Odisha Janamata : ନିୟମ ଗିରିରେ ହାତୀ ଉପଦ୍ରଵଯୋଗୁଁ ନିମାଙ୍ଗ ଝୋଲାରେ ତିନି ପରିବାର କ୍ଷତିଗ୍ରସ୍ତ |

ନିୟମ ଗିରିରେ ହାତୀ ଉପଦ୍ରଵଯୋଗୁଁ ନିମାଙ୍ଗ ଝୋଲାରେ ତିନି ପରିବାର କ୍ଷତିଗ୍ରସ୍ତ |

17-May-2026

ନିୟମଗିରିରେ ହାତୀ ଉପଦ୍ରବ, ନିମାଙ୍ଗଝୋଲାରେ ୩ ପରିବାର କ୍ଷତିଗ୍ରସ୍ତ,
ଓଡିଶା ଜନମତ ରାୟଗଡା, ୧୭/୦୫,

କାମେଶ୍ୱର କରକରିଆ: -----

ନିୟମଗିରି ଅଞ୍ଚଳରେ ପୁଣିଥରେ ଦେଖାଦେଇଛି ହାତୀ ଆତଙ୍କ। ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ପାର୍ସଲି ପଞ୍ଚାୟତର ନିମାଙ୍ଗଝୋଲା ଗାଁରେ ଗତ ରାତି ପ୍ରାୟ ୧୨ଟା ସମୟରେ ଦଶଟି ହାତୀର ଏକ ପଲ ଗାଁକୁ ପ୍ରବେଶ କରି ୩ଟି ଘର ଭାଙ୍ଗିବା ସହ ଖାଦ୍ୟ ଶସ୍ୟ ଓ ଘରୋଇ ସାମଗ୍ରୀ ନଷ୍ଟ କରିଦେଇଥିବା ଅଭିଯୋଗ ହୋଇଛି। ହାତୀ ଉପଦ୍ରବରେ ଭୟଭୀତ ହୋଇ ଗାଁ ଲୋକେ ଘର ଛାଡି ପଳାଇ ଯାଇଥିଲେ।ସୂଚନା ଅନୁଯାୟୀ, ହାତୀମାନେ ଗାଁର କିଛି ଘର ଭାଙ୍ଗିବା ସହ ଘରେ ସଂଚିତ ରଖାଯାଇଥିବା ଧାନ ଓ ଅନ୍ୟାନ୍ୟ ଖାଦ୍ୟ ଶସ୍ୟ ନଷ୍ଟ କରିଦେଇଥିଲେ। ଏପରିକି ଘରେ ଥିବା ହାଣ୍ଡି, ଡେକିଚି ଚାପିଦେବା ସହ ସଂଗୃହିତ ଆମ୍ବ ମଧ୍ୟ ନଷ୍ଟ କରିଥିବା ଜଣାପଡିଛି। ହାତୀର ଗର୍ଜନ ଓ ଉପଦ୍ରବ ଶୁଣି ଗାଁ ଲୋକେ ଭୟଭୀତ ହୋଇ ଘର ଛାଡି ଦୌଡ଼ି ପଳାଇଥିଲେ। ଫଳରେ ଏକ ବଡ଼ ଅଘଟଣାରୁ ଲୋକେ ଅଳ୍ପକେ ବର୍ତ୍ତିଯାଇଥିବା କୁହାଯାଉଛି।ଏହି ହାତୀ ଉପଦ୍ରବରେ କଚାଡି ଶିକକା, ରୁପୁଳି ଶିକକା, ମଝିବେଣି ଶିକକା, ଆନ୍ଦ୍ରୁ ଶିକକା, ରେଲି ଶିକକା ଓ ରାଜୁ ଶିକକାଙ୍କ ପରିବାର କ୍ଷତିଗ୍ରସ୍ତ ହୋଇଥିବା ଜଣାପଡିଛି।ସେହିପରି ନିୟମଗିରି ଅଞ୍ଚଳର କରପା ପଞ୍ଚାୟତର ବିଜୟନଗର, ଅଜୟଗଡ଼, ମୁତକୁଣି, ଖମ୍ବେସୀକଣା ଓ ସଦଳସ ଭଳି ଗାଁଗୁଡ଼ିକରେ ମଧ୍ୟ ହାତୀ ରହିଥିବାରୁ ଲୋକେ ଭୟ ଭିତରେ ରହିଥିବା ସୂଚନା ମିଳିଛି। ଗାଁରେ ପୁଣିଥରେ ହାତୀ ଆସିବା ଭୟରେ ଲୋକମାନେ ଆତଙ୍କିତ ଅବସ୍ଥାରେ ରହିଛନ୍ତି।ଏ ସମ୍ପର୍କରେ ବନାଞ୍ଚଳ ଅଧିକାରୀ ସଚ୍ଚିଦାନନ୍ଦ ପରିଡାଙ୍କୁ ଯୋଗାଯୋଗ କରିବାରୁ ସେ କହିଛନ୍ତି ଯେ, “ଆମ୍ବ ଓ ପଣସ ଖାଇବା ପାଇଁ ହାତୀମାନେ ପଦାକୁ ଆସୁଛନ୍ତି। ବନ ବିଭାଗ ସ୍କ୍ୱାଡ଼ ପକ୍ଷରୁ ନଜର ରଖାଯାଇଛି। କ୍ଷୟକ୍ଷତି ହୋଇଥିବା ପରିବାରଙ୍କୁ ସହାୟତା ଯୋଗାଇ ଦିଆଯିବ।”