Odisha Janamata : ଖଲ୍ଲିକୋଟ ର ବିଭିନ୍ନ ଶୈବ ପୀଠରେ ସରିଲା ଜାଗର ଓ ମହାଦୀପ ଉଠାଣ ||

ଖଲ୍ଲିକୋଟ ର ବିଭିନ୍ନ ଶୈବ ପୀଠରେ ସରିଲା ଜାଗର ଓ ମହାଦୀପ ଉଠାଣ ||

27-Feb-2025

ଖଲ୍ଲିକୋଟରେ ଉତ୍ସାହ ଉଦ୍ଦୀପନା ସହକାରେ ମହାଶିବରାତ୍ରି ପାଳିତ,

ଓଡିଶା ଜନମତ ବ୍ୟୁରୋ,

ଭକ୍ତି ବିଶ୍ୱାସର ମହାନ ପରମ୍ପରା ଶିବରାତ୍ରୀ ଖଲ୍ଲିକୋଟ ଅଞ୍ଚଳରେ ଆଡ଼ମ୍ବର ସହକାରେ ପାଳିତ ହୋଇଯାଇଛି । ଭୋର୍ ସମୟରୁ ଶ୍ରଦ୍ଧାଳୁ ଭକ୍ତମାନେ ନିଷ୍ଠାପର ଭାବେ ଆଖପାଖ ଶିବ ମନ୍ଦିରରେ ଆନୁଷ୍ଠାନିକ ରୀତିରେ ଜାଗର ପାଳନ କରୁଥିବା ପରିଲକ୍ଷିତ ହୋଇଛି । ବହୁ ଶ୍ରଦ୍ଧାଳୁ ଜାଗର ଉପବାସ କରୁଥିବାରୁ ସମଗ୍ର ଅଞ୍ଚଳରେ ଏକପ୍ରକାର ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିବା ଲକ୍ଷ୍ୟ କରାଯାଇଛି । ଉଭୟ ପୁରୁଷ ମହିଳା ଯୁବଗୋଷ୍ଠୀ ଉତ୍ସାହର ସହିତ ଶିବରାତ୍ରି ପାଳିଥିଲେ । ଖଲ୍ଲିକୋଟ ସ୍ଥିତ ବରାଳ ବାଲୁଙ୍କେଶ୍ୱର, ଅମରେଶ୍ୱର, ନିର୍ମଳଝରର ନୀଳକଣ୍ଠେଶ୍ଵର, ଫାସୁଳାର ବେଲେଶ୍ୱର, କେନ୍ଦୁବାଡିର କାଳୁଆ ଷଣ୍ଢ, କୁଶଢିପାର ରତ୍ନେଶ୍ୱର , ବିକ୍ରମ ପୁରର ସକଳେଶ୍ୱର, ହରିଶ୍ୱର, କେଶପୁରର ଗୁପ୍ତେଶ୍ୱର, କୈରାଶିର ନୀଳକଣ୍ଠେଶ୍ଵର, ବାଲୁକେଶ୍ୱର ପୁରର ବାଲୁଙ୍କେଶ୍ୱର ଆଦି ଶୈବପୀଠରେ ହଜାର ହଜାର ଭକ୍ତ ଭକ୍ତି ନିଷ୍ଠା ଆଗ୍ରହ ସହକାରେ ଜାଗର ପାଳନ କରିଥିଲେ ।ବହୁ ଶୈବପୀଠରେ ସାମାଜିକ ନାଟକ, ପାଲା , ଦାସକାଠିଆ ଆଦି ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା । ରାତ୍ରି ସମୟରେ ମନ୍ଦିର ପରିସରରେ ବିଭିନ୍ନ ଦୀପ ଜାଳି ଶ୍ରଦ୍ଧାଳୁମାନେ ସାରା ରାତ୍ରି ଉଜାଗର ରହିଥିଲେ । ଏଥିସହିତ ଶୈବକ୍ଷେତ୍ର ସବୁ ନାନା ପ୍ରକାର ଆଲୋକମାଳାରେ ସଜ୍ଜିତ ହୋଇଥିଲା । ଅନେକ ଭକତ ଅଷ୍ଟଶମ୍ଭୁ ଦର୍ଶନ କରି ଶୈବ କୃପା ଲାଭ କରିଥିଲେ ।