Odisha Janamata : ବିପୁଳ ସୁନା ରୁପା ଜବତ ସହ ଦୁଇ ଜଣଙ୍କୁ ଅଟକରଖି ବଲାଙ୍ଗୀର ପୋଲିସ ର ଖରଯୋଡ଼ା ଗାଁରେଚଢ଼ାଉ ||

ବିପୁଳ ସୁନା ରୁପା ଜବତ ସହ ଦୁଇ ଜଣଙ୍କୁ ଅଟକରଖି ବଲାଙ୍ଗୀର ପୋଲିସ ର ଖରଯୋଡ଼ା ଗାଁରେଚଢ଼ାଉ ||

27-Aug-2026

ଖରଯୋଡ଼ା ଗାଁରେ ବଲାଙ୍ଗୀର ପୋଲିସର ଚଢ଼ାଉ : ବିପୁଳ ସୁନା-ରୁପା ଜବତ, ୨ ଅଟକ; ଅନେକ ଫେରାର

ଓଡିଶା ଜନମତ ରାୟଗଡା , ୨୭/୦୮,

କାମେଶ୍ୱର କରକରିଆ :-------

ବିଭିନ୍ନ ଜିଲ୍ଲାରେ ଗତ କିଛି ମାସ ଧରି ଘଟିଥିବା ଏକାଧିକ ଚୋରି ଘଟଣାର ତଦନ୍ତରେ ବଲାଙ୍ଗୀର ପୋଲିସକୁ ବଡ଼ ସଫଳତା ମିଳିଛି। ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତର ଖରଯୋଡ଼ା ଗାଁରେ ପୋଲିସ ଚଢ଼ାଉ କରି ବିପୁଳ ପରିମାଣର ସୁନା ଓ ରୁପା ସାମଗ୍ରୀ ଜବତ କରିଛି। ଏହି ଘଟଣାରେ ୨ ଜଣଙ୍କୁ ପୋଲିସ ଅଟକ ରଖି ପଚରାଉଚରା କରୁଥିବା ବେଳେ ଅନେକ ବ୍ୟକ୍ତି ଫେରାର ଥିବା ସୂଚନା ମିଳିଛି। ସୂଚନା ଅନୁସାରେ କାଶୀପୁର ବ୍ଲକ ଗଡ଼ିବାଲି ପଞ୍ଚାୟତ ଫଣସଗୁଡ଼ା ଗାଁର ହରିଶ୍ଚନ୍ଦ୍ର ନାଏକଙ୍କ ସମେତ କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତ ଖରଯୋଡ଼ା ଗାଁର କାର୍ତ୍ତିକ ବାଗଙ୍କ ପୁଅ ରାଜେଶ ବାଗ ଓ ସ୍ୱର୍ଗତ ଜଗତରାମ ନାଏକଙ୍କ ପୁଅ ବର୍ବିଳ ନାଏକଙ୍କ ଘରେ ପୋଲିସ ଚଢ଼ାଉ କରିଥିଲା। ଚଢ଼ାଉ ସମୟରେ ପୁଳା ପୁଳା ସୁନା ଓ ରୁପା ସାମଗ୍ରୀ ଉଦ୍ଧାର ହୋଇଥିବା ଦେଖିବାକୁ ମିଳିଛି। ବର୍ବିଳ ନାଏକଙ୍କ ଘର କାନ୍ଥ ଉପରେ ଥାକ ଥାକ କରି ରଖାଯାଇଥିବା ସୁନା ଓ ବାଇକ ଡ଼ିକି ଭିତରେ ରଖି ଗାଈଶାଲ ଭିତରେ ଫିଙ୍ଗିଥିବା ରୁପା ସାମଗ୍ରୀ ମଧ୍ୟ ପୋଲିସ ଜବତ କରିଥିବା ଦେଖିବାକୁ ମିଳିଛି।