Odisha Janamata : ଉତ୍କଳ ସମ୍ମିଳନୀ ଖୋର୍ଦ୍ଧା ଜିଲ୍ଲା ଶାଖା ତରଫରୁ ଉତ୍କଳ ଦିବସ ପାଳିତ

ଉତ୍କଳ ସମ୍ମିଳନୀ ଖୋର୍ଦ୍ଧା ଜିଲ୍ଲା ଶାଖା ତରଫରୁ ଉତ୍କଳ ଦିବସ ପାଳିତ | |

01-Apr-2026

ଉତ୍କଳ ସମ୍ମିଳନୀ ଖୋର୍ଦ୍ଧା ଜିଲ୍ଲା ଶାଖା ତରଫରୁ ଉତ୍କଳ ଦିବସ ଉପଲକ୍ଷେ ଉତ୍କଳ ଗୌରବ ମଧୁସୂଦନ ଦାସ ଙ୍କ ପ୍ରତିମୂର୍ତ୍ତି ରେ ମାଲ୍ୟାର୍ପଣ

ଓଡିଶା ଜନମତ, ଖୋର୍ଦ୍ଧା, ଗୋପାଳ କୃଷ୍ଣ ପ୍ରଧାନ:--

ଉତ୍କଳ ସମ୍ମିଳନୀ ଖୋର୍ଦ୍ଧା ଜିଲ୍ଲା ଶାଖା ତରଫରୁ ଉତ୍କଳ ଦିବସ ମହାସମାରୋହରେ ପାଳନ ହୋଇଯାଇଛି। ଖୋର୍ଦ୍ଧା ସହରର ଗାୟତ୍ରୀ ମଣ୍ଡପ ଠାରେ ଅନୁଷ୍ଠିତ ସଭାରେ ଅଧିବକ୍ତା ଶିବ ସୁନ୍ଦର ପଟ୍ଟନାୟକ ସଭାପତିତ୍ୱ କରିଥିଲେ। ଓଡିଶାର ଜାତୀୟ ସଙ୍ଗୀତ ବନ୍ଦେ ଉତ୍କଳ ଜନନୀ ସମୂହ ଗାନ ପରେ କବି ଲକ୍ଷ୍ମୀଧର ବଡଜେନା ଦେଶାତ୍ମବୋଧକ କବିତା ଆବୃତ୍ତି କରିଥିଲେ। ଉତ୍କଳ ଦିବସ ପାଳନର ତାତ୍ପର୍ଯ୍ୟ ସଂପର୍କରେ ଆଲୋଚନା କରିଥିଲେ ଐତିହାସିକ ସତ୍ୟ ବାଦୀ ବଳିୟାରସିଂହ ।ଓଡିଆର ଅସ୍ମିତା, ଓଡିଆ ଭାଷା ରେ ରାଜ୍ୟ ଶାସନ,ନିମନ୍ତ୍ରଣ ପତ୍ର ଓଡିଆ ରେ ଲେଖିବାକୁ ଉଦାହରଣ ସହ ପରାମର୍ଶ ଦେଇଥିଲେ। ଅଧିବକ୍ତା ବିଜୟ କୁମାର ସାମନ୍ତସିଂହାର ଅଦାଲତରେ ଓଡିଆ ଭାଷା କାର୍ଯ୍ୟକାରିତାର ସପକ୍ଷରେ ନିଜ ବକ୍ତବ୍ଯ ରଖିଥିଲେ। ଶିକ୍ଷାବିତ୍ ଭୀମସେନ ପ୍ରଧାନ ଓଡିଆ ଭାଷାର ସମୃଦ୍ଧି ପାଇଁ ସମସ୍ତେ ଚେଷ୍ଟା କରିବାର ଆବଶ୍ୟକତା ସଂପର୍କରେ ଉଦବୋଧନ ଦେଇଥିଲେ। ଅବସରପ୍ରାପ୍ତ ପ୍ରଧାନ ଶିକ୍ଷୟତ୍ରୀ ଶାନ୍ତି ଲତା ବଳିୟାରସିଂହ ଦୋକାନ ମାନଙ୍କରେ ଓଡିଆ ରେ ନାମଫଳକ ଲେଖା ଉପରେ ଗୁରୁତ୍ୱ ଦେଇଥିଲେ। ମୁଖ୍ୟବକ୍ତା ଭାବେ ଯୋଗଦେଇ ଉତ୍କଳ ସମ୍ମିଳନୀ କେନ୍ଦ୍ରୀୟ କମିଟି କୋଷାଧ୍ୟକ୍ଷ ଡ.