Odisha Janamata : ନିର୍ମଳ ଝର ସ୍ଥିତ ଶିଶୁ ବିକାଶ ବିଦ୍ୟା ମନ୍ଦିର ପକ୍ଷରୁ ପିତୃ ମାତୃ ପୂଜନ ଦିବସ ପାଳିତ |

ନିର୍ମଳ ଝର ସ୍ଥିତ ଶିଶୁ ବିକାଶ ବିଦ୍ୟା ମନ୍ଦିର ପକ୍ଷରୁ ପିତୃ ମାତୃ ପୂଜନ ଦିବସ ପାଳିତ |

15-Feb-2025

ଶିଶୁ ବିକାଶ ବିଦ୍ୟା ମନ୍ଦିର ପକ୍ଷରୁ ପିତୃମାତୃ ପୂଜନ ଦିବସ ପାଳିତ

ଓଡିଶା ଜନମତ ବ୍ୟୁରୋ,

ଖଲ୍ଲିକୋଟ ବ୍ଲକ୍ ନିର୍ମଳଝର ସ୍ଥିତ ଶିଶୁ ବିକାଶ ବିଦ୍ୟା ମନ୍ଦିରରେ ଆଜି ମାତୃ ପିତୃ ପୂଜନ ଦିବସ ଆନୁଷ୍ଠାନିକ ରୀତିରେ ପାଳିତ ହୋଇଯାଇଛି । ଏହି ଅବସରରେ ଆୟୋଜିତ ଉତ୍ସବରେ ଯୁବ ସାହିତ୍ୟିକ ତଥା ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ଡକ୍ଟର ଦ୍ବାରିକାନାଥ ମହାରଣା ମୁଖ୍ୟ ବକ୍ତା, ବାଲୁଙ୍କେଶ୍ୱର ଉଚ୍ଚ ବିଦ୍ୟାଳୟର ସହକାରୀ ଶିକ୍ଷକ ରୋହିତ କୁମାର ସାହୁ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ବିଦ୍ୟାଳୟର ସମ୍ପାଦକ ଭାଗିରଥୀ ସ୍ୱାଇଁ ସଭାପତିତ୍ବ କରିଥିଲେ । ସର୍ବପ୍ରଥମେ ଅତିଥି ମାନଙ୍କୁ ପୁଷ୍ପ ଚନ୍ଦନ ସହକାରେ ବନ୍ଦାପନା ପୂର୍ବକ ଉତ୍ସବ କକ୍ଷକୁ ସ୍ୱାଗତ କରାଯିବା ପରେ ଅତିଥିମାନେ ପ୍ରଦୀପ ପ୍ରଜ୍ଜ୍ୱଳନ କାର୍ଯ୍ୟକ୍ରମ ସୂଚାରୁରୂପେ ସମ୍ପାଦନ କରିଥିଲେ । ସଭାପତି ଶ୍ରୀଯୁକ୍ତ ସ୍ୱାଇଁ ପ୍ରାକ ଭାଷଣ ପ୍ରଦାନ କରିଥିଲେ । ବିଦ୍ୟାଳୟରରେ କାର୍ଯ୍ୟରତ ଗୁରୁମା ମାନେ ଅତିଥି ମାନଙ୍କୁ ଉତ୍ତରୀୟ ସହିତ ସମ୍ମାନୀତ କରିଥିଲେ । ମୁଖ୍ୟ ବକ୍ତା ଡକ୍ଟର ମହାରଣା ଭାରତୀୟ ସଂସ୍କୃତି, ପରମ୍ପରାକୁ ସମ୍ମାନ ଜଣାଇ ଭାଲେଣ୍ଟାଇନ ଦିବସ ପରିବର୍ତ୍ତେ ମାତୃ ପିତୃ ପୂଜନ ଦିବସ ପାଳନ ପରମ୍ପରାକୁ ଭୂୟସୀ ପ୍ରଶଂସା କରିଥିଲେ । ବହୁ ଉଦାହରଣ ମାଧ୍ୟମରେ ଏପ୍ରକାର ଉନ୍ନତ ଚିନ୍ତାଧାରାର ପ୍ରଶସ୍ତି ଗାନ କରିଥିଲେ । ମୁଖ୍ୟ ଅତିଥି ଶ୍ରୀଯୁକ୍ତ ସାହୁ କୁନି କୁନି ପିଲାମାନଙ୍କୁ ନୈତିକ ଶିକ୍ଷା, ଶାଳୀନ ବ୍ୟବହାର ପ୍ରଦର୍ଶନ ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ । ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ସ୍ୱାଇଁ ଶୃଙ୍ଖଳିତ ଆଚରଣ ବିଧି ଶିଖିବା, କୋମଳମତି ଶିଶୁଙ୍କୁ କିଭଳି ଭଲ ମଣିଷ କରି ଗଢିତୋଳିବା ଦିଗରେ ଗୁରୁଦାୟିତ୍ଵ ଉପରେ ଉଲ୍ଲେଖ କରିଥିଲେ । ଉତ୍ସବରେ ବିଦ୍ୟାମନ୍ଦିରରେ ପଠନରତ ଛାତ୍ର ଛାତ୍ରୀଙ୍କ ପିତାମାତା ବହୁସଂଖ୍ୟାରେ ଉପସ୍ଥିତ ଥିଲେ । କୁନି କୁନି ପିଲାମାନେ ସେମାନଙ୍କର ପିତାମାତାଙ୍କୁ ପରମ୍ପରା ଅନୁଯାୟୀ ପୂଜନ ସହିତ ମିଷ୍ଟାନ୍ନ ଖୁଆଇ ଥିଲେ । ଉତ୍ସବରେ ପ୍ରଧାନ ଆଚାର୍ଯ୍ୟା କାଜଲ ବାରିକଙ୍କ ସମେତ ଗୁରୁମା କାଜଲ ରାଉତ, ଲିପିନା ମହାରଣା, ସନ୍ଧ୍ୟାରାଣୀ ସାହୁ ଉପସ୍ଥିତ ରହି ସମସ୍ତ ପ୍ରକାର ସହଯୋଗ କରିଥିଲେ ।