Odisha Janamata : ଏସ ଆର କେ ଏନ ୟୁ ବି କେନ୍ଦୁବାଡି ପକ୍ଷରୁ 77ତମ ବନ ମହୋତ୍ସବ ଅନୁଷ୍ଠିତ ||

ଏସ ଆର କେ ଏନ ୟୁ ବି କେନ୍ଦୁବାଡି ପକ୍ଷରୁ 77ତମ ବନ ମହୋତ୍ସବ ଅନୁଷ୍ଠିତ ||

16-Jul-2026

ଏସଆରକେଏନୟୁବି କେନ୍ଦୁବାଡ଼ି ପକ୍ଷରୁ ୭୭ ତମ ବନମହୋତ୍ସବ
(ବୃକ୍ଷରୋପଣ ଜୀବନର ମୂଳ ଆଧାର ହେଉ ବୋଲି ଅତିଥିଙ୍କ ମନ୍ତବ୍ୟ)

ଓଡ଼ିଶା ଜନମତ,ପୋଲସରା,ସନ୍ତୋଷ କୁମାର ପଣ୍ଡା
୧୬/୦୭/୨୦୨୬ ;---------

ପୋଲସରା ବ୍ଲକ୍ କେନ୍ଦୁବାଡ଼ି ପଞ୍ଚାୟତ ସ୍ଥିତ ଶ୍ରୀ ରାଧାକୃଷ୍ଣ ନୋଡାଲ ଉଚ୍ଚ ବିଦ୍ୟାଳୟ ପକ୍ଷରୁ ୧୫ ତାରିଖ ବୁଧବାର ଦିନ ୭୭ ତମ ବନ ମହୋତ୍ସବ ପ୍ରଧାନ ଶିକ୍ଷକ ବିପିନ ବିହାରୀ ସାହୁଙ୍କ ପ୍ରତ୍ୟକ୍ଷ ତତ୍ୱାବଧାନ ଏବଂ ପ୍ରକୃତି ବନ୍ଧୁ ପୁରସ୍କାରପ୍ରାପ୍ତ ବରିଷ୍ଠ ହିନ୍ଦି ଶିକ୍ଷକ ହେମନ୍ତ କୁମାର ନାୟକଙ୍କ ବଳିଷ୍ଠ ନେତୃତ୍ୱରେ ପାଳନ କରାଯାଇଥିଲା।ଏଥିରେ ଘୁମୁସର ଦକ୍ଷିଣ ବନଖଣ୍ଡ ଭଞ୍ଜନଗରର ସହକାରୀ ବନ ସଂରକ୍ଷଣ ଅଧିକାରୀ ପ୍ରଦୀପ କୁମାର ବେହେରା ମୁଖ୍ୟ ଅତିଥିଭାବେ ଯୋଗଦାନ ଦେଇ ପ୍ରଦୀପ ପ୍ରଜ୍ୱଳନ ପୂର୍ବକ କାର୍ଯ୍ୟକ୍ରମର ଶୁଭ ଉଦଘାଟନ କରିଥିବାବେଳେ ସ୍ୱତନ୍ତ୍ର ବକ୍ତାଭାବେ ଉକ୍ତ ବନଖଣ୍ଡର ପୂର୍ବତନ ବନାଞ୍ଚଳ ଅଧିକାରୀ ତଥା ବର୍ତ୍ତମାନ ବନ୍ୟପ୍ରାଣୀ ତତ୍ତ୍ୱାବଧାରକ ଅନୁପମ ବାନାର୍ଜୀ ଉକ୍ତ ଶିକ୍ଷାନୁଷ୍ଠାନର ଅବସରପ୍ରାପ୍ତ ଶିକ୍ଷକ ଶିକ୍ଷକ ସୂର୍ଯ୍ୟମଣି ମହାନ୍ତି ମୁଖ୍ୟବକ୍ତା ଏବଂ ପୋଲସରା ବନାଞ୍ଚଳ ଅଧିକାରୀ ଅନୀଲ କୁମାର ପଣ୍ଡା, ସରପଂଚଙ୍କ ସ୍ୱାମୀ ତଥା ପୂର୍ବତନ ସରପଞ୍ଚ ବିଜୟ କୁମାର ସ୍ୱାଇଁ, ଅବସରପ୍ରାପ୍ତ ଶିକ୍ଷକ ଅନ୍ତର୍ଯ୍ୟାମୀ ସ୍ୱାଇଁ ଓ ପୋଲସରା ବନପାଳ ମୁନା ଦାସ ପ୍ରମୁଖ ସମ୍ମାନିତ ଅତିଥିଭାବେ ଯୋଗଦେଇଥିଲେ।
