Odisha Janamata : କାଲିମେଘି ପଞ୍ଚାୟତ ରେ ବିକାଶରେ ବାଧକ ସାଜିଛି ରାଜ ନୈତିକ ତିକ୍ତତା |

କାଲିମେଘି ପଞ୍ଚାୟତ ରେ ବିକାଶରେ ବାଧକ ସାଜିଛି ରାଜ ନୈତିକ ତିକ୍ତତା |

24-Oct-2026

କାଳିମେଘି ପଞ୍ଚାୟତରେ ବିକାଶରେ ବାଧକ ରାଜନୈତିକ ତିକ୍ତତା l
ହାଇକୋର୍ଟ ଯିବାପାଇଁ ସରପଞ୍ଚଙ୍କ ଚେତାବନୀ l

ଓଡିଶା ଜନମତ ବେଗୁନିଆପଡା :24/10/26 :

ଭଞ୍ଜ କିଶୋର ମହାରଣା l

ରାଜ୍ୟ ସରକାରଙ୍କ ବିଭିନ୍ନ ଉନ୍ନୟନ ମୂଳକ ଯୋଜନା ଓ ମୌଳିକ ସୁବିଧା ସୁଯୋଗ ସମସ୍ତ ଜନସାଧାରଣଙ୍କ ପାଇଁ ପ୍ରଯୁଜ୍ୟ l କିନ୍ତୁ ବେଳେବେଳେ ରାଜନୈତିକ ତିକ୍ତତା କାରଣରୁ ବଳି ପଡୁଛନ୍ତି ସାଧାରଣ ଜନତା l ସରକାରଙ୍କ ତରଫରୁ ପଞ୍ଚାୟତ ଗୁଡିକ ବିକାଶ ପାଇଁ କୋଟି କୋଟି ଟଙ୍କା ମଂଜୁର ହେଉଥିବା ବେଳେ ଦଳଗତ ସମସ୍ୟା ଯୋଗୁଁ କିଛି ସରପଞ୍ଚ ଅସହଯୋଗର ଶିକାର ହୋଇ ନିରୁପାୟ ହୋଇ ହାତବାନ୍ଧି ବସିଛନ୍ତି l ଇଛା ଥାଇ ମଧ୍ୟ କୌଣସି ଉନ୍ନୟନ ମୂଳକ କାର୍ଯ୍ୟ କରିବାରୁ ବଞ୍ଚିତ ହେଉଛନ୍ତି l ଏଭଳି ଏକ ଅଭିଯୋଗ ଆଣିଛନ୍ତି ବେଗୁନିଆପଡା ବ୍ଲକ ଅନ୍ତର୍ଗତ କାଳିମେଘି ପଞ୍ଚାୟତ ସରପଞ୍ଚ ଶ୍ରୀମତୀ ଅର୍ଚ୍ଚନା ତ୍ରିପାଠୀ l ଶନିବାର ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସେ ସମ୍ପୃକ୍ତ ପ୍ରଶାସନିକ ଅଧିକାରୀଙ୍କ କାର୍ଯ୍ୟଶୈଳୀକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିବା ସହ ଆବଶ୍ୟକ ପଡ଼ିଲେ ନ୍ୟାୟ ପାଇଁ ହାଇକୋର୍ଟର ଦ୍ୱାରସ୍ଥ ହେବେ ବୋଲି ଚେତାବନୀ ଦେଇଛନ୍ତି। ସରପଞ୍ଚଙ୍କ ଅଭିଯୋଗ ଅନୁଯାୟୀ, ପଞ୍ଚାୟତର ବିକାଶମୂଳକ କାର୍ଯ୍ୟ ଆଗକୁ ବଢ଼ାଇବାକୁ ଅଧିକାରୀ ମାନେ ସହଯୋଗ କରୁନାହାନ୍ତି। ପୂର୍ବରୁ କରାଯାଇଥିବା କାମର ବିଲ ପୈଠ ହେଉନଥିବା ବେଳେ ନୂଆ କାମ ମଧ୍ୟ ଦିଆଯାଉନାହିଁ। ଏପରିକି ବିଧାୟକଙ୍କ ଇଚ୍ଛା ନଥିବାରୁ ପଞ୍ଚାୟତକୁ ଯିବେ ନାହିଁ ବୋଲି ଯନ୍ତ୍ରୀ କହୁଥିବା ସେ ଅଭିଯୋଗ କରିଛନ୍ତି। ଶ୍ରୀମତୀ ତ୍ରିପାଠୀ କହିଛନ୍ତି, “ସରପଞ୍ଚ ଭାବେ ମୁଁ ନିର୍ଦଳୀୟ ଭାବେ ନିର୍ବାଚିତ ହୋଇଛି। ମୋର ଲକ୍ଷ୍ୟ ହେଉଛି ଲୋକଙ୍କ ସେବା ଓ ପଞ୍ଚାୟତର ବିକାଶ। କିନ୍ତୁ ଆମକୁ କାମ କରିବାକୁ ଦିଆଯାଉନାହିଁ। ବିଧାୟକ ଜନସାଧାରଣଙ୍କ ପାଇଁ କାମ କରିବେ ନା ଯନ୍ତ୍ରୀଙ୍କ ସହ ସଲାସୁତୁରା ରହିବେ, ତାହା ସ୍ପଷ୍ଟ ହେବା ଦରକାର।” ସେ ଆହୁରି ଅଭିଯୋଗ କରିଛନ୍ତି ଯେ, ଜିଲ୍ଲାପାଳଙ୍କୁ ଏ ସମ୍ପର୍କରେ ଜଣାଇବା ପରେ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ମିଳିଥିଲା। ହେଲେ ଏଯାଏଁ କୌଣସି ଆଖିଦୃଶିଆ ସୁଫଳ ମିଳିନାହିଁ। ଅନ୍ୟପଟେ, ଦୁଇ ବର୍ଷ ଧରି GPDP ଦାଖଲ କରିଥିଲେ ମଧ୍ୟ କାର୍ଯ୍ୟକ୍ଷେତ୍ରରେ ଆଶାନୁରୂପ ଉନ୍ନତି ହୋଇନଥିବାରୁ ଚଳିତ ବର୍ଷ ଏହା ଦାଖଲ କରିବାକୁ ସେ ଅନିଚ୍ଛା ପ୍ରକାଶ କରିଛନ୍ତି। “ପଞ୍ଚାୟତରେ କାମ ହେଉନାହିଁ, ତେବେ GPDP ଦାଖଲ କରି କ’ଣ ଲାଭ?” ବୋଲି ପ୍ରଶ୍ନ କରିବା ସହ ଦାୟିତ୍ୱରେ ଥିବା ଯନ୍ତ୍ରୀ ଓ ସହକାରୀ ଯନ୍ତ୍ରୀଙ୍କ ବିରୋଧରେ ଉପଯୁକ୍ତ ତଦନ୍ତ ଓ କାର୍ଯ୍ୟାନୁଷ୍ଠାନ ଦାବି କରିଛନ୍ତି ସରପଞ୍ଚ ଶ୍ରୀମତୀ ତ୍ରିପାଠୀ।