Odisha Janamata : ଉଲ୍ଲାସ ମାଧ୍ୟମ ରେ ସାକ୍ଷରତା ଅଭିବୃଦ୍ଧି ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ |

ଉଲ୍ଲାସ ମାଧ୍ୟମ ରେ ସାକ୍ଷରତା ଅଭିବୃଦ୍ଧି ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ |

05-Sep-2026

ଖଲ୍ଲିକୋଟ : `ଉଲ୍ଲାସ` ମାଧ୍ୟମରେ ସାକ୍ଷରତା ଅଭିବୃଦ୍ଧି ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ

ନିରକ୍ଷରତା ଦୂର କରିବା ସହିତ ସର୍ବସାଧାରଣ ବ୍ଯକ୍ତି ବିଶେଷଙ୍କୁ ସାକ୍ଷର କରିବା ଭଳି ମହତ ଲକ୍ଷ୍ୟ ଆଭିମୁଖ୍ୟ ନେଇ ସ୍ଵଚ୍ଛତା ପକ୍ଷ ପାଳନ ଅବସରରେ ଖଲ୍ଲିକୋଟ ବ୍ଲକ ପରିସରସ୍ଥ ପଞ୍ଚାୟତ ସମିତି ସମ୍ମିଳନୀ କକ୍ଷରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି ।
ସରକାରଙ୍କ ପ୍ରାୟୋଜିତ `ଉଲ୍ଲାସ` କାର୍ଯ୍ୟକ୍ରମ ମାଧ୍ୟମରେ ସାକ୍ଷରତା ବୃଦ୍ଧି ନିମନ୍ତେ ଉକ୍ତ ବୈଠକ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀଙ୍କ ଅଧ୍ଯକ୍ଷତାରେ ଆୟୋଜିତ ହୋଇଯାଇଛି । ଅନୁଷ୍ଠିତ ବୈଠକରେ କ୍ଲଷ୍ଟର ଅଧୀନସ୍ଥ ସମସ୍ତ ବିଦ୍ୟାଳୟରେ କାର୍ଯ୍ୟରତ ସ୍ଵେଚ୍ଛାସେବୀ ଶିକ୍ଷକ ଶିକ୍ଷୟିତ୍ରୀ, ଆଞ୍ଚଳିକ ସାଧନ କେନ୍ଦ୍ର ସଂଯୋଜକ, ବହୁ ପ୍ରଧାନ ଶିକ୍ଷକ ଶିକ୍ଷୟିତ୍ରୀ, ସହକାରୀ ଶିକ୍ଷକ ଶିକ୍ଷୟିତ୍ରୀ ଯୋଗଦାନ କରିଥିଲା ବେଳେ ଖଲ୍ଲିକୋଟ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀ ତଥା ବିଶିଷ୍ଟ ଶିକ୍ଷାବିତ୍ ସତ୍ଯନାରାୟଣ ଦାସ ସ୍ୱତନ୍ତ୍ର ଅତିଥି ରୂପେ ଯୋଗ ଦେଇ ସର୍ବପ୍ରଥମେ ଗୁରୁ ଦିବସ ଉପଲକ୍ଷେ ଶିକ୍ଷକ ଶିକ୍ଷୟିତ୍ରୀମାନଙ୍କୁ ଶୁଭେଚ୍ଛା ଶୁଭକାମନା ଜଣାଇଥିଲେ ।
ଏଥି ସହିତ ନିରକ୍ଷରତା ଏକ ସାମାଜିକ ବ୍ୟାଧି ହୋଇଥିବାରୁ ତାହାର ନିରାକରଣ, ଗାଁ ଗହଳରେ ଅଶିକ୍ଷା ଅନ୍ଧକାର ଭିତରେ ଥିବା ଲୋକ ମାନଙ୍କୁ କିଭଳି ମୁଖ୍ୟ ସ୍ରୋତରେ ସାମିଲ କରିବା, ନିରକ୍ଷର ଚିହ୍ନଟୀକରଣ, ଶିକ୍ଷକ, ସ୍ଵୟମ ସହାୟକ ଗୋଷ୍ଠୀର ସଦସ୍ଯା, ଅଙ୍ଗନବାଡି କର୍ମୀ, ସର୍ବେକ୍ଷକଙ୍କ ସମ୍ପୃକ୍ତି ସହଯୋଗ ନିତାନ୍ତ ଆବଶ୍ୟକ ବୋଲି ମତବ୍ୟକ୍ତ କରିଥିଲେ । ଖଲ୍ଲିକୋଟ ଗୋଷ୍ଠୀ ଉନ୍ନୟନ ଅଧିକାରୀ ଦେବାଶିଷ ସାମଲ ମୁଖ୍ୟ ଅତିଥି ଭାବେ ଉପସ୍ଥିତ ରହି ସାକ୍ଷରତା ହାର ବଢାଇବା ଦିଗରେ ଶିକ୍ଷକଙ୍କ ଭୂମିକା, କର୍ମଶାଳା, ଶୋଭାଯାତ୍ରା ଆଦି ପ୍ରତ୍ଯେକ କ୍ଷେତ୍ରରେ ଶିକ୍ଷକଙ୍କ ତ୍ଯାଗ ଅବଦାନ ଅବିସ୍ମରଣୀୟ ବୋଲି ମତ ସାବ୍ୟସ୍ତ କରିଥିଲେ । ସମନ୍ଵିତ ଶିଶୁ ବିକାଶ ଅଧିକାରିଣୀ ମଧୁମିତା ପରିଜା ଅନ୍ଯତମ ଅତିଥି ଭାବେ ଯୋଗଦେଇ `ଉଲ୍ଲାସ` କାର୍ଯ୍ୟକ୍ରମର ସଫଳତା କାମନା କରିଥିଲେ । ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ସୁଶାନ୍ତ କୁମାର ନାୟକ, ଗୋପପୁର ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରକାଶ ଚନ୍ଦ୍ର ବେହେରା ସମ୍ମାନୀତ ଅତିଥି ରୂପେ ଯୋଗଦାନ କରି ନବ ଭାରତ ସାକ୍ଷରତା ଅଭିଯାନ ସମ୍ପର୍କରେ ବୁଝାଇଥିଲେ । ଆଭାସ କ୍ଲଷ୍ଟରର ଆଂଚଳିକ ସାଧନ କେନ୍ଦ୍ର ସଂଯୋଜକ କୃଷ୍ଣଚନ୍ଦ୍ର ପରିଡା କାର୍ଯକ୍ରମର ସଂଯୋଜନା କରିଥିଲେ । ଆୟୋଜିତ ବୈଠକରେ ବ୍ଲକ ଅନ୍ତର୍ଗତ ସମସ୍ତ ଷୋହଳ ଗୋଟି କ୍ଲଷ୍ଟରର ସି ଆର ସି ସିଙ୍କ ସମେତ ବହୁ ଶିକ୍ଷାବିତ୍ ଯୋଗଦାନ କରିଥିଲେ ।

ରିପୋର୍ଟ:-
ଡକ୍ଟର ଦ୍ବାରିକାନାଥ ମହାରଣା
ଖଲ୍ଲିକୋଟ, ଗଂଜାମ