Odisha Janamata : ଖଲ୍ଲିକୋଟ ରେ ମହାପ୍ରଭୁଙ୍କ ବାହୁଡା଼ ଯାତ୍ରା ଓ ସୁନାବେଶ ଅନୁଷ୍ଠିତ |

ଖଲ୍ଲିକୋଟ ରେ ମହାପ୍ରଭୁଙ୍କ ବାହୁଡା଼ ଯାତ୍ରା ଓ ସୁନାବେଶ ଅନୁଷ୍ଠିତ |

06-Jul-2025

ଖଲ୍ଲିକୋଟରେ ମହାପ୍ରଭୁଙ୍କ ବାହୁଡ଼ା ଯାତ୍ରା, ସୁନାବେଶ ଅନୁଷ୍ଠିତଅଗଣିତ ଶ୍ରଦ୍ଧାଳୁ ଭକ୍ତଙ୍କ ସମାଗମ,

ଓଡିଶା ଜନମତ ବ୍ୟୁରୋ,

ଖଲ୍ଲିକୋଟରେ ଉତ୍ସାହ ଉଦ୍ଦୀପନା ସହକାରେ ମହାପ୍ରଭୁଙ୍କ ବାହୁଡ଼ା ଯାତ୍ରା, ସୁନାବେଶ ଅନୁଷ୍ଠିତ ହୋଇଯାଇଛି । ଜଗତର ନାଥ ଶ୍ରୀଜଗନ୍ନାଥ, ଭ୍ରାତା ବଳଭଦ୍ର, ଭଗ୍ନୀ ସୁଭଦ୍ରା ରଥଯାତ୍ରା ଦିନ ରୀତିନୀତି ପ୍ରକାରେ ଶ୍ରଦ୍ଧାଳୁ ଭକ୍ତଙ୍କ ଗହଳରେ ଶ୍ରୀମନ୍ଦିରରୁ ବାହାରି ଗୁଣ୍ଡିଚା ମନ୍ଦିରଠାରେ ପହଞ୍ଚି ସେଠାରେ ନଅ ଦିନ ଅବସ୍ଥାନ ପରେ ଗତକାଲି ଜନ୍ମ ବେଦୀରୁ ପୁନର୍ବାର ରତ୍ନବେଦୀ ଅଭିମୁଖେ ଯାତ୍ରା କରିବ ସିଂହ ଦ୍ୱାର ଠାରେ ଅଟକି ରହିଛନ୍ତି । ଆଜି ସକାଳୁ ଅଗଣିତ ଶ୍ରଦ୍ଧାଳୁ ଭକ୍ତଙ୍କ ସମାବେଶ ଖଲ୍ଲିକୋଟରେ ଆଧ୍ୟାତ୍ମିକ ପରିବେଶ ସୃଷ୍ଟି କରିଛି । ନନ୍ଦିଘୋଷ, ତାଳଧ୍ଵଜ, ଦର୍ପଦଳନ ରଥରେ ତ୍ରିବିଗ୍ରହ ଭକ୍ତଙ୍କୁ ଦର୍ଶନ ଦେଇଛନ୍ତି । ସୁନା ଆଦି ଅଳଙ୍କାରରେ ଠାକୁର ମାନେ ସେବାୟତଙ୍କ ଦ୍ୱାରା ସୁସଜ୍ଜିତ ସୁଶୋଭିତ ହୋଇଥିଲେ । ଆବାଳବୃଦ୍ଧ ବନିତା ଏପ୍ରକାର ପବିତ୍ର ଦର୍ଶନ ବରଷକେ ଥରେ କରୁଥିବାରୁ ବେଶ୍ ଉତ୍ସାହ ପ୍ରକାଶ ପାଇଛି । କଚଟି, ବାହୁଟି, କିରଟୀ, ମଥାମଣି ଆଦି ବହୁବିଧ ସ୍ୱର୍ଣ୍ଣାଳଙ୍କାର ଦେଖଣାହାରୀଙ୍କ ମନ ପ୍ରାଣ ହୃଦୟକୁ ଛୁଇଁଛି । ବହୁ ଦୋକାନ ବଜାର, ହୋଟେଲ, ଖେଳନା ଆଦି ଦୋକାନ ଗଢ଼ି ଉଠିଥିବାରୁ ଦେଖଣାହାରୀମାନେ ଏସବୁର ଭରପୂର ଫାଇଦା ନେଇଥିଲେ । ସ୍ଥାନୀୟ ପୋଲିସ ଥାନାର ଭାରପ୍ରାପ୍ତ ଅଧିକାରୀ ଶ୍ରୀଯୁକ୍ତ ରମେଶ କୁମାର ପ୍ରଧାନ କାର୍ଯ୍ୟରତ ଏସ୍. ଆଇ., ପୋଲିସ୍, କନେଷ୍ଟବଳ, ହୋମଗାର୍ଡଙ୍କ ସମ୍ପୂର୍ଣ୍ଣ ସହଯୋଗରେ ଭକ୍ତଙ୍କ ଅସମ୍ଭାଳ ଭିଡ଼ ନିୟନ୍ତ୍ରଣ, ଯାତାୟାତ ନିୟନ୍ତ୍ରଣ ସହିତ ଆଇନ୍ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ସର୍ବସାଧାରଣଙ୍କୁ ସୁରକ୍ଷା ଯୋଗାଇଥିଲେ । ଖଲ୍ଲିକୋଟରେ ସଂଗଠିତ ବଜରଙ୍ଗ ଦଳର କର୍ମୀମାନେ ମହାପ୍ରଭୁଙ୍କ ଯାତ୍ରାରେ ସ୍ୱେଚ୍ଛାକୃତ କର୍ତ୍ତବ୍ୟ ସୂଚାରୁରୂପେ ସମ୍ପାଦନ କରିଥିଲେ ।