Odisha Janamata : ଆରାଡୁଲ ଘାଟିରେଦୁର୍ଘଟଣା ଘଟି 40ଫୁଟ ତଳକୁ ଖସିଲା ବାଇକ |

ଆରାଡୁଲ ଘାଟିରେଦୁର୍ଘଟଣା ଘଟି 40ଫୁଟ ତଳକୁ ଖସିଲା ବାଇକ |

01-Aug-2026

ଆରାଡୁଲ୍ ଘାଟିରେ ମର୍ମନ୍ତୁଦ ସଡ଼କ ଦୁର୍ଘଟଣା: ୪୦ ଫୁଟ ତଳକୁ ଖସିଲା ବାଇକ୍, ଜଣେ ମୃତ, ଜଣେ ଗୁରୁତର

ଓଡିଶା ଜନମତ ରାୟଗଡା, ୦୧/୮,

କାମେଶ୍ୱର କରକରିଆ:------

ରାୟଗଡ଼ା ଜିଲ୍ଲା ପୁଟାସିଂ ଥାନା ଅନ୍ତର୍ଗତ ଆରାଡୁଲ୍ ଘାଟିରେ ଶନିବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ବାଇକ୍ ଭାରସାମ୍ୟ ହରାଇ ପ୍ରାୟ ୪୦ ଫୁଟ ତଳକୁ ଖସିପଡ଼ିବାରୁ ଜଣେ ଯୁବକଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ମୃତକ ହେଲେ ଗଜପତି ଜିଲ୍ଲା କାଶୀନଗର ବ୍ଲକ ଅନ୍ତର୍ଗତ ଅରମଡା ଗ୍ରାମର ପ୍ରଦୀପ କୁମାର ଲିମା (୩୦)। ଗୁରୁତର ଆହତ ହୋଇଥିବା ଯୁବକ ହେଲେ କେନ୍ଦ୍ରାପଡ଼ା ଜିଲ୍ଲାର ଅଶ୍ୱିନୀ ଜେନା (୩୪)। ସୂଚନା ଅନୁଯାୟୀ, ଉଭୟ ଗୁଣପୁରସ୍ଥିତ ଆର୍.କେ. ଟେଣ୍ଟ ହାଉସରେ କର୍ମଚାରୀ ଭାବେ କାର୍ଯ୍ୟରତ ଥିଲେ। ବକେୟା ଟଙ୍କା ଆଦାୟ ପାଇଁ ସେମାନେ ବାଇକ୍ ଯୋଗେ ସର୍ଗୀଆସିଂ ଗ୍ରାମକୁ ଯାଉଥିବା ବେଳେ ଆରାଡୁଲ୍ ଘାଟିରେ ବାଇକ୍‌ଟି ଭାରସାମ୍ୟ ହରାଇ ପ୍ରାୟ ୪୦ ଫୁଟ ତଳକୁ ଖସିପଡ଼ିଥିଲା। ଫଳରେ ଉଭୟ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ଉଭୟଙ୍କୁ ଉଦ୍ଧାର କରାଯାଇ ଗୁଣପୁର ଉପଖଣ୍ଡ ସ୍ତରୀୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଡାକ୍ତର ପ୍ରଦୀପ କୁମାର ଲିମାଙ୍କୁ ମୃତ ଘୋଷଣା କରିଥିବାବେଳେ ଅଶ୍ୱିନୀ ଜେନାଙ୍କର ଚିକିତ୍ସା ଜାରି ରହିଛି। ଖବର ପାଇ ପୁଟାସିଂ ପୁଲିସ ଘଟଣାସ୍ଥଳରେ ପହଞ୍ଚି ବାଇକ୍‌କୁ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି। ଦୁର୍ଘଟଣାର ପ୍ରକୃତ କାରଣ ନେଇ ତଦନ୍ତ ଚାଲିଥିବା ପୁଟାସିଂ ଥାନା ଅଧିକାରୀ ବିନ୍ଦୁଲତା ନାୟକ ସୂଚନା ଦେଇଛନ୍ତି। ଏହି ଅକାଳ ଦୁର୍ଘଟଣା ପରେ ଅଞ୍ଚଳରେ ଶୋକର ଛାୟା ଖେଳିଯାଇଛି।