Odisha Janamata : ପୋଲସରା ଏ 1 - ଗ୍ରେଡ଼ ଆଶାଇ ଛାତ୍ର, ଛାତ୍ରୀ ଙ୍କ ଦୁଇ ଦିବସିୟ ଦକ୍ଷତା ବୃଦ୍ଧି କର୍ମଶାଳା ଅନୁଷ୍ଠିତ |

ପୋଲସରା ଏ 1 - ଗ୍ରେଡ଼ ଆଶାଇ ଛାତ୍ର, ଛାତ୍ରୀ ଙ୍କ ଦୁଇ ଦିବସିୟ ଦକ୍ଷତା ବୃଦ୍ଧି କର୍ମଶାଳା ଅନୁଷ୍ଠିତ |

14-Oct-2026

ପୋଲସରାରେ ଏ-୧ ଗ୍ରେଡ ଆଶାୟୀ ଛାତ୍ରଛାତ୍ରୀଙ୍କ ଦୁଇ ଦିବସୀୟ ଦକ୍ଷତା ବୃଦ୍ଧି କର୍ମଶାଳା।

ଓଡ଼ିଶା ଜନମତ,ପୋଲସରା,ସନ୍ତୋଷ କୁମାର ପଣ୍ଡା :---

ତା ୧୪-୧୦-୨୦୨୬:- ----

ପୋଲସରା ପୌରପରିଷଦ ସ୍ଥିତ ପିଏମଶ୍ରୀ ଗୋପବନ୍ଧୁ ଉଚ୍ଚ ବିଦ୍ୟାଳୟ ଏବଂ ଲିଙ୍ଗରାଜ ବାଳିକା ଉଚ୍ଚ ବିଦ୍ୟାଳୟରେ ଦୁଇ ଦିବସୀୟ ଏ-୧ ଗ୍ରେଡ ଆଶାୟୀ ଛାତ୍ରଛାତ୍ରୀଙ୍କ ଦକ୍ଷତା ବୃଦ୍ଧି କର୍ମଶାଳା ଅନୁଷ୍ଠିତ ହୋଇଯାଇଛି। ଗଞ୍ଜାମ ଜିଲ୍ଲା ଶିକ୍ଷାଧିକାରୀ ଅଜୟ କୁମାର ପାତ୍ରଙ୍କ ନିର୍ଦ୍ଦେଶ ପ୍ରକାରେ ପୋଲସରା ଗୋଷ୍ଠୀ ଶିକ୍ଷାଧିକାରୀ ରୁଦ୍ର ପ୍ରସାଦ ସାହୁଙ୍କ ମାର୍ଗଦର୍ଶନରେ ଆୟୋଜିତ କର୍ମଶାଳାରେ ପୌରପରିଷଦ ଏବଂ ବ୍ଲକର ୨୬ ଗୋଟି ଗ୍ରାମ ପଞ୍ଚାୟତ ସ୍ଥିତ ୩୩ ଗୋଟି ଉଚ୍ଚ ବିଦ୍ୟାଳୟରେ ୪୬ ଜଣ ଏ-୧ ଗ୍ରେଡ ଏବଂ ଏ-୨ ଗ୍ରେଡ ଆଶାୟୀ ଛାତ୍ରଛାତ୍ରୀମାନେ ଯୋଗଦେଇଥିଲେ। କାର୍ଯ୍ୟକ୍ରମର ନୋଡାଲ ପ୍ରଧାନ ଶିକ୍ଷକ ଉମାଶଙ୍କର ଦାସ ଯୋଗଦେଇ ଆଗାମୀ ମାଟ୍ରିକ ପରୀକ୍ଷାରେ‌ ସର୍ବୋଚ୍ଚ ମାର୍କ ରଖି ପାସ ହେବାକୁ ଉପସ୍ଥିତ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେବାସହ ସେମାନଙ୍କ ସଫଳତା ଶୁଭକାମନା କରିଥିଲେ। ପ୍ରଥମ ଦିବସ ୧୩ ତାରିଖ ମଙ୍ଗଳବାର ଦିନ ମାତୃଭାଷା ଓଡ଼ିଆ,ଗଣିତ,ଜ୍ୟାମେଟ୍ରି,ହିନ୍ଦୀ ଓ ସଂସ୍କୃତ ଭାଷା ଏବଂ ୧୪ ତାରିଖ ବୁଧବାର ଦିନ ଇ°ରାଜି, ଜୀବ ବିଜ୍ଞାନ, ପଦାର୍ଥ ବିଜ୍ଞାନ,ଇତିହାସ ଓ ଭୂଗୋଳ ବିଷୟଗୁଡ଼ିକ ଉପରେ ପ୍ରଶିକ୍ଷଣ ଦିଆଯାଇଥିଲା। ୧୦ ଗୋଟି ଉଚ୍ଚ ବିଦ୍ୟାଳୟର ଶିକ୍ଷକ ସୁଭ୍ରକାନ୍ତ ସାହୁ, ଜ୍ୟୋତିଲ୍ ନାୟକ,ହିତେଶ କୁମାର ସ୍ୱାଇଁ,ପ୍ରଭାକର ପୋଲାଇ, ବିକାଶ ରଂଜନ ବଳ , ମିଥୁନ ରାଉତ,ଡ. ଅମ୍ରେଶ ପଟ୍ଟନାୟକ, ଚନ୍ଦନ ନାୟକ, ସିଦ୍ଧେଶ୍ୱର ପତି ଓ ଶିକ୍ଷୟତ୍ରୀ ସୁଶ୍ରୀ ରେଶମାରାଣୀ ରଥ ପ୍ରମୁଖ ପ୍ରଶିକ୍ଷଣ ଦେଇଥିଲେ। ରାଜ୍ୟ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ୨୦୨୭ ମାଟ୍ରିକ ପରୀକ୍ଷା ଆଉମାତ୍ର ଚାରି ମାସ ରହିଥିବା ବେଳେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଏଭଳି କର୍ମଶାଳାର ଯଥେଷ୍ଟ ଗୁରୁତ୍ୱ ରହିଛି। ଯାହା ଫଳରେ ଛାତ୍ରଛାତ୍ରୀଙ୍କ ଦକ୍ଷତା ବୃଦ୍ଧି ସହିତ ମନୋବଳ ବୃଦ୍ଧି ଦିଗରେ ବେଶ୍ ସହାୟକ ହୋଇପାରିବ ବୋଲି ସଚେତନ ନାଗରିକ ଓ ବୃଦ୍ଧିଜୀବି ମହଲରେ ଆଲୋଚିତ ହେଉଛି। ଏଥିସହ ପ୍ରତିବର୍ଷ ବାଳକ ବାଳିକାମାନେ ମଧ୍ୟ ଅନୁଷ୍ଠିତ କର୍ମଶାଳାରେ ସ୍ଵତନ୍ତ୍ର ଜ୍ଞାନ ଆହରଣ କରିବାର ସୁଯୋଗ ମିଳିଥିବାରୁ ଆନନ୍ଦ ପ୍ରକାଶ କରିବାସହ ଆସନ୍ତା ବୋର୍ଡ ପରୀକ୍ଷାରେ ଭଲ ଅଧିକାରୁ ଅଧିକ ମାର୍କ ରଖି ପାସ ହେବାରେ ସହାୟକ ହେବ ବୋଲି କହିଛନ୍ତି। ଏହି କର୍ମଶାଳାରେ ବାଳିକା ବିଦ୍ୟାଳୟର ପ୍ରଧାନ ଶିକ୍ଷକ ସୂର୍ଯ୍ୟନାରାୟଣ ସାହୁ, ବରିଷ୍ଠ ଶିକ୍ଷକ ଅମୀୟ ପ୍ରସାଦ ସାହୁଙ୍କ ସମେତ ଅନ୍ୟ ଶିକ୍ଷକ ଓ ଶିକ୍ଷୟତ୍ରୀମାନେ ସହଯୋଗ କରିଥିଲେ। କର୍ମଶାଳା ପ୍ରାରମ୍ଭରେ ବିଦ୍ୟାଳୟ ପରିସର ସ୍ଥିତ ପଞ୍ଚ ମହାପୁରୁଷଙ୍କ ପ୍ରତିମୂର୍ତ୍ତିରେ ଭକ୍ତିପୁତ ଭାବେ ପୁଷ୍ପମାଲ୍ୟାର୍ପଣ ଏବଂ ପ୍ରଭୂଙ୍କ ଫଟୋ ସମ୍ମୁଖରେ ପ୍ରଦୀପ ପ୍ରଜ୍ୱଳନ ପୂର୍ବକ କାର୍ଯ୍ୟକ୍ରମର ଶୁଭାରମ୍ଭ କରାଯାଇଥିଲା।