Odisha Janamata : ଖଲ୍ଲିକୋଟ ଶିଶୁ ବିକାଶ ବିଦ୍ୟା ମନ୍ଦିର ରେ ବାର୍ଷିକ ଉତ୍ସବ ଅନୁଷ୍ଠିତ |

ଖଲ୍ଲିକୋଟ ଶିଶୁ ବିକାଶ ବିଦ୍ୟା ମନ୍ଦିର ରେ ବାର୍ଷିକ ଉତ୍ସବ ଅନୁଷ୍ଠିତ |

12-Jan-2025

ଖଲ୍ଲିକୋଟ: ଶିଶୁ ବିକାଶ ବିଦ୍ୟା ମନ୍ଦିରର ବାର୍ଷିକ ଉତ୍ସବ ଅନୁଷ୍ଠିତ,

ଓଡିଶା ଜନମତ ବ୍ୟୁରୋ,

ଭାରତୀୟ ଶିକ୍ଷା ଓ ଗବେ ଷଣା ପ୍ରତିଷ୍ଠାନ ପକ୍ଷରୁ ଖଲ୍ଲିକୋଟ ଠାରେ ଅବସ୍ଥାପିତ ଶିଶୁ ବିକାଶ ବିଦ୍ୟା ମନ୍ଦିରର ପ୍ରଥମ ବାର୍ଷିକ ଉତ୍ସବ ଆନୁଷ୍ଠାନିକ ରୀତିରେ ଅନୁଷ୍ଠିତ ହୋଇଯାଇଛି । ବିଦ୍ୟା ମନ୍ଦିରର ଗୁରୁ ମାଆମାନେ ଦୀପ ମନ୍ତ୍ର ଗାନ, ପ୍ରାରମ୍ଭିକ ସଂଗୀତ ପରିବେଷଣ କରିଥିଲେ । ଆୟୋଜିତ ବାର୍ଷିକୋତ୍ସବରେ କେଶପୁର ଡିଗ୍ରୀ ମହାବିଦ୍ୟାଳୟର ଅଧ୍ୟାପକ ବିଷ୍ଣୁ ପ୍ରସାଦ ଦାସ ମୁଖ୍ୟ ବକ୍ତା, ଖଲ୍ଲିକୋଟ ବ୍ଲକ୍ ଉପାଧ୍ୟକ୍ଷାଙ୍କ ପ୍ରତିନିଧି ତଥା ସମାଜସେବୀ କାଳୁରାମ ମହାରଣା ମୁଖ୍ୟ ଅତିଥି, ଭାରତୀୟ ଶିକ୍ଷା ଓ ଗବେଷଣା ପ୍ରତିଷ୍ଠାନର ରାଜ୍ୟ ସମ୍ପାଦକ ବିଷ୍ଣୁ ପ୍ରସାଦ ଆଚାର୍ଯ୍ୟ ସ୍ୱତନ୍ତ୍ର ଅତିଥି, ଆଇତିପୁର ଶିଶୁ ବିକାଶ ବିଦ୍ୟା ମନ୍ଦିରର ଶିକ୍ଷକ‌ ତଥା ଅନୁଷ୍ଠାନର ସହ ସମ୍ପାଦକ ରୋହିତ ସ୍ୱାଇଁ ସମ୍ମାନୀତ ଅତିଥି ଭାବେ ଯୋଗ ଦେଇ ଭାରତୀୟ ଶିକ୍ଷା ସଂସ୍କୃତି, ସଂସ୍କାର ମୂଳକ ଶିକ୍ଷା, ପ୍ରାଚ୍ୟ ସଭ୍ୟତା ନୀତିଶିକ୍ଷାର ପ୍ରୟୋଜନତା, କୋମଳମତି ଶିଶୁଙ୍କ ଲାଗି ସରଳ ତରଳ ଭାଷାରେ ଉପଯୁକ୍ତ ଶିକ୍ଷା ପ୍ରଦାନ ଆଦି ବହୁବିଧ ଦିଗ ସମ୍ପର୍କରେ ଆଲୋଚନା କରିଥିଲେ । ଉତ୍ସବରେ ସଭାପତିତ୍ବ କରିଥିଲେ ଅର୍ଗସ ନ୍ୟୁଜର ଜିଲ୍ଲା ପ୍ରତିନିଧି, ଯୁବ ସମାଜସେବୀ ତଥା ଅନୁଷ୍ଠାନର ଉପସଭାପତି ଅଶୋକ କୁମାର ତ୍ରିପାଠୀ ସଭାପତିତ୍ବ କରିଥିଲେ । ଅନୁଷ୍ଠାନର ସମ୍ପାଦକ ଭାଗିରଥି ସ୍ୱାଇଁ ସମ୍ପାଦକୀୟ ବିବରଣୀ ପଠନ କରିଥିଲା ବେଳେ ଯୁବ ସାହିତ୍ୟିକ , ଆଲୋଚକ ତଥା ସି. ଆର. ସି. ସି. ଡକ୍ଟର ଦ୍ବାରିକାନାଥ ମହାରଣା କାର୍ଯ୍ୟକ୍ରମର ସଂଯୋଜନା କରିଥିଲେ । ଅନୁଷ୍ଠିତ ଉତ୍ସବରେ ଅନୁଷ୍ଠାନର ସମସ୍ତ ଗୁରୁଜୀ ଗୁରୁମା ଉପସ୍ଥିତ ଥିଲେ । ବିଦ୍ୟା ମନ୍ଦିରରେ ପଠନରତ କୋମଳ ମତି ଛାତ୍ର ଛାତ୍ରୀଙ୍କୁ ନେଇ ପୂର୍ବରୁ ଆୟୋଜିତ ହୋଇଥିବା ବିଭିନ୍ନ ପ୍ରତିଯୋଗିତାର କୃତୀ ପ୍ରତିଯୋଗୀମାନଙ୍କୁ ଅତିଥିମାନେ ମାନପତ୍ର, ସିଲ୍ ସହିତ ସମ୍ମାନୀତ କରିଥିଲେ । ଅନୁଷ୍ଠାନର ଛାତ୍ରଛାତ୍ରୀମାନେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଉତ୍ସବରେ ବହୁ ଅଭିଭାବକ, ଅଭିଭାବିକା, ଶିକ୍ଷାବିତ୍, ବୁଦ୍ଧିଜୀବୀ, ଅଞ୍ଚଳବାସୀ ଯୋଗଦାନ କରିଥିଲେ । ପରିଶେଷରେ ସଭାପତି ଅଶୋକ କୁମାର ତ୍ରିପାଠୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।