Odisha Janamata : ବିଶୁଦ୍ଧ ପାନୀୟ ଜଳ ଦାବିରେ ରାସ୍ତା ଅବରୋଧ |

ବିଶୁଦ୍ଧ ପାନୀୟ ଜଳ ଦାବିରେ ରାସ୍ତା ଅବରୋଧ |

14-May-2026

ବିଶୁଦ୍ଧ ପାନୀୟଜଳ ଦାବିରେ ରାସ୍ତା ଅବରୋଧ,
ଓଡିଶା ଜନ ମତ,କଲ୍ୟାଣସିଂହପୁର,

କାମେଶ୍ୱର କର କରିଆ ୧୪/୦୫:----

, ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ଧାମୁଣିପଙ୍ଗା ପଞ୍ଚାୟତର ବାଗଗୁଡା ଗାଁରେ ଦୀର୍ଘଦିନ ଧରି ଲାଗିରହିଥିବା ପାନୀୟଜଳ ସମସ୍ୟାକୁ ନେଇ ଗୁରୁବାର ଗ୍ରାମବାସୀ ରାସ୍ତା ଅବରୋଧ କରି ଆନ୍ଦୋଳନ କରିଛନ୍ତି। ଗାଁରେ ମାତ୍ର ୧୧ଟି ପରିବାର ବସବାସ କରୁଥିଲେ ମଧ୍ୟ ଆଜିପର୍ଯ୍ୟନ୍ତ ବିଶୁଦ୍ଧ ପାନୀୟଜଳ ସୁବିଧା ନମିଳିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଗ୍ରାମବାସୀଙ୍କ ଅଭିଯୋଗ ଅନୁସାରେ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ବ୍ୟୟରେ ମେଘା ପାନୀୟଜଳ ପ୍ରକଳ୍ପ ଓ ସୋଲାର ଜଳଯୋଗାଣ ବ୍ୟବସ୍ଥା କରାଯାଇଥିଲେ ମଧ୍ୟ ବାଗଗୁଡା ଗ୍ରାମକୁ ଏହାର ସୁଫଳ ମିଳୁନାହିଁ। ପ୍ରତିଦିନ ପାନୀୟଜଳ ପାଇଁ ଗ୍ରାମବାସୀଙ୍କୁ ପ୍ରାୟ ଏକ କିଲୋମିଟର ଦୂରରେ ଥିବା ନାଗାବୋଲି ନଦୀରୁ ପାଣି ଆଣିବାକୁ ପଡୁଛି। ନଦୀର ଅପରିଷ୍କାର ପାଣି ବ୍ୟବହାର କରିବା ଫଳରେ ଗ୍ରାମରେ ବିଭିନ୍ନ ରୋଗ ଦେଖାଦେଉଥିବା ଗ୍ରାମବାସୀ କହିଛନ୍ତି। ବାରମ୍ବାର ପ୍ରଶାସନ ଓ ସ୍ଥାନୀୟ ସରପଞ୍ଚଙ୍କୁ ଅବଗତ କରାଇଥିଲେ ମଧ୍ୟ ସମସ୍ୟାର ସମାଧାନ ନହେବାରୁ ଗୁରୁବାର ସକାଳେ ଗ୍ରାମର ମହିଳା ଓ ପୁରୁଷମାନେ କଲ୍ୟାଣସିଂହପୁର କଳାହାଣ୍ଡି ମୁଖ୍ୟ ରାସ୍ତାର ଗୁଣ୍ଡୁରୀଗୁଡ଼ା ଛକରେ ହାଣ୍ଡି ଓ ଗୋରାରେ ନଦୀ ପାଣି ରଖି ରାସ୍ତା ରୋକ କରିଥିଲେ। ଏହାଫଳରେ ଉଭୟ ପାର୍ଶ୍ୱରେ ଗାଡ଼ିମୋଟର ଚଳାଚଳ ପ୍ରାୟ ଏକ ଘଣ୍ଟା ଧରି ବାଧାପ୍ରାପ୍ତ ହୋଇଥିଲା।ନୀଲାବତୀ ହିକକା, ଅନି ହିକକା, କୁଡୁଞ୍ଜି ହିକକା, କାର୍ଲ୍ଲା ହିକକା, ଦେଖିନା ହିକକା, ସୀତାରାମ ହିକକା, ଜୟ ହିକକା ଓ ସାଲାଇ ହିକକା ପ୍ରମୁଖ ରାସ୍ତା ଅବରୋଧରେ ସାମିଲ ହୋଇଥିଲେ।ଖବର ପାଇ ସ୍ଥାନୀୟ ପ୍ରଶାସନ ପକ୍ଷରୁ ଜିପିଓ ଶ୍ୱେତାମ୍ବର ପ୍ରଧାନ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ସେ ଯଥାଶୀଘ୍ର ନଳକୂପ ମରାମତି କରାଯିବା ସହ ଗାଁରେ ସ୍ଥାୟୀ ପାନୀୟଜଳ ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ପରେ ଗ୍ରାମବାସୀ ଆନ୍ଦୋଳନ ପ୍ରତ୍ୟାହାର କରିଥିଲେ।