Odisha Janamata : ହାଇଦ୍ରାବାଦ ର ରାଜେନ୍ଦ୍ର ନଗର ରେ ମିଲେଟ ମିଶନ ମେଳା 2025 ଆରମ୍ଭ |

ହାଇଦ୍ରାବାଦ ର ରାଜେନ୍ଦ୍ର ନଗର ରେ ମିଲେଟ ମିଶନ ମେଳା 2025 ଆରମ୍ଭ |

02-Mar-2025

ରାଷ୍ଟ୍ରୀୟ ମିଲେଟ କିସାନ ମେଳା ଓ ଶିଳ୍ପ ସମ୍ମିଳନୀ- ୨୦୨୫ ରେ ଓଡ଼ିଶାର ଚାଷୀଙ୍କ ଯୋଗଦାନ,

ଓଡିଶା ଜନମତ ବ୍ୟୁରୋ,

ହାଇଦ୍ରlବାଦ: ଆଇସିଏଆର-ଭାରତୀୟ ମିଲେଟ୍ ଗବେଷଣା ସଂସ୍ଥାନ, ରାଜେନ୍ଦ୍ରନଗର, ହାଇଦରାବାଦ ରେ ମାର୍ଚ୍ଚ ୩ ଏବଂ ୪, ୨୦୨୫ ତାରିଖରେ "ରାଷ୍ଟ୍ରୀୟ ମିଲେଟ କିସାନ ମେଳା ଓ ଶିଳ୍ପ ସମ୍ମିଳନୀ- ୨୦୨୫" ଅନୁଷ୍ଠିତ ହେବାକୁ ଯାଉଛି। ଏହି ଉତ୍ସବରେ ଓଡ଼ିଶାର ଅଗ୍ରଣୀ ଚାଷୀ ଯୋଗଦେବେ।
ଓଡିଶା ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ଆନୁକୂଳ୍ୟରେ ବୃହତ ଉଠା ଜଳ ସେଚନ ଅଂଚଳରେ ଫସଲ ବିବିଧିକରଣ ଯୋଜନା କାର୍ଯ୍ୟକାରୀ ହେଉଛି। ଖରିଫ ଋତୁରେ ଅଣ-ଧାନ ଫସଲ ଚାଷ ପ୍ରତି ଚାଷୀମାନଙ୍କ ଆକୃଷ୍ଟତା ବୃଦ୍ଧି କରିବା, ଆର୍ଥିକ ସହାୟତା ଯୋଗାଇବା, ତଥା ନୂତନ ଚାଷ କୌଶଳ ଓ ଦକ୍ଷତା ବୃଦ୍ଧି ନିମନ୍ତେ ଜିଲ୍ଲା ଏବଂ ରାଜ୍ୟସ୍ତରୀୟ ସମ୍ମିଳନୀ ଏବଂ ଭ୍ରମଣ ଯୋଜନା ଅନୁଷ୍ଠିତ ହେଉଛି।
ଏହି ରାଷ୍ଟ୍ରୀୟ ମିଳେଟ୍ ମେଳା ଓଡ଼ିଶା, ଆନ୍ଧ୍ରପ୍ରଦେଶ, ତେଲେଙ୍ଗାନା, କର୍ଣ୍ଣାଟକ ଇତ୍ୟାଦି ରାଜ୍ୟରୁ ପ୍ରାୟ ୧୫୦୦ ଚାଷୀଙ୍କୁ ଏକତ୍ର କରିବ। ଏହି ଉପଲକ୍ଷେ ମିଳେଟ୍ ଚାଷ, ବଜାର ସୁଯୋଗ, ଏବଂ ଆଧୁନିକ ଚାଷ ପଦ୍ଧତି ସମ୍ବନ୍ଧରେ ଚାଷୀମାନେ ନୂତନ ଜ୍ଞାନ ଅର୍ଜନ କରିପାରିବେ।
ଗଞ୍ଜାମ ଜିଲ୍ଲାର ଦିଗପହଣ୍ଡି ଓ କବିସୂର୍ଯ୍ୟନଗର ବ୍ଲକର ୨୫ ଜଣ ଅଗ୍ରଣୀ ଚାଷୀଙ୍କୁ ଏହି ମେଳା ଏବଂ ଗବେଷଣା ଯାତ୍ରାରେ ଯୋଗଦେବା ପାଇଁ ଚୟନ କରାଯାଇଛି। ଏହି ଯାତ୍ରା ମାର୍ଚ୍ଚ ୩ ଠାରୁ ମାର୍ଚ୍ଚ ୧୧, ୨୦୨୫ ଅବଧି ପର୍ଯ୍ୟନ୍ତ ହେବ। ଏହି ଅଭିଯାନ ମାଧ୍ୟମରେ ଓଡ଼ିଶା ଚାଷୀମାନେ ନୂତନ ଚାଷ ପଦ୍ଧତି ଏବଂ ମିଳେଟ୍ ଚାଷ ସମ୍ବନ୍ଧୀୟ ଅନୁଭବ ଅର୍ଜନ କରିପାରିବେ।
ଗଞ୍ଜାମ ଜିଲ୍ଲା ମୁଖ୍ୟ କୃଷି ଅଧିକାରୀଙ୍କ ତତ୍ୱାବଧାନରେ "ସ୍ୱେଚ୍ଛା ସେବି ଅନୁଷ୍ଠାନ ବିକାଶ, ବ୍ରହ୍ମପୁର" ଏହି ଚାଷୀମାନଙ୍କୁ ହାଇଦ୍ରlବାଦ ଗବେଷଣା ସଂସ୍ଥାନକୁ ପରିଭ୍ରମଣ କରିବା ପାଇଁ ବ୍ୟବସ୍ଥା କରିଛି।
ଏହି ରାଷ୍ଟ୍ରୀୟ ମିଳେଟ କିସାନ ମେଳା ଓ ଶିଳ୍ପ ସମ୍ମିଳନୀ ଚାଷୀମାନଙ୍କ ପାଇଁ ଏକ ମୂଲ୍ୟବାନ ଅବସର ହେବ, ଯାହା ତାଙ୍କର ଜ୍ଞାନ ବୃଦ୍ଧି କରି ଭବିଷ୍ୟତରେ ଚାଷର ଉନ୍ନତି କରିବ।