Odisha Janamata : ଖଲ୍ଲିକୋଟ ର ବାବା ବରାଳ ବାଲୁଙ୍କେଶ୍ୱର ପୀଠରେ ନାଗ ଚତୁର୍ଥୀ ପୂଜା ଅନୁଷ୍ଠିତ |

ଖଲ୍ଲିକୋଟ ର ବାବା ବରାଳ ବାଲୁଙ୍କେଶ୍ୱର ପୀଠରେ ନାଗ ଚତୁର୍ଥୀ ପୂଜା ଅନୁଷ୍ଠିତ |

25-Oct-2025

ବାବା ବରାଳ ବାଲୁଙ୍କେଶ୍ୱର ପୀଠରେ ନାଗ ଚତୁର୍ଥୀ ପୂଜା ଅନୁଷ୍ଠିତ, ଶତାଧିକ ଭକ୍ତ ଙ୍କ ସମାଗମ।
--------------------------
ଖଲ୍ଲିକୋଟ ୨୫-୧୦-୨୦୨୫()ଖଲ୍ଲିକୋଟ ସହର ସ୍ଥିତ ବାବା ବରାଳ ବାଲୁଙ୍କେଶ୍ୱର ପୀଠରେ ନାଗ ଚତୁର୍ଥୀ ପୂଜା କାର୍ତ୍ତିକ ଶୁକ୍ଳ ଚତୁର୍ଥ ରେ ଅନୁଷ୍ଠିତ ହୋଇଯାଇଛି । ଶନିବାର ଦିନ ବାବା ବରାଳ ବାଲୁଙ୍କେଶ୍ୱର ପୀଠରେ ନାଗ ଚତୁର୍ଥୀ ପୂଜା କରିବା ପାଇଁ ଶତାଧିକ ଭକ୍ତ ଙ୍କ ସମାଗମ ହୋଇଥିବା ଦେଖିବାକୁ ମିଳିଛି । ସର୍ପ ପୂଜାର ପରମ୍ପରା ବହୁ ପ୍ରାଚୀନ l ନାଗପୂଜା ତାମିଲ ଏବଂ ତେଲୁଗୁ ସମ୍ପ୍ରଦାୟ ଭିତରେ ବହୁଳ ପ୍ରସାର ଲାଭ କରିଛି l ଏହି ପରମ୍ପରାରେ ଗୋଟିଏ ପୂଜା ହେଲା କାର୍ତ୍ତିକ ଶୁକ୍ଳ ପକ୍ଷ ଚତୁର୍ଥୀ ଦିନ ନାଗ ଦେବତାଙ୍କ ପୂଜା ହୋଇଥାଏ। ନାଗପୁଜନ ହିନ୍ଦୁନାରୀମାନଙ୍କ ଅନ୍ୟତମ ପ୍ରଧାନ ବ୍ରତ l ସନ୍ତାନ ଏବଂ ଐଶ୍ଵର୍ଯ୍ୟପ୍ରାପ୍ତି କାମନା କରି ମହିଳା ମାନେ ଏହି ନାଗଚତୁର୍ଥୀ ବ୍ରତ ପାଳନ କରିଥାନ୍ତି l ସାଧାରଣତଃ କିଛି ମହିଳା ଏକତ୍ରିତ ହୋଇ ଏହି ବ୍ରତକୁ ଏକ ଓଷାଭାବେ ପାଳନ କରିଥାନ୍ତି l ଏହି ପୂଜାରେ ଅରୁଆ ଚାଉଳ, ବିରି, ମୁଗଚୁନା ସହିତ ଛେନା, ଗୁଡ଼,ଘିଅ, ନଡ଼ିଆ ମିଶାଇ ଭୋଗ ପ୍ରସ୍ତୁତ କରାଯାଏ l ବ୍ରତଧାରୀ ମାନେ ସ୍ନାନ ସାରି ନୂତନ ବସ୍ତ୍ର ପରିଧାନ କରି ପୂଜା ସ୍ଥାନକୁ ଲିପି ପରିଷ୍କାର କରି ଆସ୍ଥାନ ପ୍ରସ୍ତୁତକରିଥାନ୍ତି l ପୁରୋହିତ ତମ୍ବା, ପିତଳ, ସୁନା, ରୁପା ଇତ୍ୟାଦି ଧାତୁ ନିର୍ମିତ ନାଗ ମାନଙ୍କୁ ହଳଦୀ ପାଣିରେ ସ୍ନାନ କରାଇ ଆସ୍ଥାନ ଉପରେ ନୂତନବସ୍ତ୍ର ଉପରେ ସ୍ଥାପନ କରିଥାନ୍ତି l ସର୍ପ ମାନଙ୍କୁ ଫୁଲ ଚନ୍ଦନ ସିନ୍ଦୁର ଲଗାଇ ବେଶ କରାଯାଏ l ଆସ୍ଥାନ ନିକଟରେ ଉଈହୁଙ୍କା ଖଣ୍ଡେ ରଖି ତାକୁ ଚନ୍ଦନ, ସିନ୍ଦୁର, ଫୁଲ ଦେଇ ସଜାଇ ଦିଆଯାଏ l ପୁରୋହିତ ପୂଜାକରି,ଭୋଗ ଲଗାଇ ନାଗ ଚତୁର୍ଥୀ ମାହାତ୍ମ୍ୟ ପାଠ କରନ୍ତି l ଏହି ପୂଜା ସାଧାରଣତଃ ଅପରାହ୍ନ ସମୟରେ କରା ଯାଇ ଥାଏ l