Odisha Janamata : ବଜ୍ର କାପ୍ତା ଖପୁରି ବିକ୍ରିବେଳେ ତିନି ଜଣଙ୍କୁ ଗିରଫ କଲା ବନ ଭିଭାଗ |

ବଜ୍ର କାପ୍ତା ଖପୁରି ବିକ୍ରିବେଳେ ତିନି ଜଣଙ୍କୁ ଗିରଫ କଲା ବନ ଭିଭାଗ |

11-Oct-2026

ବଜ୍ରକାପ୍ତା ଖପୁରୀ ବିକ୍ରି ବେଳେ ବନ ବିଭାଗର ଚଢ଼ାଉ, ୩ ଗିରଫ

୪ କିଲୋଗ୍ରାମରୁ ଅଧିକ ଖପୁରୀ ଜବତ, ଡାକ୍ତରୀ ପରୀକ୍ଷା ପରେ ଅଭିଯୁକ୍ତ କୋର୍ଟ ଚାଲାଣ
ଓଡିଶା ଜନମତ ରାୟଗଡ଼ା, ୧୧/୧୦,

କାମେଶ୍ୱର କରକରିଆ :- ----

ରାୟଗଡ଼ା ସହରରେ ବନ୍ୟପ୍ରାଣୀଙ୍କ ଅବଶେଷ ବିକ୍ରି ଉଦ୍ୟମ ବେଳେ ବନ ବିଭାଗକୁ ମିଳିଛି ବଡ଼ ସଫଳତା। ସହରର ଓରମାସ କାର୍ଯ୍ୟାଳୟ ପଛପଟ ପଡ଼ିଆରେ ବଜ୍ରକାପ୍ତା ଖପୁରୀ ବିକ୍ରି କରୁଥିବା ଅଭିଯୋଗରେ ବନ ବିଭାଗ ତିନି ଜଣଙ୍କୁ ଗିରଫ କରିଛି। ଏହା ସହିତ ସେମାନଙ୍କ ନିକଟରୁ ୪ କିଲୋଗ୍ରାମରୁ ଅଧିକ ଓଜନର ଖପୁରୀ ଜବତ କରାଯାଇଛି। ଏହି ଘଟଣାକୁ ନେଇ ରାୟଗଡ଼ା ଅଞ୍ଚଳରେ ଚର୍ଚ୍ଚା ଜୋର ଧରିଛି। ସୂଚନା ଅନୁଯାୟୀ, ଗତ ୧୦ ତାରିଖରେ ରାୟଗଡ଼ା ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶକ୍ରମେ ବନ ବିଭାଗର ଏକ ଟିମ୍ ଓରମାସ କାର୍ଯ୍ୟାଳୟ ପଛପଟ ପଡ଼ିଆରେ ଚଢ଼ାଉ କରିଥିଲା। ଏହି ସମୟରେ ବଜ୍ରକାପ୍ତା ଖପୁରୀ ବିକ୍ରି କରୁଥିବା ଅଭିଯୋଗରେ ତିନି ଜଣଙ୍କୁ ଧରିବା ସହ ସେମାନଙ୍କ ନିକଟରୁ ଉକ୍ତ ଖପୁରୀ ଜବତ କରାଯାଇଥିଲା। ଜବତ ସାମଗ୍ରୀର ଓଜନ ୪ କିଲୋଗ୍ରାମରୁ ଅଧିକ ବୋଲି ବନ ବିଭାଗ ପକ୍ଷରୁ ଜଣାପଡ଼ିଛି। ଏହି ଘଟଣାରେ ଗିରଫ ହୋଇଥିବା ତିନି ଜଣ ହେଲେ ଜଗନ ହିମିରିକା, ନୀଳାମ୍ବର ଖୋସଲା ଓ ପୁରୁଷୋତ୍ତମ ଖୋସଲା। ବନ ବିଭାଗ ଏହି ଘଟଣାକୁ ଗୁରୁତ୍ୱର ସହ ନେଇ ତଦନ୍ତ ଆରମ୍ଭ କରିଥିଲା। ଏହି କାରବାରରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ତାହା ଜାଣିବା ପାଇଁ ACF ସତୀଶ କୁମାର ଧାରୁଆ ତଦନ୍ତ କରିଥିଲେ। ପରବର୍ତ୍ତୀ ସମୟରେ ଗିରଫ ତିନି ଅଭିଯୁକ୍ତଙ୍କ ଡାକ୍ତରୀ ପରୀକ୍ଷା କରାଯିବା ପରେ ସେମାନଙ୍କୁ କୋର୍ଟ ଚାଲାଣ କରାଯାଇଛି। ଏନେଇ ACF ସତୀଶ କୁମାର ଧାରୁଆ ସୂଚନା ଦେଇଛନ୍ତି।
ବଜ୍ରକାପ୍ତା ଏକ ସୁରକ୍ଷିତ ବନ୍ୟପ୍ରାଣୀ ହୋଇଥିବାରୁ ଏହାର ଶିକାର ଓ ଅବଶେଷର ବେଆଇନ କାରବାର ବନ୍ୟପ୍ରାଣୀ ସୁରକ୍ଷା ପାଇଁ ଗୁରୁତର ଚିନ୍ତାର ବିଷୟ। ତେବେ ଜବତ ଖପୁରୀ କେଉଁଠାରୁ ଆସିଥିଲା ଏବଂ ଏହି କାରବାର ପଛରେ ଆଉ କେହି ରହିଛନ୍ତି କି ନାହିଁ, ତାହା ତଦନ୍ତ ପରେ ସ୍ପଷ୍ଟ ହେବ।