣ କରୁଛନ୍ତି ୬୦ ବର୍ଷୀୟ ବିଧବା ବେଲ ହିଆଲ। ସ୍ୱାମୀଙ୍କୁ ହରାଇବା ପରେ ପରିବାରର ଦାୟିତ୍ୱ ଏବେ ତାଙ୍କ କାନ୍ଧରେ। ମାଣ୍ଡିଆରୁ ପ୍ରସ୍ତୁତ ମାଣ୍ଡିଆ ଯାଉ ବିକ୍ରି କରି ସେ ନିଜର ଜୀବନ ଓ ପରିବାରକୁ ଆଗେଇ ନେଉଛନ୍ତି।
ବେଲ ପ୍ରାୟ ୭ ବର୍ଷ ହେଲା ମାଝୀଗୁଡା ହାଟରେ ମାଣ୍ଡିଆ ଯାଉ ବିକ୍ରି କରୁଛନ୍ତି। ହାଟକୁ ଆସୁଥିବା ଲୋକଙ୍କୁ ନିଜ ହାତରେ ପ୍ରସ୍ତୁତ ମାଣ୍ଡିଆ ଯାଉ ଖାଇବାକୁ ଦେଇ ସେଥିରୁ ମିଳୁଥିବା ଅର୍ଥରେ ପରିବାର ଚଳାଉଛନ୍ତି। ପୂର୍ବରୁ ଗୋଟିଏ ଗ୍ଲାସ ମାଣ୍ଡିଆ ଯାଉ ୧୦ ଟଙ୍କାରେ ବିକ୍ରି କରୁଥିବା ବେଳେ ବର୍ତ୍ତମାନ ୨୦ ଟଙ୍କାରେ ବିକ୍ରି କରୁଛନ୍ତି। ଗୋଟିଏ ହାଣ୍ଡି ଭଲ ଭାବେ ବିକ୍ରି ହୋଇଗଲେ ଦିନକୁ ପ୍ରାୟ ୪୦୦ ରୁ ୫୦୦ ଟଙ୍କା ପର୍ଯ୍ୟନ୍ତ ଆୟ ହୋଇଥାଏ। ଏହି ସ୍ୱଳ୍ପ ଆୟରେ ସେ ନିଜ ସହ ଗୋଟିଏ ପୁଅ ଓ ଦୁଇ ଝିଅଙ୍କ ଭରଣପୋଷଣ କରୁଛନ୍ତି। ବୟସର ଅପରାହ୍ନରେ ମଧ୍ୟ ପରିବାର ପାଇଁ ବେଲ ଙ୍କ ଏହି ସଂଘର୍ଷ ଅନେକଙ୍କ ପାଇଁ ପ୍ରେରଣା ପାଲଟିଛି। ସରକାରୀ ସହାୟତା ସହ ତାଙ୍କ ଭଳି ମହିଳାଙ୍କୁ ଜୀବିକା ସୁଯୋଗ ଓ ଆର୍ଥିକ ସହାୟତା ମିଳିଲେ ପରିବାର ଚଳାଇବାରେ ଆହୁରି ସହାୟକ ହେବ ବୋଲି ସ୍ଥାନୀୟ ଲୋକେ କହିଛନ୍ତି। ଲୋକେ ଥଣ୍ଡା ପାନୀୟ ଜଳ ପିଇବା ବଦଳରେ ମାଣ୍ଡିଆ ପ୍ରସ୍ତୁତି ଯାଉ ପିଇ ଶାନ୍ତିପ୍ରାପ୍ତ ହେଉଥିବା ମଧ୍ୟ ପିଉଥିବା ଲୋକେ କହିଛନ୍ତି ଏ ସମ୍ପର୍କରେ ଗୋଷ୍ଠୀ ଉନ୍ନୟନ ଅଧିକାରୀ ମନୀଷା ଦାସଙ୍କୁ ଯୋଗାଯୋଗ କରିବାରୁ ସେ କହିଛନ୍ତି ବେଲ ହିଆଲଙ୍କ ଆଧାର କାର୍ଡ ଯାଞ୍ଚ କରାଯିବ। ଯାଞ୍ଚ ପରେ ସରକାରୀ ନିୟମ ଅନୁଯାୟୀ ସେ କେଉଁ କେଉଁ ସହାୟତା ପାଇବାକୁ ଯୋଗ୍ୟ ତାହା ଦେଖି ଆବଶ୍ୟକ ସହାୟତା ଯୋଗାଇ ଦିଆଯିବ।