Odisha Janamata : ବାଇକ ଦୁର୍ଘଟଣା ଯୋଗୁଁ ଜଣେ ମୃତ ଓ ଜଣେ ଆହାତ |

ବାଇକ ଦୁର୍ଘଟଣା ଯୋଗୁଁ ଜଣେ ମୃତ ଓ ଜଣେ ଆହାତ |

02-Feb-2025

ବାଇକ୍ ଦୁର୍ଘଟଣାରେ ୧ ମୃତ, ୧ ଗୁରୁତର,

ଓଡିଶା ଜନମତ, ବୁଗୁଡା, ହରପ୍ରସାଦ ପାଢ଼ୀ,ତା ୦୨/୦୨/୨୫ :
ବୁଗୁଡ଼ା ଥାନା ଅଞ୍ଚଳ ଅନ୍ତର୍ଗତ କରଚୁଲି-ମତାଝରି ରାସ୍ତାରେ ଶନିବାର ବିଳମ୍ବିତ ରାତିରେ ଏକ ବାଇକ୍ ଦୁର୍ଘଟଣାରେ ଜଣେ ମୃତ୍ୟୁ ବରଣ କରିଥିବା ବେଳେ ଆଉ ଜଣେ ଗୁରୁତର ଅବସ୍ଥାରେ ବ୍ରହ୍ମପୁରକୁ ସ୍ଥାନାନ୍ତର ହୋଇଥିବା ଜଣାଯାଇଛି। ଉଭୟେ ବୁଗୁଡା ଥାନା ଅନ୍ତର୍ଗତ ତାକରଡା ଗ୍ରାମର ହୋଇଥିବା ବେଳେ ମୃତକ ଜଣକ ସାହେବ ନାୟକଙ୍କ ପୁଅ ଶିବ ନାୟକ(୨୯) ଓ ଗୁରୁତର ଜଣକ ହାଡୁବନ୍ଧୁ ନାୟକଙ୍କ ପୁଅ ଶିବରାମ ନାୟକ(୨୯) । ପ୍ରକାଶ ଯେ, ସୁରାଟ ଫେରନ୍ତା ଶିବ ଓ ଶିବରାମ ଉଭୟେ ଜଗନ୍ନାଥ ପ୍ରସାଦ ବ୍ଲକର ଆଜ୍ଞାପ୍ରସାଦ ଗ୍ରାମରୁ ଏକ ଜନ୍ମଦିନ ଭୋଜିରେ ଯୋଗ ଦେଇ ବିଳମ୍ବିତ ରାତିରେ ବାଇକ୍ ଯୋଗେ ଗାଁକୁ ଫେରୁଥିଲା ବେଳେ ବାଟରେ ରାସ୍ତାକଡସ୍ଥ ଏକ ବିଦ୍ଯୁତ୍ ଖୁଣ୍ଟ ସହ ଧକ୍କା ହୋଇଥିଲା । ଦୁର୍ଘଟଣା ପରେ ଉଭୟେ ରାସ୍ତାକଡରେ ଅଚେତ ଅବସ୍ଥାରେ ପଡିରହିଥିବା ବେଳେ ସେହି ରାସ୍ତାରେ ଆସୁଥିବା ଏକ ଯାତ୍ରୀବାହୀ ଗାଡିର ଲୋକେ ଏ ମର୍ମନ୍ତୁଦ ଦୃଶ୍ୟ ଦେଖି ଆମ୍ବୁଲାନ୍ସକୁ ଖବର ଦେଇଥିଲେ। ଆମ୍ବୁଲାନ୍ସ ଘଟଣା ସ୍ଥଳରୁ ଉଭୟଙ୍କୁ ଉଦ୍ଧାର କରି ବୁଗୁଡା ମେଡିକାଲକୁ ଆଣିଥିଲା । ସେଠାରେ ଡ଼ାକ୍ତର ଜଣଙ୍କୁ ମୃତ ଘୋଷଣା କରିବା ସହ ଅନ୍ୟ ଗୁରୁତର ଜଣଙ୍କୁ ପ୍ରାଥମିକ ଚିକିତ୍ସା ପରେ ବ୍ରହ୍ମପୁରକୁ ସ୍ଥାନାନ୍ତର କରିଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବାଇକଟିକୁ ଜବତ କରିଥିବା ବେଳେ ଶବକୁ ବ୍ଯବଛେଦ ପାଇଁ ପଠାଇ କେସ୍ ନଂ ୭୩/୨୫ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ଜଣାଯାଇଛି।