ଏହି ଅବସରରେ ବୃକ୍ଷ ବିନା ଜୀବନର କୌଣସି ସତ୍ତା ନାହିଁ ଏଣୁ ଦୈନନ୍ଦିନ ଜୀବନରେ ବୃକ୍ଷ ରୋପଣ ଓ ତାର ଯତ୍ନ ନେଇ ସମଗ୍ର ବିଶ୍ୱକୁ ବଞ୍ଚାଇବାକୁ ସମସ୍ତେ ଆଗେଇ ଆସିବାକୁ ଅତିଥିବୃନ୍ଦ ଉପସ୍ଥିତ ସମସ୍ତଙ୍କୁ ଆହ୍ୱାନ ଦେଇଥିଲେ।ଏହା ପୂର୍ବରୁ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀଙ୍କ ସମେତ ଛାତ୍ରଛାତ୍ରୀମାନଙ୍କୁ ନେଇ ଏକ ବିରାଟ ସଚେତନତା ଶୋଭାଯାତ୍ରା କରାଯିବା ସହ ସମଗ୍ର କେନ୍ଦୁବାଡ଼ି ଗ୍ରାମବାସୀଙ୍କୁ ଚାରା ବଣ୍ଟନ କରାଯାଇଥିବା ବେଳେ ବିଦ୍ୟାଳୟ ହତା ମଧ୍ୟରେ ଅତିଥିମାନେ ଚାରା ରୋପଣ କରି ଉତ୍ସାହିତ କରିଥିଲେ। ପରେ ଛାତ୍ରଛାତ୍ରୀମାନେ ଚାରା ରୋପଣ କରିଥିଲେ। ଏହି ଅବସରରେ ଛାତ୍ରଛାତ୍ରୀମାନଙ୍କୁ ନେଇ କରାଯାଇଥିବା ଭାଷଣ ଓ ଚିତ୍ରାଙ୍କନ ପ୍ରତିଯୋଗିତାର କୃତିତ୍ୱ ପ୍ରତିଯୋଗୀମାନଙ୍କୁ ଅନୁଷ୍ଠାନ ପକ୍ଷରୁ ସମସ୍ତ ଅତିଥିମାନେ ମାନପତ୍ର ଏବଂ ପୁରସ୍କାର ପ୍ରଦାନ କରିବା ସହିତ ସେମାନଙ୍କର ଭବିଷ୍ୟତ ଉଜ୍ଜଳ ଏବଂ ଉତ୍ତରୋତ୍ତର ଶୁଭ କାମନା ଜଣାଇଥିଲେ। |ଏହି କାର୍ଯ୍ୟକ୍ରମକୁ ଆହୁରି ଅଧିକ ସଚେତନ ଏବଂ ସ୍ମରଣୀୟ କରିବା ମହତ୍ ଉଦ୍ଦେଶ୍ୟ ନେଇ ଛାତ୍ରଛାତ୍ରୀମାନେ ବୃକ୍ଷ ରୋପଣ ଓ ପରିବେଶ ସୁରକ୍ଷା ବିଷୟ ଉପରେ ଆଧାରିତ ସଚେତନତା ମୂଳକ ସାଂସ୍କୃତିକ କାର୍ଯ୍ୟକ୍ରମ କରି ସମସ୍ତଙ୍କ ଠାରୁ ଭୂରି ଭୂରି ପ୍ରଂଶସା ସାଉଁଟିଥିଲେ। ଶେଷରେ ଏହି କଲ୍ୟାଣ ଏବଂ ପ୍ରେରଣାଦାୟୀ କାର୍ଯ୍ୟକ୍ରମରେ ଉପସ୍ଥିତ ରହି ସହଯୋଗ କରିଥିବା ସମସ୍ତ ଅତିଥି ବୃନ୍ଦ,କର୍ମଚାରୀ, ଅଭିଭାବକମଣ୍ଡଳୀ,ପରିଚାଳନା କମିଟି ବୃନ୍ଦ ଏବଂ ଛାତ୍ରଛାତ୍ରୀମାନଙ୍କୁ ପ୍ରଧାନ ଶିକ୍ଷକ ମହୋଦୟ ଅନୁଷ୍ଠାନ ତରଫରୁ ଆନ୍ତରିକ ଧନ୍ୟବାଦ୍ ଏବଂ କୃତଜ୍ଞତା ଜଣାଇଥିଲେ।