Odisha Janamata : ଖୋର୍ଦ୍ଧା ଆଦର୍ଶ ଥାନା ପୋଲିସ ପକ୍ଷରୁ 32ଗ୍ରାମ ବ୍ରାଉନ ସୁଗାର, ସ୍କୁଟି, 12ମୋବାଇଲ ସହ 3 ଗିରଫ ||

ଖୋର୍ଦ୍ଧା ଆଦର୍ଶ ଥାନା ପୋଲିସ ପକ୍ଷରୁ 32ଗ୍ରାମ ବ୍ରାଉନ ସୁଗାର, ସ୍କୁଟି, 12ମୋବାଇଲ ସହ 3 ଗିରଫ ||

23-Sep-2026

ଖୋର୍ଦ୍ଧା ଆଦର୍ଶ ଥାନା ଅଞ୍ଚଳ ରେ ୩ ଗିରଫ, ୩୨ ଗ୍ରାମ ବ୍ରାଉନସୁଗାର ଜବତ
୩.୨୦ ଲକ୍ଷ ଟଙ୍କାର ନିଶାଦ୍ରବ୍ୟ ସହ ସ୍କୁଟି ଓ ୨ ମୋବାଇଲ ଫୋନ ଜବତ |

ଓଡିଶା ଜନ ମତ ଖୋର୍ଦ୍ଧା, ଗୋପାଳ କୃଷ୍ଣ ପ୍ରଧାନ:---

ଖୋର୍ଦ୍ଧ ଆଦର୍ଶ ଥାନା ପୋଲିସକୁ ମିଳିଛି ବଡ଼ ସଫଳତା। ବ୍ରାଉନସୁଗାର କାରବାର ଅଭିଯୋଗରେ ପୋଲିସ ୩ ଜଣଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ପ୍ରାୟ ୩୨ ଗ୍ରାମ ଓଜନର ବ୍ରାଉନସୁଗାର ଜବତ କରିଛି। ଜବତ ନିଶାଦ୍ରବ୍ୟର ଆନୁମାନିକ ମୂଲ୍ୟ ୩.୨୦ ଲକ୍ଷ ଟଙ୍କା ବୋଲି ଆଦର୍ଶ ପୋଲିସ ପକ୍ଷରୁ କୁହାଯାଇଛି। ଏଥିସହ ଏକ ୟାକୁଜା ଇଲେକ୍ଟ୍ରିକ୍ ସ୍କୁଟି ଓ ଦୁଇଟି ମୋବାଇଲ ଫୋନ ମଧ୍ୟ ଜବତ ହୋଇଛି।
ପୋଲିସ ସୂଚନା ଅନୁଯାୟୀ, ଗୁରୁଜଙ୍ଗ ନିକଟ ନୂଆ ଜାତୀୟ ରାଜପଥ ଅଞ୍ଚଳରେ କିଛି ଯୁବକ ବ୍ରାଉନସୁଗାର ଆଣି ଛୋଟ ଛୋଟ ପ୍ୟାକେଟ୍‌ରେ ବିଭକ୍ତ କରି ସ୍ଥାନୀୟ ଯୁବକମାନଙ୍କୁ ବିକ୍ରି କରିବା ପାଇଁ ଏକାଠି ହୋଇଥିବା ନେଇ ଖୋର୍ଦ୍ଧା ଆଦର୍ଶ ଥାନା ପୋଲିସକୁ ସୂଚନା ମିଳିଥିଲା। ଏହି ସୂଚନା ଆଧାରରେ ଖୋର୍ଦ୍ଧା ଏସ.ପି ପରମାର ସ୍ମିତ ପାର୍ଶୋତ୍ତମଦାସଙ୍କ ନିର୍ଦ୍ଦେଶ ଏବଂ ଏସ.ଡି.ପି.ଓ ପଙ୍କଜ କୁମାର ମାଝୀଙ୍କ ତତ୍ତ୍ୱାବଧାନରେ ଆଦର୍ଶ ଥାନା ଅଧିକାରୀ ରମେଶ କୁମାର ଦେବତା ଙ୍କ ଦ୍ୱାରା ପୋଲିସର ଏକ ସ୍ୱତନ୍ତ୍ର ଟିମ୍ ଉକ୍ତ ସ୍ଥାନରେ ଚଢ଼ଉ କରିଥିଲା।
ଚଢ଼ଉ ସମୟରେ ସରକାରୀ ସାକ୍ଷୀ ଓ ଜଣେ କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍‌ଙ୍କ ଉପସ୍ଥିତିରେ ଏକ ସ୍କୁଟିରେ ଏକାଠି ଯାଉଥିବା ୩ ଜଣଙ୍କୁ ପୋଲିସ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ ସେମାନଙ୍କ ମଧ୍ୟରୁ ନନ୍ଦ କିଶୋର ସାହୁ (୨୬)ଙ୍କ ନିକଟରୁ ୩୨ ଗ୍ରାମ ବ୍ରାଉନସୁଗାର ଜବତ ହୋଇଥିବା ପୋଲିସ କହିଛି।ଗିରଫ ଅଭିଯୁକ୍ତମାନେ ହେଲେ ଗୁରୁଜଙ୍ଗ ଗ୍ରାମ ଅନ୍ତର୍ଗତ କୋଚିଲାକଣାସାହିର ନନ୍ଦ କିଶୋର ସାହୁ , ଗୁରୁଜଙ୍ଗ ଭୋଇସାହିର ଶଙ୍କର ଭୋଇ (୨୬) ଏବଂ ଗୁରୁଜଙ୍ଗ ହାଉସିଂ ବୋର୍ଡ଼ କଲୋନୀର ଶାନ୍ତନୁ ମିଶ୍ର (୨୩)। ତିନିଜଣ ଯାକ ଆଦର୍ଶ ଥାନା ଅଧୀନ ଅଞ୍ଚଳର ବାସିନ୍ଦା ବୋଲି ପୁଲିସ ପକ୍ଷରୁ କୁହାଯାଇଛି।ବ୍ରାଉନସୁଗାର ସହ ପୋଲିସ ଏକ ନମ୍ବରବିହୀନ ୟାକୁଜା ଇଲେକ୍ଟ୍ରିକ୍ ସ୍କୁଟି ଏବଂ ଦୁଇଟି ମୋବାଇଲ ଫୋନ ଜବତ କରିଛି। ଏହି ଘଟଣାକୁ ନେଇ ଆଦର୍ଶ ଥାନାରେ କେସ୍‌ ନମ୍ବର ୫୭୯/୨୦୨୬ ରୁଜୁ କରାଯାଇ ଏନ.ଡି.ପି.ଏସ୍ ଆଇନର ଧାରା ୨୧(ବି) ଓ ୨୯ ଅନୁଯାୟୀ ମାମଲା ରୁଜୁ ହୋଇଛି। ଗିରଫ ୩ ଅଭିଯୁକ୍ତଙ୍କୁ ଖୋର୍ଦ୍ଧା କୋର୍ଟରେ ହାଜର କରାଯାଇଥିବା ପୋଲିସ ସୂଚନା ଦେଇଛି।ତେବେ ଜବତ ବ୍ରାଉନସୁଗାର କେଉଁଠାରୁ ଆସିଥିଲା, ଏହା କାହାକୁ ଯୋଗାଣ କରାଯିବାକୁ ଥିଲା ଏବଂ ଏହି କାରବାର ସହ ଆଉ କେଉଁମାନେ ସମ୍ପୃକ୍ତ ଅଛନ୍ତି, ସେ ନେଇ ପୋଲିସ ତଦନ୍ତ ଆରମ୍ଭ କରିଛି। ଜବତ ମୋବାଇଲ ଫୋନରୁ ମଧ୍ୟ ନିଶା କାରବାର ସମ୍ପର୍କିତ କୌଣସି ତଥ୍ୟ ମିଳୁଛି କି ନାହିଁ, ତାହା ଯାଞ୍ଚ କରାଯାଉଛି।
ଖୋର୍ଦ୍ଧା ଜିଲ୍ଲାରେ ବ୍ରାଉନସୁଗାର ଓ ଅନ୍ୟାନ୍ୟ ନିଶାଦ୍ରବ୍ୟର ଅବୈଧ କାରବାର ରୋକିବା ପାଇଁ ପୋଲିସ ପକ୍ଷରୁ ଚଢ଼ଉ ଓ ଯାଞ୍ଚ ଅଭିଯାନ ଜୋରଦାର କରାଯାଇଛି। ବିଶେଷକରି ଯୁବପିଢ଼ିଙ୍କ ମଧ୍ୟରେ ନିଶାଦ୍ରବ୍ୟର ପ୍ରସାର ରୋକିବା ଉପରେ ପୁଲିସ ଗୁରୁତ୍ୱ ଦେଉଥିବା ଜଣାପଡ଼ିଛି।