Odisha Janamata : ବସ ଧକ୍କାରେ ଦୁଇ ଛେଳି ମୃତ, ଗାଈ ଓ ବଳଦ ଗୁରୁତର |

ବସ ଧକ୍କାରେ ଦୁଇ ଛେଳି ମୃତ, ଗାଈ ଓ ବଳଦ ଗୁରୁତର |

12-Aug-2026

ବସ ଧକ୍କାରେ ୨ ଛେଳି ମୃତ, ୮ ଗାଈ,ବଳଦ ଓ ଛେଳି ଗୁରୁତର

ବ୍ରେକ୍‌ ଫେଲ୍‌ ଯୋଗୁଁ ଦୁର୍ଘଟଣା, ବସ୍‌ ଛାଡ଼ିଦେବାକୁ ନେଇ ପ୍ରଶ୍ନ

ଓଡିଶା ଜନମତ ରାୟଗଡା,୧୨/୭,

(କାମେଶ୍ୱର କରକରିଆ): ----

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ନାରାୟଣପୁର ପଞ୍ଚାୟତ ଅନ୍ତର୍ଗତ ସୀତାପୁର ଓ ନାରାୟଣପୁର ଶିବ ମନ୍ଦିର ନିକଟସ୍ଥ ବ୍ରିଜ ନିକଟରେ ବସ୍‌ ଧକ୍କାରେ ୨ଟି ଛେଳି ମୃତ୍ୟୁ ଘଟିଥିବା ବେଳେ ୮ଟି ଗାଈ, ବଳଦ ଓ ଛେଳି ଗୁରୁତର ଆହତ ହୋଇଥିବା ଜଣାପଡ଼ିଛି। ସୂଚନା ଅନୁଯାୟୀ, ଚୋରାଳୀମାନେ ଗାଈ ଓ ଛେଳିଙ୍କୁ ପାଣି ପିଆଇବା ପରେ ରାସ୍ତାର ଅନ୍ୟ ପାର୍ଶ୍ୱକୁ ନେଉଥିଲେ। ମୃତ ଛେଳି ଓ ଗାଈ ନାରାୟଣପୁର ପଞ୍ଚାୟତ ଭାତପରଷି ଗାଁର ଲଛମ୍ପତି କାଡ୍ରାକା ର ବୋଲି ଜଣାପଡିଛି।ଏହି ସମୟରେ ରାୟଗଡ଼ାରୁ କଲ୍ୟାଣସିଂହପୁର ଅଭିମୁଖେ ଆସୁଥିବା ‘ରାବଣିଆ (ଶ୍ରୀ ବିଜୟୀ ଦୁର୍ଗା)’ ବସ୍‌ (ଓଡି-୧୮-ବି-୦୩୬୯) ହଠାତ୍‌ ବ୍ରେକ୍‌ ଫେଲ୍‌ ହୋଇ ରାସ୍ତା ପାର ହେଉଥିବା ଗାଈ ଓ ଛେଳିଙ୍କୁ ଧକ୍କା ଦେଇଥିଲା।
ବସ୍‌ ଧକ୍କାରେ ଘଟଣାସ୍ଥଳରେ ଗୋଟିଏ ଛେଳିର ମୃତ୍ୟୁ ଘଟିଥିଲା। ଗୁରୁତର ଆହତ ଅନ୍ୟ ଗୋଟିଏ ଛେଳିର ମଧ୍ୟ ପରେ ମୃତ୍ୟୁ ଘଟିଥିବା ବେଳେ ଅନ୍ୟ ୮ଟି ଗାଈ, ବଳଦ ଓ ଛେଳି ଗୁରୁତର ଆହତ ହୋଇଛନ୍ତି। ଖବର ପାଇ ସ୍ଥାନୀୟ ପୁଲିସ ଘଟଣାସ୍ଥଳରେ ପହଞ୍ଚି ବସ୍‌ଟିକୁ ଥାନାକୁ ନେଇଥିଲା। ତେବେ ନଥିପତ୍ର ଯାଞ୍ଚ ପରେ ବସ୍‌ଟିକୁ ଶୀଘ୍ର ଛାଡ଼ି ଦିଆଯାଇଥିବା ଅଭିଯୋଗ ହୋଇଛି। ଦୁର୍ଘଟଣାର ୨୪ ଘଣ୍ଟା ମଧ୍ୟରେ ବସ୍‌କୁ କାହିଁକି ଛାଡ଼ି ଦିଆଗଲା, ଏହାକୁ ନେଇ ସ୍ଥାନୀୟ ବୁଦ୍ଧିଜୀବୀ ମହଲରେ ପ୍ରଶ୍ନ ଉଠିଛି। ଘଟଣା ସମ୍ପର୍କ ରେ ଥାନା ଅଧିକାରୀ ଅଜିତ ପରିଡା ଙ୍କୁ ପଚାରିବାରୁ ସେ କହିଛନ୍ତି ଛେଳି ମାଲିକ ଅଭିଯୋଗ କରିବାକୁ ମନା କରିଥିଲେ ଓ ଛେଳି ମାଲିକ ଓ ବସ ମାଲିକ ମଧ୍ୟରେ ବୁଝାମଣା ହୋଇଥିବା କହିଛନ୍ତି।