Odisha Janamata : ଆରବି ଆଇ 64ଟନ ସୁନା ବିଦେଶରୁ ଭାରତ କୁ ଫେରାଇ ଆଣିଲା |

ଆରବି ଆଇ 64ଟନ ସୁନା ବିଦେଶରୁ ଭାରତ କୁ ଫେରାଇ ଆଣିଲା |

03-Nov-2025

ଭାରତୀୟ ରିଜର୍ଭ ବେଙ୍କ ନେଲା ବଡ଼ ନିଷ୍ପତ୍ତି, ଭାରତକୁ ଅଣାଗଲା 64ଟନ ସୁନା,

ଓଡିଶା ଜନ ମତ ବ୍ୟୁରୋ,

ନିଜ ସମ୍ପତିକୁ ସୁରକ୍ଷିତ ରଖିବାପାଈଁ,ଏବଂଅର୍ଥନୈତିକ ବିକାଶ ନିମନ୍ତେ ଗତ ଛଅ ମାସ ମଧ୍ୟରେ ବିଦେଶରେ ଥିବା ୬୪,୦୦୦ କିଲୋଗ୍ରାମ ଅର୍ଥାତ ୬୪ ଟନ୍ ସୁନା ଭାରତକୁ ପ୍ରତ୍ୟାବର୍ତ୍ତନ କରିଛିଆରବି ଆଇ |
ଦେଶର ଅର୍ଥନୈତିକ ସୁରକ୍ଷାକୁ ସୁଦୃଢ଼ କରିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ ଏକ ଗୁରୁତ୍ଵପୂର୍ଣ୍ଣ ପଦକ୍ଷେପ ନେଇଛି । ବିଦେଶରେ ଥିବା ୬୪ ଟନ୍ ସୁନା ଭାରତ ପ୍ରତ୍ୟାବର୍ତ୍ତନ କରିଛି । ଏହାକୁ ଭାରତର ଅର୍ଥନୈତିକ ସ୍ବାଧୀନତା ଏବଂ ସମ୍ପଭିକୁ ସୁରକ୍ଷିତ ରଖିବା ପାଇଁ ଏକ ପ୍ରମୁଖ ପଦକ୍ଷେପ ବୋଲି କୁହାଯାଉଛି । ତେବେ ସାଧାରଣରେ ପ୍ରଶ୍ନ ଉଠୁଛି ବର୍ତ୍ତମାନ ବିଦେଶରୁ ସୁନା ଫେରାଇ ଆଣିବାର କାରଣ କ`ଣ ? ଏହି ପ୍ରଶ୍ନକୁ ଯଦି ଆଲୋକପାତ କରିବା ତେବେ ଭୂରାଜନୈତିକ ଉତ୍ତେଜନା ଏହାର ଏକ ପ୍ରମୁଖ କାରଣ ହୋଇପାରେ । ସାରା ବିଶ୍ବରେ ବଢୁମ୍ବା ଭୂରାଜନୈତିକ ଉତ୍ତେଜନା ଯୋଗୁଁ ଅନେକ ଦେଶ ପ୍ରତିବନ୍ଧକ ଭଳି ପରିସ୍ଥିତିର ସମ୍ମୁଖୂନ ହେଉଛନ୍ତି । ଟାରିଫ୍ ଯୁଦ୍ଧ ଭଳି ପରିସ୍ଥିତିରେ ନିଜ ଦେଶରେ ନିଜର ସୁନା ରହିବା ସବୁଠାରୁ ସୁରକ୍ଷିତ ବୋଲି ଆକଳନ କରାଯାଉଛି।
ଆରବିଆଇର ନିୟମ ଅନୁସାରେ ଘରୋଇ ଭଣ୍ଡାରରେ ସୁନା ସଂରକ୍ଷଣ କରିବା ଦ୍ବାରା ବିଶ୍ବ ସଙ୍କଟ କିମ୍ବା ବାଣିଜ୍ୟ କଟକଣା ପରିସ୍ଥିତିରେ ଦେଶରେ ଆର୍ଥିକ ଶକ୍ତି ବଜାୟ ରହିବ ଏବଂ କୌଣସି ଦେବାଳିଆ ପରିସ୍ଥିତିର ସାମ୍ନା କରିବାକୁ ପଡ଼ିବ ନାହିଁ । ଏହା ଏକପ୍ରକାର ଆର୍ଥିକ ସ୍ଵତନ୍ତ୍ରତା ଆଡ଼କୁ ପଦକ୍ଷେପ ଅର୍ଥାତ୍ ରିଜର୍ଭବ୍ୟାଙ୍କ କୌଣସି ଆର୍ଥିକ ସହାୟତା ବିନା ନିଜର ଆର୍ଥିକ ନିଷ୍ପତ୍ତି ନେଇପାରିବ । ରୁଷ, ଇରାନ ଏବଂ ଭେନେଜୁଏଲା ଭଳି ଦେଶ ଉପରେ ପାଶ୍ଚାତ୍ୟ ପ୍ରତିବନ୍ଧକ ଲଗାଇବା ପରେ ଭାରତ ଏଭଳି ବିପଦ ପରିସ୍ଥିତିର ସାମ୍ନା କରିବାକୁ ଚାହୁନାହିଁ । ଯେଉଁ କାରଣରୁ ବିଦେଶରୁ ସୁନା ଫେରାଇ ଆଣିବାକୁ ନିଷ୍ପତ୍ତି ନେଇଛି।
ଭାରତୀୟ ରିଜର୍ଭ ବ୍ୟାଙ୍କର ଏକ ରିପୋର୍ଟ ଅନୁଯାୟୀ, ସେପ୍ଟେମ୍ବର ୨୦୨୫ ଶେଷ ସୁଦ୍ଧା, RBI ପାଖରେ ମୋଟ ୮୮୦.୮ ଟନ୍ ସୁନା ଅଛି, ଯେଉଁଥୁରୁ ବର୍ଭମାନ ଭାରତରେ ୫୭୫.୮ ଟନ୍ ସୁନା ଗଚ୍ଛିତ ଅଛି । ଏହି ସମୟରେ ପ୍ରାୟ ୨୯୦.୩ ଟନ୍‌ ବ୍ୟାଙ୍କ ଅଫ୍ ଇଂଲଣ୍ଡ ଏବଂ ବ୍ୟାଙ୍କ ଫର ଇଣ୍ଟରନ୍ୟାସନାଲ୍ ସେଟେଲମେଣ୍ଟ, (BIS) ଭଳି ବିଦେଶୀ ସଂସ୍ଥା ପାଖରେ ଅଛି । ୩୧ ମାର୍ଚ୍ଚ, ୨୦୨୪ ସୁଦ୍ଧା ଏହି ସଂଖ୍ୟା ୮୨୨.୧୦ ଟନ୍‌ ଥିଲା ଏବଂ ଗୋଟିଏ ବର୍ଷରେ ସୁନାର ମାତ୍ରା ୫୭.୪୮ ଟନ୍ ବୃଦ୍ଧି ପାଇଛି । ତେବେ RBI ଏହି ବହୁମୂଲ୍ୟ ସୁନାକୁ ସୁରକ୍ଷିତ ସଂରକ୍ଷଣ କରିବା ପାଇଁ `ଗୋଲ୍ଡ ଭକ୍ଟ` ସୃଷ୍ଟି କରିଛି, ଯାହା ମୁମ୍ବାଇ ଏବଂ ନାଗପୁରରେ ଅଛି।
ମାର୍ଚ୍ଚ ୨୦୨୩ ରୁ ଏପର୍ଯ୍ୟନ୍ତ RBI ବିଦେଶରୁ ମୋଟ ୨୭୪ ଟନ୍ ସୁନା ଭାରତକୁ ଫେରାଇ ଆଣିଛି । ବିଶ୍ବସ୍ତରୀୟ ଅନିଶ୍ଚିତତା ଭିତରେ ରିଜର୍ଭ ବ୍ୟାଙ୍କ ସୁନା କିଣିବା ଏବଂ ଫେରାଇ ଆଣିବାର ଖବର ସହିତ ସୁନା ଚାହିଦା ବୃଦ୍ଧି ପାଇଛି । ଗତବର୍ଷ ମଧ୍ୟରେ ସୁନା ମୂଲ୍ୟ ୫୨% ବୃଦ୍ଧି ପାଇଛି । ଅକ୍ଟୋବର ୨୦ ତାରିଖରେ ସୁନା ମୂଲ୍ୟ ପ୍ରତି ଆଉନ୍ସ ୪,୩୮୧.୨୧ ଡଲାରର ସର୍ବକାଳୀନ ସର୍ବୋଚ୍ଚ ସ୍ତରରେ ପହଞ୍ଚିଥିଲା। ତେଣୁ ଭାରତ ନିଜ ଦେଶର ସୁନା କୁ ନିଜ ପାଖରେ ରଖିବାକୁ ନିଷ୍ପତି ନେଇ ବିଦେଶରୁ ସୁନା ଫେରାଇ ଆଣିଛି ||ଏହିଖାବର କୁ ବହୁ ଅର୍ଥ ନୈତିକ ବିଶେଷଜ୍ଞ ଓଅର୍ଥନୈତିକ ବ୍ୟକ୍ରି ଭୁୟସୀ ପ୍ରଶଂସା କରିଛନ୍ତି |