ପ୍ରାଥମିକ ସୂଚନା ଅନୁସାରେ ଜବତ ହୋଇଥିବା ସୁନା ଓ ରୁପାର ମୋଟ ଓଜନ ୫ କିଲୋରୁ ଅଧିକ ହୋଇପାରେ। ତେବେ ଜବତ ସାମଗ୍ରୀର ସଠିକ୍ ଓଜନ ଓ ମୂଲ୍ୟ ସମ୍ପର୍କରେ ପୋଲିସ ପକ୍ଷରୁ ଏପର୍ଯ୍ୟନ୍ତ ଆନୁଷ୍ଠାନିକ ସୂଚନା ଦିଆଯାଇନାହିଁ। ଗତ ପ୍ରାୟ ଦୁଇ ମାସ ମଧ୍ୟରେ ବଲାଙ୍ଗୀର ଜିଲ୍ଲାର ସିନ୍ଦେକେଲା ଦ୍ୱାରଶନି ମନ୍ଦିର ଓ ସୁନା ଦୋକାନରୁ ଚୋରି ସମେତ କଳାହାଣ୍ଡି ଜିଲ୍ଲାର ଲାଞ୍ଜିଗଡ଼, ରାୟଗଡ଼ା ଓ କଲ୍ୟାଣସିଂହପୁର ଅଞ୍ଚଳରେ ଘଟିଥିବା ବିଭିନ୍ନ ଚୋରି ଘଟଣା ନେଇ ମାମଲା ରୁଜୁ ହୋଇଥିଲା। ଉଦ୍ଧାର ହୋଇଥିବା ସୁନା ଓ ରୁପା ସାମଗ୍ରୀର ସମ୍ପର୍କ ଏହି ସମସ୍ତ ଚୋରି ମାମଲା ସହ ରହିଛି କି ନାହିଁ ସେନେଇ ମଧ୍ୟ ପୋଲିସ ତଦନ୍ତ ଚଳାଇଛି। ସେପଟେ ଚୋରି ଘଟଣାରେ ସଂପୃକ୍ତ ଅଭିଯୁକ୍ତମାନଙ୍କ ସୂଚନା ଆଧାରରେ ଜଣେ ଡ୍ରାଇଭରଙ୍କୁ ୧ ଲକ୍ଷ ୬୦ ହଜାର ଟଙ୍କା ଦିଆଯାଇଥିବା ନେଇ ମଧ୍ୟ ସୂଚନା ମିଳିଛି। ଉକ୍ତ ଟଙ୍କା କେଉଁ ଉଦ୍ଦେଶ୍ୟରେ ଓ କାହିଁକି ଦିଆଯାଇଥିଲା ସେନେଇ ମଧ୍ୟ ପୋଲିସ ତଦନ୍ତ କରୁଛି।
ବଲାଙ୍ଗୀର ଏସଡିପିଓ ଯଶୋବନ୍ତ ନାରାୟଣ ପ୍ରଧାନୀ ଓ ଆଇଆଇସି ଖଗପତି ବିଶ୍ୱାଳଙ୍କ ନେତୃତ୍ୱରେ ପୋଲିସ ଟିମ୍ ଏହି ଚଢ଼ାଉ କରିଥିଲେ। ଉଦ୍ଧାର ହୋଇଥିବା ସମସ୍ତ ସୁନା ଓ ରୁପା ସାମଗ୍ରୀକୁ ପୋଲିସ ଜବତ କରି ନେଇଥିବା ବେଳେ ୨ ଜଣ ଅଟକ ରହିଛନ୍ତି। ଅନ୍ୟପଟେ ଘଟଣାରେ ସଂପୃକ୍ତ ଥିବା ସନ୍ଦେହରେ ଅନେକ ବ୍ୟକ୍ତି ଫେରାର ଥିବାରୁ ସେମାନଙ୍କୁ ଧରିବା ପାଇଁ ପୋଲିସ ତଲାସି ଜୋରଦାର କରିଛି। ତେବେ ଜବତ ସୁନା ଓ ରୁପାର ସଠିକ୍ ଓଜନ, ମୂଲ୍ୟ, ଫେରାର ବ୍ୟକ୍ତିଙ୍କ ସଂଖ୍ୟା ଏବଂ କେଉଁ କେଉଁ ଚୋରି ମାମଲା ସହ ଏହାର ସମ୍ପର୍କ ରହିଛି, ପୋଲିସର ଆନୁଷ୍ଠାନିକ ସୂଚନା ପରେ ସମ୍ପୂର୍ଣ୍ଣ ଚିତ୍ର ସ୍ପଷ୍ଟ ହେବ।