Odisha Janamata : ଲଗାଣ ବର୍ଷାରେ ଭାଙ୍ଗିଗଲା ଘର ଅଳ୍ପ କେ ବର୍ତ୍ତିଲେ ଦୁଇ ପରିବାର ||

ଲଗାଣ ବର୍ଷାରେ ଭାଙ୍ଗିଗଲା ଘର ଅଳ୍ପ କେ ବର୍ତ୍ତିଲେ ଦୁଇ ପରିବାର ||

23-Aug-2026

ଦୁଇ ଦିନର ଲଗାଣ ବର୍ଷାରେ ଭୁଶୁଡ଼ିଲା ଘର କାନ୍ଥ, ଅଳ୍ପକେ ବର୍ତ୍ତିଲେ ଦୁଇ ପରିବାର

ପୋଲିଗାଁରେ ୧୨ ବର୍ଷୀୟା ଝିଅ ଆହତ, ହାତୀମୁଣ୍ଡାରେ ମଧ୍ୟ କ୍ଷୟକ୍ଷତି

ଓଡିଶା ଜନମତ ରାୟଗଡା,୨୩/୦୮

କାମେଶ୍ୱର କରକରିଆ :--------

ଲଗାଣ ବର୍ଷା ଯୋଗୁଁ କଲ୍ୟାଣସିଂହପୁର ବ୍ଲକର ଦୁଇଟି ଗାଁରେ ଘର କାନ୍ଥ ଭୁଶୁଡ଼ି ପଡ଼ିଛି। ସୁନାଖଣ୍ଡି ପଞ୍ଚାୟତର ପୋଲିଗାଁ ଓ ଧାମୁଣିପଙ୍ଗା ପଞ୍ଚାୟତର ହାତୀମୁଣ୍ଡା ଗାଁରେ ଏହି ଘଟଣା ଘଟିଥିବା ବେଳେ ଅଳ୍ପକେ ଦୁଇ ପରିବାରର ସଦସ୍ୟମାନେ ବଡ଼ ବିପଦରୁ ରକ୍ଷା ପାଇଛନ୍ତି। ତେବେ ପୋଲିଗାଁ ଘଟଣାରେ ଜଣେ ୧୨ ବର୍ଷୀୟା ଝିଅ ଆହତ ହୋଇଥିବା ଜଣାପଡ଼ିଛି।ସୂଚନା ଅନୁଯାୟୀ, ଗତ ଦୁଇ ଦିନ ଧରି ବ୍ଲକ ଅଞ୍ଚଳରେ ଲଗାତାର ବର୍ଷା ହେବା ଫଳରେ ସୁନାଖଣ୍ଡି ପଞ୍ଚାୟତ ଅନ୍ତର୍ଗତ ପୋଲିଗାଁର ଦୟାନନ୍ଦ ସୁନାଙ୍କ ଘର କାନ୍ଥ ବର୍ଷା ପାଣିରେ ଭିଜି ଦଦରା ହୋଇପଡ଼ିଥିଲା। ଗତକାଲି ରାତିରେ ପରିବାରର ସମସ୍ତେ ଘରେ ଶୋଇଥିବା ସମୟରେ ହଠାତ୍ କାନ୍ଥଟି ଭୁଶୁଡ଼ି ପଡ଼ିଥିଲା। ଏଥିରେ ଦୟାନନ୍ଦଙ୍କ ୧୨ ବର୍ଷୀୟା ଝିଅ କଲ୍ୟାଣୀ ସୁନାଙ୍କ ଗୋଡ଼ରେ ଆଘାତ ଲାଗିଛି। ତେବେ ଘରେ ଥିବା ଅନ୍ୟ ସାତ ଜଣ ପରିବାର ସଦସ୍ୟ ଅଳ୍ପକେ ବର୍ତ୍ତି ଯାଇଥିବାରୁ ଏକ ବଡ଼ ଅଘଟଣ ଏଡ଼ିଯାଇଛି।
ସେହିପରି ଧାମୁଣିପଙ୍ଗା ପଞ୍ଚାୟତ ଅନ୍ତର୍ଗତ ହାତୀମୁଣ୍ଡା ଗାଁର ୱାର୍ଡ ମେମ୍ବର କୃପା କରକରିଆଙ୍କ ଘର କାନ୍ଥ ମଧ୍ୟ ଲଗାଣ ବର୍ଷାରେ ଭାଙ୍ଗିଯାଇଛି। ସୌଭାଗ୍ୟବଶତଃ କାନ୍ଥ ଭୁଶୁଡ଼ିବା ସମୟରେ ପରିବାର ଲୋକେ ଅଳ୍ପକେ ବିପଦରୁ ରକ୍ଷା ପାଇଛନ୍ତି। ଉଭୟ ଘଟଣାରେ ଘର ଭିତରେ ବର୍ଷା ପାଣି ପଶିଯିବାରୁ ଦୈନନ୍ଦିନ ବ୍ୟବହାରର ଅନେକ ସାମଗ୍ରୀ ଭିଜି ନଷ୍ଟ ହୋଇଯାଇଛି। ଏକପଟେ ଲଗାଣ ବର୍ଷା ଜାରି ରହିଥିବା ବେଳେ ଅନ୍ୟପଟେ ଘରର କାନ୍ଥ ଭାଙ୍ଗିଯିବା ଉଭୟ ପରିବାର ପାଇଁ ଦୁର୍ଦ୍ଦିନ ସୃଷ୍ଟି କରିଛି। ବର୍ତ୍ତମାନ ଭଙ୍ଗା ଓ ଅସୁରକ୍ଷିତ ଘରେ ମୁଣ୍ଡ ଗୁଞ୍ଜି ରହିଥିବାରୁ ପୁଣି ବର୍ଷା ହେଲେ କେଉଁଭଳି ପରିସ୍ଥିତି ସୃଷ୍ଟି ହେବ, ସେନେଇ ପରିବାର ଲୋକେ ଚିନ୍ତାରେ ଅଛନ୍ତି।
ଘଟଣାର ତୁରନ୍ତ ତଦନ୍ତ କରି ପ୍ରକୃତ କ୍ଷୟକ୍ଷତିର ଆକଳନ କରାଯିବା ସହ ଉଭୟ କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟ ଲୋକମାନେ ଦାବି କରିଛନ୍ତି। ଏଥିସହ ଅସୁରକ୍ଷିତ ଘରେ ରହୁଥିବା ପରିବାରଙ୍କୁ ପକ୍କା ଘର ଯୋଗାଇଦେବା ପାଇଁ ମଧ୍ୟ ଦାବି ହୋଇଛି। ଏ ସମ୍ପର୍କରେ ରାଜସ୍ୱ ନିରୀକ୍ଷକ ଗୌରୀଶଙ୍କର କଣ୍ଡାଗୋରୀ ଓ ପୂଜାରୀ ଗୁଡା ରାଜସ୍ବ ନିରୀକ୍ଷକ ଙ୍କୁ ପଚାରିବାରୁ ସେ କହିଛନ୍ତି ଯେ, ଘଟଣାସ୍ଥଳରେ ପହଞ୍ଚି ତଦନ୍ତ କରାଯିବ। ତଦନ୍ତ ପରେ ସରକାରୀ ନିୟମ ଅନୁଯାୟୀ ଯାହା ସହାୟତା ଯୋଗ୍ୟ ହେବ ତାହା ପ୍ରଦାନ କରାଯିବ।