ବିମଳ ଚନ୍ଦ୍ର ଷଡଙ୍ଗୀ ଉତ୍କଳ ସମ୍ମିଳନୀ ର ବର୍ତ୍ତମାନ ର ସ୍ଥିତି ଓ ସମସ୍ୟା ସଂପର୍କରେ ଆଲୋକପାତ କରିଥିଲେ। ସାମ୍ବାଦିକ ସମରେନ୍ଦ୍ର ବଳିୟାରସିଂ ଉତ୍କଳ ସମ୍ମିଳନୀ ର ଆଭିମୁଖ୍ଯରେ ପରିବର୍ତ୍ତନ କରି ଅଧିକରୁ ଅଧିକ ଯୁବକ ଯୁବତୀ ମାନଙ୍କୁ ସାମିଲ୍ କରିବା ପାଇଁ ମତପୋଷଣ କରିଥିଲେ। ସମ୍ମାନୀତ ଅତିଥି ଭାବେ ଖୋର୍ଦ୍ଧା ଅଧିବକ୍ତା ସଂଘର ସାଧାରଣ ସଂପାଦକ ଲିଙ୍ଗରାଜ ସାହୁ ଉତ୍କଳ ସମ୍ମିଳନୀ ର କାର୍ଯ୍ୟଧାରା ର ଭୃୟସୀ ପ୍ରଶଂସା କରିଥିଲେ। ମୁଖ୍ୟ ଅତିଥି ଭାବେ ଯୋଗ ଦେଇ ଖୋର୍ଦ୍ଧା ଅଧିବକ୍ତା ସଂଘର ସଭାପତି ଲୋତକବିନ୍ଦୁ ପଟ୍ଟନାୟକ ଅଦାଲତରେ ପ୍ରାୟ କାର୍ଯ୍ୟ ଓଡିଆ ଭାଷାରେ ହେଉଥିବା ପ୍ରକାଶ କରିଛନ୍ତି। ବିଚାରାଳୟ ମାନଙ୍କ ରେ ବିଚାରପତି ମାନେ ଏବାବଦରେ ସହଯୋଗ କରୁଥିବା ସୂଚନା ଦେଇଛନ୍ତି। ସଭାପତି ଶିବ ସୁନ୍ଦର ପଟ୍ଟନାୟକ ନବ ନିର୍ବାଚିତ ଖୋର୍ଦ୍ଧା ଅଧିବକ୍ତା ସଂଘର ସଭାପତି ଓ ସଂପାଦକ ଉଭୟଙ୍କୁ ସମ୍ବର୍ଦ୍ଧିତ କରିଥିଲେ। ଶେଷରେ ସଂପାଦକ ପ୍ରସନ୍ନ କୁମାର ପଟ୍ଟନାୟକ ଧନ୍ୟବାଦ ପ୍ରଦାନ କରିଥିଲେ। ଏହି ସଭାରେ ଅନ୍ୟ ମାନଙ୍କ ମଧ୍ୟରେ ଡ.ପ୍ରଫୁଲ୍ଲ କୁମାର ସାମନ୍ତରାୟ, ସୁବାସ ଚନ୍ଦ୍ର ସାମନ୍ତରାୟ, ବୀର ଦୁଃଶାସନ ପ୍ରଧାନ, ପ୍ରସନ୍ନ କୁମାର ମିଶ୍ର, କୃଷ୍ଣଚନ୍ଦ୍ର ହରିଚନ୍ଦନ, ମୃତ୍ୟୁଞ୍ଜୟ ଛୋଟରାୟ, ଇତିଶ୍ରୀ ସାହୁ ପ୍ରମୁଖ ଯୋଗ ଦେଇ ଥିଲେ ।