Odisha Janamata : ଜଙ୍ଗଲ ଜମିକୁ ନେଇ ବଚସା ପରେ ଦାଆ ରେ ବୃଦ୍ଧାଙ୍କୁ ଆକ୍ରମଣ ||

ଜଙ୍ଗଲ ଜମିକୁ ନେଇ ବଚସା ପରେ ଦାଆ ରେ ବୃଦ୍ଧାଙ୍କୁ ଆକ୍ରମଣ ||

13-May-2026

ଡଙ୍ଗର ଜମିକୁ ନେଇ ବଚସା, ଦା ଆକ୍ରମଣରେ ବୃଦ୍ଧ ଲହୁଲୁହାଣ,
ଓଡିଶା ଜନ ମତ,କଲ୍ୟାଣସିଂହପୁର,

କାମେଶ୍ୱର କର କରିଆ ୧୩/୦୫,:----

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସିକରପାଇ ପଞ୍ଚାୟତ ଅନ୍ତର୍ଗତ କାଣିପାଇ ଗାଁରେ ଡଙ୍ଗର ଜମିକୁ ନେଇ ହୋଇଥିବା ବଚସା ହଣାକଟାର ରୂପ ନେଇଛି। ଦା ଆକ୍ରମଣରେ ଜଣେ ୬୦ ବର୍ଷୀୟ ବୃଦ୍ଧ ଗୁରୁତର ଆହତ ହୋଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସାଧୀନ ଅଛନ୍ତି।ସୂଚନା ଅନୁସାରେ ଗତ ସନ୍ଧ୍ୟା ପ୍ରାୟ ୭ଟା ସମୟରେ ବୋଡା କାଡ୍ରାକା ଓ ଗୋପି କଞ୍ଜାକା ଏକାଠି ବସି ମଦ୍ୟପାନ କରୁଥିବା ବେଳେ ଡଙ୍ଗର ଜମିକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏହି ବିବାଦକୁ କେନ୍ଦ୍ର କରି ଆଜି ସକାଳେ ବୋଡା କାଡ୍ରାକା ନିଜ ସ୍ତ୍ରୀ ଆଞ୍ଚ କାଡ୍ରାକାଙ୍କ ସହ ଡଙ୍ଗରକୁ ଯାଉଥିବା ସମୟରେ ଘଟିଥିଲା ଆକ୍ରମଣ।ଅଭିଯୋଗ ଅନୁଯାୟୀ ଗୋପି କଞ୍ଜାକାଙ୍କ ଭାଇ ଶୁକ୍ରୁ କଞ୍ଜାକା ପୂର୍ବରୁ ଲୁଚି ରହିଥିଲେ। ବୋଡାଙ୍କୁ ଦେଖି ହଠାତ୍ ବାହାରି ଆସି ଗାଳିଗୁଳଜ କରିବା ସହ ଦୁଇ ଚାପୁଡ଼ା ମାରିଥିଲେ। ପରେ ବୋଡାଙ୍କ ହାତରେ ଥିବା ଦା’ ଛଡାଇ ତାଙ୍କ ମୁଣ୍ଡ ଓ ଡାହାଣ ହାତରେ ଆକ୍ରମଣ କରିଥିବା ଅଭିଯୋଗ ହୋଇଛି। ଘଟଣା ସମୟରେ ସ୍ତ୍ରୀ ଆଞ୍ଚ କାଡ୍ରାକା ସ୍ୱାମୀଙ୍କୁ ବଞ୍ଚାଇବାକୁ ଚେଷ୍ଟା କରି ଚିତ୍କାର କରିବାରୁ ଗ୍ରାମବାସୀ ଧାଇଁ ଆସି ଅଭିଯୁକ୍ତଙ୍କ ଠାରୁ ଦା’ ଛଡାଇଥିଲେ। ଗୁରୁତର ଆହତ ବୋଡା କାଡ୍ରାକାଙ୍କୁ ତୁରନ୍ତ କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣାଯାଇଥିଲା।ଡାକ୍ତର ଅନୁଭବ ସାହୁ ତାଙ୍କର ଚିକିତ୍ସା କରୁଥିବା ବେଳେ ମୁଣ୍ଡ ଓ ହାତରେ ଗଭୀର ଆଘାତ ଲାଗିଥିବା ସୂଚନା ମିଳିଛି। ଏହି ଘଟଣାକୁ ନେଇ ଥାନାରେ ଏତଲା ଦାଖଲ ହୋଇଥିବା ବେଳେ ଆକ୍ରାନ୍ତ ପରିବାର ପକ୍ଷରୁ ନ୍ୟାୟ ଦାବି କରାଯାଇଛି।