Odisha Janamata : ଖଲ୍ଲିକୋଟ ଡ଼ି ଆଇ ଇ ଟି ୟୁନିସେଫ ଶିକ୍ଷା ବିଶେଷଜ୍ଞ ଙ୍କ ଦୁଇ ଦିନିଆ ପରିଦର୍ଶନ |

ଖଲ୍ଲିକୋଟ ଡ଼ି ଆଇ ଇ ଟି ୟୁନିସେଫ ଶିକ୍ଷା ବିଶେଷଜ୍ଞ ଙ୍କ ଦୁଇ ଦିନିଆ ପରିଦର୍ଶନ |

10-Mar-2025

ଡି.ଆଇ.ଇ.ଟି., ଗଂଜାମ, ଖଲ୍ଲିକୋଟକୁ ୟୁନିସେଫ୍ ଶିକ୍ଷା ବିଶେଷଜ୍ଞଙ୍କ ଦୁଇଦିନିଆ ପରିଦର୍ଶନ

ଡି.ଆଇ.ଇ.ଟି. , ଗଂଜାମ ଅଧ୍ୟକ୍ଷଙ୍କ ଅଭିନବ କାର୍ଯ୍ୟଶୈଳୀକୁ ୟୁନିସେଫର ଭୁରି ଭୁରି ପ୍ରଶଂସା

ୟୁନିସେଫ୍, ନୂଆଦିଲ୍ଲୀର ଶିକ୍ଷା ବିଶେଷଜ୍ଞ ଡକ୍ଟର ରାମଚନ୍ଦ୍ର ରାଓ ବେଗୁର୍ ଏବଂ ୟୁନିସେଫ, ଓଡ଼ିଶାର ଶିକ୍ଷା ବିଶେଷଜ୍ଞ ଶ୍ରୀମତୀ ଲଳିତା ପଟ୍ଟନାୟକ ଗଂଜାମ ଜିଲ୍ଲାକୁ ଗତ ତା ୦୬/୦୩/୨୫ରିଖ , ତା୦୭/୦୩/୨୫ରିଖ ଦୁଇଦିନିଆ ଗସ୍ତରେ ଆସି ପ୍ରଥମ ଦିବସରେ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଗଂଜାମ, ଖଲ୍ଲିକୋଟ ପରିଦର୍ଶନ କରି ପ୍ରତିଷ୍ଠାନର ଅଧ୍ୟକ୍ଷ ତଥା ବିଶିଷ୍ଟ ଶିକ୍ଷାବିତ୍ ଡକ୍ଟର ସନ୍ତୋଷ କୁମାର ପରିଡ଼ାଙ୍କ ସହିତ ପ୍ରଶିକ୍ଷଣ ପ୍ରତିଷ୍ଠାନର ବିବିଧ କାର୍ଯ୍ୟକ୍ରମ ସମ୍ପର୍କରେ ଆଲୋଚନା କରିଥିଲେ । ପ୍ରତିଷ୍ଠାନର ଅଧ୍ୟକ୍ଷ ଡକ୍ଟର ପରିଡ଼ା ଶିକ୍ଷା ବିଶେଷଜ୍ଞ ଦୁହିଁଙ୍କୁ ଡି.ଆଇ.ଇ.ଟି.ର ଅଭିନବ କାର୍ଯ୍ୟଶୈଳୀ ବିଷୟରେ ବିଶଦ ଭାବେ ଉପସ୍ଥାପନ କରିଥିଲେ । ଏଥିସହିତ ବିଶେଷଜ୍ଞ ଦ୍ୱୟ ଡି.ଆଇ.ଇ.ଟି.ର ଗୁରୁ ଛାତ୍ରଛାତ୍ରୀଙ୍କ ସହିତ ଶିକ୍ଷଣ ବ୍ୟବସ୍ଥା, ସାଂପ୍ରତିକ ଶିକ୍ଷା ପ୍ରଣାଳୀ, ଉତ୍ତମ ବ୍ୟକ୍ତିତ୍ୱ ଗଠନ, ମୂଲ୍ୟବୋଧ ଭିତ୍ତିକ ଶିକ୍ଷା ଆଦି ବହୁବିଧ ଦିଗ ଉପରେ ସବିଶେଷ ଆଲୋଚନା କରିଥିଲେ । ପ୍ରତିଷ୍ଠାନ ଦ୍ୱାରା ପ୍ରସ୍ତୁତ ନିଉଜ୍ ଲେଟର ଯଥା "ଆଭିମୁଖ୍ୟ", "ଭିତ୍ତିଭୂମି" ସର୍ବୋପରି ବାର୍ଷିକ ରିପୋର୍ଟ କାର୍ଡ "ପଲ୍ସ" , ବିଜ୍ଞାନ ଭିତ୍ତିକ ପତ୍ରିକା "ଅନୁସନ୍ଧାନ" ଓ ବିଜ୍ଞାନ, ପ୍ରଯୁକ୍ତି ବିଦ୍ୟା ଆଧାରିତ ପ୍ରଶ୍ନାବଳୀ "ଜିଜ୍ଞାସାର ପଥ" ଏ ସମସ୍ତ ଶିକ୍ଷା ଉପଯୋଗୀ ସାମଗ୍ରୀ ଅବଲୋକନ କରି ପ୍ରତିଷ୍ଠାନର ଅଧ୍ୟକ୍ଷଙ୍କ ଏପ୍ରକାର ସ୍ୱତନ୍ତ୍ର କାର୍ଯ୍ୟ ଦକ୍ଷତାକୁ ଉଚ୍ଚ ପ୍ରଶଂସା କରିବା ସଂଗେ ସଂଗେ ଅତିଶୟ ଆନନ୍ଦ ପ୍ରକାଶ କରିଥିଲେ । ପ୍ରତିଷ୍ଠାନ ସ୍ଥିତ ବାଲ୍ ବାଟିକା ଶିକ୍ଷଣ ଗାରକୁ ପରିଦର୍ଶନ କରି ମୈ।ଳିକ ସାକ୍ଷରତା କାର୍ଯ୍ୟକୁ ଭୂୟସୀ ପ୍ରଶଂସା କରିଥିଲେ । ଏତଦବ୍ୟତୀତ ଗଂଜାମ ଜିଲ୍ଲାର ରଙ୍ଗେଇଲୁଣ୍ଡା ବ୍ଲକ ଅଧୀନସ୍ଥ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ, କନିଷି ମଧ୍ୟ ପରିଦର୍ଶନ କରି ଡି. ଆଇ. ଇ. ଟି., ଗଂଜାମ ଦ୍ୱାରା ସମଗ୍ର ଜିଲ୍ଲାରେ ପ୍ରତିବିମ୍ବିତ ବିଭିନ୍ନ କାର୍ଯ୍ୟଧାରା ଯଥା ମୈ।ଳିକ ସାକ୍ଷରତା, ଗୋଷ୍ଠୀ ସମ୍ପୃକ୍ତି, ଶିକ୍ଷକଙ୍କ ଶିକ୍ଷଣ ପ୍ରକ୍ରିୟା, ଆଞ୍ଚଳିକ ସମ୍ବଳର ବହୁଳ ବ୍ୟବହାର ଆଦି ଗଠନମୂଳକ କାର୍ଯ୍ୟକ୍ରମ ଦେଖି ଖୁସି ପ୍ରକାଶ ସହ ସାଧୁବାଦ ଜଣାଇଥିଲେ । ଦ୍ୱିତୀୟ ଦିବସରେ ବ୍ରହ୍ମପୁର ସ୍ଥିତ ଭି ଭି ଗିରି ଉଚ୍ଚ ବିଦ୍ୟାଳୟ ପରିଦର୍ଶନ କରି ଅନୁଷ୍ଠାନର ଆଇ ସି ଟି ଲ୍ୟାବ, ଇ-ଲାଇବ୍ରେରୀ କାର୍ଯ୍ୟକ୍ରମକୁ ପ୍ରଶସ୍ତି ପ୍ରଦାନ କରିଥିଲେ ‌। ଡି. ଆଇ. ଇ. ଟି. ର ସମସ୍ତ ଶିକ୍ଷକ ପ୍ରଶିକ୍ଷକ, କର୍ମଚାରୀ ଶିକ୍ଷା ବିଶେଷଜ୍ଞଙ୍କ ପରିଦର୍ଶନ କାର୍ଯ୍ୟକ୍ରମ ପରିଚାଳନାରେ ସମ୍ପୂର୍ଣ୍ଣ ସହଯୋଗ କରିଥିଲେ ।