21-Oct-2026

ଜନ ଆନ୍ଦୋଳନର ଯୁବ ନେତା ଲକ୍ଷ୍ମଣ ନାୟକ ଓ ଡା. ରାଣ୍ଡେଲଙ୍କ ଗିରଫଦାରୀକୁ ତୀବ୍ର ନିନ୍ଦା

ମାଳି ପାହାଡ଼ ସୁରକ୍ଷା ଆନ୍ଦୋଳନକୁ ଦମନ କରିବା ଅଭିଯୋଗ, ସମସ୍ତ ଆନ୍ଦୋଳନକାରୀ ନେତାଙ୍କ ମୁକ୍ତି ଦାବି

ଓଡିଶା ଜନମତ ରାୟଗଡା,୧୭/୧୦,

କାମେଶ୍ୱର କରକରିଆ :----

 ରାୟଗଡ଼ା ଓ କଳାହାଣ୍ଡି ଜିଲ୍ଲାରେ ଜଳ, ଜଙ୍ଗଲ, ଜମି ତଥା ପ୍ରାକୃତିକ ସମ୍ପଦର ସୁରକ୍ଷା ପାଇଁ ଚାଲିଥିବା ଜନ ଆନ୍ଦୋଳନର ଦୁଇ ଆଗଧାଡ଼ିର ସଦସ୍ୟ ଲକ୍ଷ୍ମଣ ନାୟକ ଓ ଯୁବ ଡାକ୍ତର ରାଣ୍ଡେଲ ସେକ୍ୟୁରାଙ୍କ ଗିରଫଦାରୀକୁ ବିଭିନ୍ନ ଗାନ୍ଧୀବାଦୀ ଓ ସର୍ବୋଦୟ ସଂଗଠନ ପକ୍ଷରୁ ତୀବ୍ର ନିନ୍ଦା କରାଯାଇଛି। ମାଳି ପାହାଡ଼ର ସୁରକ୍ଷା ପାଇଁ ଚାଲିଥିବା ଅହିଂସକ ଆନ୍ଦୋଳନକୁ ଦୁର୍ବଳ କରିବା ଉଦ୍ଦେଶ୍ୟରେ ଏପରି ପଦକ୍ଷେପ ନିଆଯାଇଥିବା ସଂଗଠନଗୁଡ଼ିକ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ରାୟଗଡ଼ା ଓ କଳାହାଣ୍ଡି ଜିଲ୍ଲାରେ ଅବସ୍ଥିତ ସିଜିମାଳି ଓ କୁଟ୍ରୁମାଳି ପାହାଡ଼କୁ ବେଦାନ୍ତ ଓ ଆଦାନୀ କମ୍ପାନୀ ହାତକୁ ଟେକି ନଦେବା ଦାବିରେ ‘ମାଆ ମାଳି ମାଟି ସୁରକ୍ଷା ମଞ୍ଚ’ ପକ୍ଷରୁ ଅହିଂସକ ସଂଗ୍ରାମ ଚାଲିଛି। ଏହି ଆନ୍ଦୋଳନର ଆଗଧାଡ଼ିର ଯୁବ ସାଥୀ ତଥା ବିପ୍ଳବୀ ସଙ୍ଗୀତର ଗାୟକ ଲକ୍ଷ୍ମଣ ନାୟକ ଦୀର୍ଘଦିନ ଧରି ଆଦିବାସୀଙ୍କ ଜୀବନଜୀବିକା, ଜଳ, ଜଙ୍ଗଲ, ଜମି ଓ ସେମାନଙ୍କ ପାରମ୍ପରିକ ସଂସ୍କୃତିର ସୁରକ୍ଷା ପାଇଁ ଆନ୍ଦୋଳନ ଚଳାଇ ଆସୁଥିବା କୁହାଯାଇଛି। ଏହି ସଂଗ୍ରାମ ପାଇଁ ସେ ପୂର୍ବରୁ ସାତ ମାସ ଜେଲ୍‌ରେ ରହିଥିବା ମଧ୍ୟ ପ୍ରକାଶ କରାଯାଇଛି। କୋଡ଼ିଙ୍ଗାମାଳି ଓ ମାଜିଙ୍ଗମାଳି ପାହାଡ଼ ଉପରେ କର୍ପୋରେଟ୍‌ ସଂସ୍ଥାଗୁଡ଼ିକର ନଜରକୁ ଦୃଷ୍ଟିରେ ରଖି ସେ ଆଦିବାସୀ ଅଞ୍ଚଳରେ ଲୋକଙ୍କୁ ସଂଗଠିତ କରିବାରେ ମଧ୍ୟ ସକ୍ରିୟ ଥିଲେ। ସେହିପରି ମହାରାଷ୍ଟ୍ରରୁ ଓଡ଼ିଶା ଆସି ଯାଜପୁରଠାରୁ କଳାହାଣ୍ଡି ପର୍ଯ୍ୟନ୍ତ ବିଭିନ୍ନ ଆଦିବାସୀ ଅଞ୍ଚଳରେ ଚିକିତ୍ସା ସେବା ଯୋଗାଇ ଆସୁଥିବା ଯୁବ ଡାକ୍ତର ରାଣ୍ଡେଲ ସେକ୍ୟୁରାଙ୍କୁ ମଧ୍ୟ ଗିରଫ କରାଯାଇଥିବା ଅଭିଯୋଗ ହୋଇଛି। ସେ ଆଦିବାସୀଙ୍କ ଅଧିକାର ଓ ଜୀବନଜୀବିକାର ସୁରକ୍ଷା ପ୍ରତି ସମର୍ପିତ ଥିବା ସଂଗଠନଗୁଡ଼ିକ କହିଛନ୍ତି। ଦୁଇ ବର୍ଷ ପୂର୍ବେ ରାୟଗଡ଼ା ଜିଲ୍ଲାରେ ମେଧା ପାଟକରଙ୍କ ଗସ୍ତ ସମୟରେ ଡା. ରାଣ୍ଡେଲଙ୍କ ସମେତ ୨୫ ଜଣଙ୍କ ଉପରେ ଦୁଇ ମାସ ପାଇଁ ଜିଲ୍ଲା ପ୍ରବେଶ ନିଷେଧାଜ୍ଞା ଲାଗୁ କରାଯାଇଥିବା କଥା ମଧ୍ୟ ବିବୃତିରେ ଉଲ୍ଲେଖ ରହିଛି। ସଂଗଠନଗୁଡ଼ିକର ଅଭିଯୋଗ ଅନୁସାରେ, ଗତ ଶୁକ୍ରବାର ରାତି ପ୍ରାୟ ୧୧ଟା ସମୟରେ ଭବାନୀପାଟଣାରେ ଡା. ରାଣ୍ଡେଲ ରହୁଥିବା ଭଡ଼ାଘରୁ ପୋଲିସ ଉଭୟଙ୍କୁ ଉଠାଇ ନେଇଥିଲା। ବିନା ୱାରେଣ୍ଟରେ ଗିରଫ କରାଯାଇଥିବା ନେଇ ମଧ୍ୟ ସେମାନେ ଅଭିଯୋଗ କରିଛନ୍ତି। ତେବେ ଗିରଫଦାରୀର କାରଣ, ଆଇନଗତ ଆଧାର ଓ ପୋଲିସର ପକ୍ଷ ସମ୍ପର୍କରେ ଏହି ବିବୃତିରେ ବିସ୍ତୃତ ତଥ୍ୟ ଦିଆଯାଇନାହିଁ। ଏହି ଘଟଣାକୁ ନେଇ ଗାନ୍ଧୀବାଦୀ ଓ ସର୍ବୋଦୟ ସଂଗଠନଗୁଡ଼ିକ କହିଛନ୍ତି ଯେ, ଅହିଂସକ ଉପାୟରେ ଜନସାଧାରଣଙ୍କ ଅଧିକାର ପାଇଁ ଲଢ଼ୁଥିବା ନେତାମାନଙ୍କୁ ଗିରଫ କରିବା ଗଣତାନ୍ତ୍ରିକ ଆନ୍ଦୋଳନକୁ ଦୁର୍ବଳ କରିବା ସହ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ାଇପାରେ। ଏହା ସହ ପୂର୍ବରୁ ଗିରଫ ହୋଇଥିବା ଆନ୍ଦୋଳନର ଅନ୍ୟ ନେତା ଲିଙ୍ଗରାଜ ଆଜାଦ, ହୀରାମଲ ନାୟକ ଏବଂ ନିୟମଗିରି ଆନ୍ଦୋଳନର ନେତା ଲଦ ସିକକାଙ୍କ ଗିରଫଦାରୀକୁ ମଧ୍ୟ ସେମାନେ ନିନ୍ଦା କରିଛନ୍ତି। ଉତ୍କଳ ଗାନ୍ଧୀ ସ୍ମାରକ ନିଧି, ଗାନ୍ଧୀ ଶାନ୍ତି ପ୍ରତିଷ୍ଠାନ, ଉତ୍କଳ ସର୍ବୋଦୟ ମଣ୍ଡଳ, ବାଜି ରାଉତ ଛାତ୍ରାବାସ, ଲୋହିଆ ଏକାଡେମୀ ଓ ରାଷ୍ଟ୍ରୀୟ ଯୁବା ସଂଗଠନ ସମେତ ବିଭିନ୍ନ ସଂଗଠନର ପ୍ରତିନିଧିମାନେ ଏହି ଗିରଫଦାରୀର ନିନ୍ଦା କରିଛନ୍ତି। ଉତ୍କଳ ଗାନ୍ଧୀ ସ୍ମାରକ ନିଧିର ସଭାନେତ୍ରୀ କୃଷ୍ଣା ମହାନ୍ତି, ସାଧାରଣ ସମ୍ପାଦକ ଜୟନ୍ତ କୁମାର ଦାସ, ଆଡଭୋକେଟ୍‌ କବୀର କୁମାର ଜେନା, ଗାନ୍ଧୀ ଶାନ୍ତି ପ୍ରତିଷ୍ଠାନର ସଭାପତି ଜଷ୍ଟିସ୍‌ ମନୋରଞ୍ଜନ ମହାନ୍ତି, ବିରୂପାକ୍ଷ ତ୍ରିପାଠୀ, ହରିହର ସେନ, ଡା. ବିଶ୍ୱଜିତ, ମିହିର ପ୍ରତାପ ଦାସ, ଆର୍ଯ୍ୟଭଟ୍ଟ ମହାନ୍ତି, ଅନ୍ତର୍ଯ୍ୟାମୀ ବରାଳ, ଦେବପ୍ରସାଦ ରାୟ, ସୂର୍ଯ୍ୟନାରାୟଣ ନାଥ, ଆଦ୍ୟଶ୍ଳୋକ ମିଶ୍ର ଓ ସାଗର ଦାସ ପ୍ରମୁଖ ଏହି ଦାବି ଉଠାଇଛନ୍ତି। ସମସ୍ତ ଜନ ଆନ୍ଦୋଳନର ନେତାଙ୍କୁ ତୁରନ୍ତ ମୁକ୍ତ କରିବା ସହ ଓଡ଼ିଶାର ପ୍ରାକୃତିକ ସମ୍ପଦକୁ କର୍ପୋରେଟ୍‌ ସଂସ୍ଥାଗୁଡ଼ିକର କବଳରୁ ସୁରକ୍ଷା ଦେବାକୁ ସଂଗଠନଗୁଡ଼ିକ ସରକାରଙ୍କୁ ଆହ୍ୱାନ ଦେଇଛନ୍ତି।