Odisha Janamata : ବେଳକଣା ଗାଁରେ ମହିଳାଙ୍କ ମୃତ୍ୟୁ ,କାରଣ ଅସ୍ପଷ୍ଟ |

ବେଳକଣା ଗାଁରେ ମହିଳାଙ୍କ ମୃତ୍ୟୁ ,କାରଣ ଅସ୍ପଷ୍ଟ |

18-May-2026

ବେଳକଣା ଗାଁରେ ବିବାହିତ ମହିଳାଙ୍କ ମୃତ୍ୟୁ, କାରଣ ଅସ୍ପଷ୍ଟ |

ଓଡିଶା ଜନମତ ରାୟଗଡା, ୧୮/୦୫,

କାମେଶ୍ୱର କରକରିଆ : ----

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସିକରପାଇ ପଞ୍ଚାୟତ ବେଳକଣା ଗାଁରେ ଜଣେ ବିବାହିତ ମହିଳାଙ୍କ ଅସ୍ୱାଭାବିକ ମୃତ୍ୟୁ ଘଟିଥିବା ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଘଟଣାର କାରଣ ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଥିବା ବେଳେ ପରିବାର ଲୋକେ ହତ୍ୟା ଅଭିଯୋଗ ଆଣି ଥାନାରେ ଲିଖିତ ଏତଲା ଦେଇଥିବା ଜଣାପଡିଛି। ମୃତ ମହିଳା ଜଣକ କରପା ପଞ୍ଚାୟତ ସୁଳିପଦର ଗ୍ରାମର ରଞ୍ଜିତା ସାହୁ(୨୪) ବୋଲି ଜଣାପଡିଛି। ସେ ବେଳକଣା ଗ୍ରାମର ପଙ୍କଜ ନେମାଳପୁରିଙ୍କୁ ବିବାହ କରିଥିଲେ। ସୂଚନା ଅନୁସାରେ, ରଞ୍ଜିତା ସୁଳିପଦର ଗ୍ରାମରେ ଅଙ୍ଗନବାଡି ୱାର୍କର ଭାବେ କାର୍ଯ୍ୟରତ ଥିଲେ। ବିବାହର ପ୍ରାୟ ଦୁଇ ବର୍ଷ ପରେ କୌଣସି ଏକ କାରଣକୁ ନେଇ ଏହି ଘଟଣା ଘଟିଥିବା ନେଇ ସ୍ଥାନୀୟରେ ଚର୍ଚ୍ଚା ହେଉଛି। ପ୍ରକାଶ ଯେ, ସ୍ୱାମୀ ପଙ୍କଜ ଡିୟୁଟି ସାରି ଘରକୁ ଫେରି କବାଟ ବାଡେଇଥିଲେ। କିନ୍ତୁ ରଞ୍ଜିତା କବାଟ ଖୋଲିନଥିଲେ। ଦୀର୍ଘ ସମୟ ଧରି କବାଟ ନ ଖୋଲିବାରୁ ପଙ୍କଜ କବାଟ ଭାଙ୍ଗି ଘର ଭିତରକୁ ପସିଥିଲେ। ସେଠାରେ ରଞ୍ଜିତା ବେକରେ ଚୁନି ଲଗାଇ ଝୁଲି ପଡିଥିବା ଦେଖିଥିଲେ। ତୁରନ୍ତ ତାଙ୍କୁ ଉଦ୍ଧାର କରି ସିକରପାଇ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ। ପରେ ଡାକ୍ତର ତାଙ୍କୁ କଲ୍ୟାଣସିଂହପୁର ଗୋଷ୍ଠୀ ସ୍ଵାସ୍ତ୍ୟ କେନ୍ଦ୍ର କୁ ସ୍ଥାନାନ୍ତର କରିଥିଲେ। ହେଲେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଉଥିବା ସମୟରେ ଅଧା ରାସ୍ତାରେ ରଞ୍ଜିତାଙ୍କ ମୃତ୍ୟୁ ଘଟିଥିବା ଜଣାପଡିଛି। ଘଟଣା ସମ୍ପର୍କରେ ଖବର ପାଇ କଲ୍ୟାଣସିଂହପୁର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ପୋଲିସ ଶବ ଜବତ କରି ଶବ ବ୍ୟବଛେଦ ପାଇଁ ପଠାଇଥିବା ବେଳେ ପରେ ଶବକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏହି ଘଟଣାରେ କଲ୍ୟାଣସିଂହପୁର ଥାନା ଆଇଆଇସି କଳ୍ପନା ବେହେରା, ଏସଆଇ ହେମନ୍ତ କୁମାର ବରିହା ଏବଂ ଏସଡିପିଓ ଗୌରହରୀ ସାହୁ ତଦନ୍ତ କରୁଥିବା ସୂଚନା ମିଳିଛି। ତେବେ ମୃତ୍ୟୁର ପ୍ରକୃତ କାରଣ ଶବ ବ୍ୟବଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ କୁହାଯାଇଛି।