Odisha Janamata : ବିଶିଷ୍ଟ କଥାକାର ଶ୍ରୀ ଶାନ୍ତନୁ ଆଚାର୍ଯ୍ୟ ଙ୍କ 93ତମ ଜୟନ୍ତୀ ପାଳିତ |

ବିଶିଷ୍ଟ କଥାକାର ଶ୍ରୀ ଶାନ୍ତନୁ ଆଚାର୍ଯ୍ୟ ଙ୍କ 93ତମ ଜୟନ୍ତୀ ପାଳିତ |

15-May-2025

ବିଶିଷ୍ଟ କଥାକାର ଶ୍ରୀ ଶାନ୍ତନୁ ଆଚାର୍ଯ୍ୟଙ୍କ ୯୩ ତମ ଜୟନ୍ତୀ ପାଳନ

ଓଡିଶା ଜନମତ, ଖୋର୍ଦ୍ଧା, ଗୋପାଳକୃଷ୍ଣ ପ୍ରଧାନ, ତା-15/05/25:

ପ୍ରହରାଜ ପ୍ରତିଭା ପୂଜା ପରିଷଦ ତରଫରୁ ଆଜି କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ଓ ଅତିବଡ଼ି ସମ୍ମାନ ପ୍ରାପ୍ତ ବିଶିଷ୍ଟ ଔପନ୍ୟାସିକ, ଗାଳ୍ପିକ ଓ ବାଗ୍ମୀ ଶାନ୍ତନୁ କୁମାର ଆଚାର୍ଯ୍ୟଙ୍କ ୯୩ତମ ଜୟନ୍ତୀ ତାଙ୍କ ସହିଦ ନଗର ସ୍ଥିତ ବାସଭବନରେ ପାଳିତ ହୋଇଥିଲା। ଏହି ଉତ୍ସବରେ ଗୋପାଳ ସ୍ମୃତି ବିଦ୍ୟାପୀଠ ପୁରାତନ ଛାତ୍ର ସଂସଦର ସଭାପତି ତଥା ପରିବେଶବିତ୍ ଶ୍ରୀ ରଘୁନାଥ ପୃଷ୍ଟି ଶ୍ରୀ ଆଚାର୍ଯ୍ୟଙ୍କର ଶତାୟୁ କାମନା କରିବା ସହ ତାଙ୍କ ବାଗ୍ମୀତା ବିଷୟରେ ଉଚ୍ଚ ପ୍ରଶଂସା କରିଥିଲେ। ଆଷାଢ଼ ସାହିତ୍ୟ ପତ୍ରିକାର ସମ୍ପାଦକ ତଥା ବିଶିଷ୍ଟ କବି ଶ୍ରୀ ପୀତାମ୍ବର ମହାପାତ୍ରଙ୍କ ସାହିତ୍ୟ କୃତି ସମ୍ବନ୍ଧରେ ଆଲୋକପାତ କରିଥିଲେ। ଗୁଜରାଟରୁ ପ୍ରକାଶିତ ପ୍ରବାସୀ ଓଡିଆ ସାହିତ୍ୟ ପତ୍ରିକା ଉତ୍କଳିକାର ସମ୍ପାଦିକା ତଥା ଗାଳ୍ପିକା ଶ୍ରୀମତୀ ଲକ୍ଷ୍ମୀପ୍ରିୟା ଓଝା ଶ୍ରୀ ଆଚାର୍ଯ୍ୟଙ୍କ ଶିଶୁ ସାହିତ୍ୟ ଓ ଗଳ୍ପ ସମ୍ବନ୍ଧରେ ଆଲୋଚନା କରିଥିଲେ। ଶିଳ୍ପଦ୍ୟୋଗୀ ସମାଜସେବୀ ଶ୍ରୀ କରୁଣାକର ପ୍ରଧାନ ପୂଜ୍ୟପୂଜାର ମହନୀୟତା ସଂପର୍କରେ ମତବ୍ୟକ୍ତ କରିଥିଲେ। ପ୍ରହରାଜ ପ୍ରତିଭା ପୂଜା ପରିଷଦର ସାଧାରଣ ସମ୍ପାଦକ ତଥା କବି ଓ ନାଟ୍ୟକାର ଶ୍ରୀ ପୀୟୂଷ ରଞ୍ଜନ ପରିଡ଼ା ଶ୍ରୀ ଆଚାର୍ଯ୍ୟଙ୍କୁ ଉତ୍ତରୀୟ ଓ ପୂଷ୍ପଗୁଚ୍ଛ ପ୍ରଦାନ ଜନ୍ମ ଦିନର ଶୁଭେଚ୍ଛା ଜଣାଇବା ସହ ତାଙ୍କ ଲେଖନୀ ଓ ଲିଖନର ଦୀର୍ଘତା କାମନା କରିଥିଲେ। ଉକ୍ତ ଉତ୍ସବରେ ଶ୍ରୀ ଆଚାର୍ଯ୍ୟଙ୍କ ଧର୍ମ ପତ୍ନୀ ବିଶିଷ୍ଟ ସାହିତ୍ୟିକା ଶ୍ରୀମତୀ ନିରୁପମା ଆଚାର୍ଯ୍ୟ-ଓ ବହୁ କବି ଲେଖକ,ସମାଜସେବୀ ଉପସ୍ଥିତ ଥିଲେ।