Odisha Janamata : କଲ୍ୟାଣ ସିଂହପୁର ଲେମ୍ସ ଘୋଟଲା, ନୂତନ ଏମଡି ନିଯୁକ୍ତି ଦାବିରେ ଏମାରଜୀନ୍ସ ବୈଠକ |

କଲ୍ୟାଣ ସିଂହପୁର ଲେମ୍ସ ଘୋଟଲା, ନୂତନ ଏମଡି ନିଯୁକ୍ତି ଦାବିରେ ଏମାରଜୀନ୍ସ ବୈଠକ |

14-May-2026

କଲ୍ୟାଣସିଂହପୁର ଲେମ୍ପ୍ସ୍‌ ଘୋଟାଲା : ନୂତନ ଏମଡି ନିଯୁକ୍ତି ଦାବିରେ ଜରୁରୀକାଳୀନ ବୈଠକ, କୋଟିଏ ଟଙ୍କା ଦୁର୍ନୀତି ସନ୍ଦେହ; ଭିଜିଲାନ୍ସ ତଦନ୍ତ ଜାରି
ଓଡିଶା ଜନ ମତ,କଲ୍ୟାଣସିଂହପୁର,

କାମେଶ୍ୱର କର କରିଆ ତା --14/05/26:---
ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ମହୁମାର ସମବାୟ ସମିତି (ଲେମ୍ପ୍ସ୍‌) ରେ ଚର୍ଚ୍ଚିତ ଆର୍ଥିକ ଘୋଟାଲା ଘଟଣାକୁ ନେଇ ପୁଣିଥରେ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଲେମ୍ପ୍ସ୍‌ର ନୂତନ ଏମଡି ଭାବେ ସିଲା ନିରଞ୍ଜନଙ୍କୁ ସମ୍ପୂର୍ଣ୍ଣ ଦାୟିତ୍ୱ ଦେବା ଦାବିରେ ଆଜି ଆଇବି ଡାକ ବଙ୍ଗଳା ଠାରେ ଏକ ଜରୁରୀକାଳୀନ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ଲେମ୍ପ୍ସ୍‌ ସଦସ୍ୟମାନେ ସହକାରୀ ବିଭାଗକୁ ଶୀଘ୍ର ପଦକ୍ଷେପ ନେବା ସହ ସମସ୍ତ ଲେମ୍ପ୍ସ୍‌ ରେକର୍ଡ ନୂତନ ଦାୟିତ୍ୱପ୍ରାପ୍ତ ଅଧିକାରୀଙ୍କୁ ହସ୍ତାନ୍ତର କରିବାକୁ ଦାବି କରିଥିବା ସୂଚନା ମିଳିଛି।ସୂଚନାଯୋଗ୍ୟ ଯେ, ଲେମ୍ପ୍ସ୍‌ ଅଧିକାରୀ ତାରିଣୀ ପ୍ରସାଦ ତ୍ରିପାଠୀଙ୍କ ବିରୋଧରେ ଚାଷୀମାନଙ୍କ ଜମା ଟଙ୍କା ଆତ୍ମସାତ୍ କରିଥିବା ଗୁରୁତର ଅଭିଯୋଗ ଆସିଥିଲା। ଶନିବାର ସକାଳେ ସହକାରୀ ବିଭାଗର ଏଆରସିଏସ ଟିମ୍‌ ଅଚମ୍କା ଚଢ଼ାଉ କରି ତଦନ୍ତ ଆରମ୍ଭ କରିଥିଲେ। ପ୍ରଥମ ଦିନର ପ୍ରାଥମିକ ଯାଞ୍ଚରେ ପ୍ରାୟ ୬୦ ଲକ୍ଷ ଟଙ୍କା ହଡପ ହୋଇଥିବା ଜଣାପଡ଼ିଥିଲା। ପରେ ନଥିପତ୍ର ଯାଞ୍ଚରେ ଏହି ପରିମାଣ ବଢ଼ି ୭୫ ଲକ୍ଷ ଟଙ୍କାକୁ ପହଞ୍ଚିଥିବା ଏଆରସିଏସ ଜନ୍ମଞ୍ଜୟ ମହାପାତ୍ର ସୂଚନା ଦେଇଛନ୍ତି।ତେବେ ଏହା କେବଳ ଆରମ୍ଭିକ ତଥ୍ୟ ହୋଇଥିବାରୁ ତଦନ୍ତ ଜାରି ରହିଛି ଏବଂ ଆଗାମୀ ଦିନରେ ଆହୁରି ବଡ଼ ତଥ୍ୟ ସାମ୍ନାକୁ ଆସିପାରେ ବୋଲି ତଦନ୍ତକାରୀ ଅଧିକାରୀମାନେ କହିଛନ୍ତି। ଘଟଣା ପରେ ତାରିଣୀ ପ୍ରସାଦ ତ୍ରିପାଠୀଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଥିଲେ ମଧ୍ୟ ସିଲା ନିରଞ୍ଜନଙ୍କୁ ସମ୍ପୂର୍ଣ୍ଣ ଏମଡି ଦାୟିତ୍ୱ ଦିଆଯାଇନଥିବାରୁ ଲେମ୍ପ୍ସ୍‌ କାର୍ଯ୍ୟ ପ୍ରଭାବିତ ହେଉଥିବା ସଦସ୍ୟମାନେ ଅଭିଯୋଗ କରିଛନ୍ତି।
ଏହାସହ ବର୍ତ୍ତମାନ ପର୍ଯ୍ୟନ୍ତ ସମସ୍ତ ହିସାବ ମେଳ ଖାଇନଥିବାରୁ କୋଟିଏ ଟଙ୍କାରୁ ଅଧିକ ଦୁର୍ନୀତି ହୋଇଥିବା ସନ୍ଦେହ ବଢ଼ିଛି। ତଦନ୍ତ ସମୟରେ ନିଜ ପିତା-ମାତା, ଭାଇ-ଭଉଣୀଙ୍କ ନାମରେ ଲକ୍ଷାଧିକ ଟଙ୍କା ଉଠାଯାଇଥିବା ସୂଚନା ମିଳିଥିବାବେଳେ କିଛି ଲେମ୍ପ୍ସ୍‌ ସଦସ୍ୟଙ୍କ ଋଣ ଖାତାରୁ ମଧ୍ୟ ଟଙ୍କା ଉଠାଯାଇଥିବା ଅଭିଯୋଗ ଆସିଛି। ଏହାକୁ ନେଇ ଅଞ୍ଚଳରେ ଅସନ୍ତୋଷ ବଢ଼ିଥିବାବେଳେ ଆଦିବାସୀ ଅଞ୍ଚଳର ଲୋକେ ନିରପେକ୍ଷ ଭିଜିଲାନ୍ସ ତଦନ୍ତ ସହ ସମ୍ପୂର୍ଣ୍ଣ ସତ୍ୟ ଶୀଘ୍ର ସାମ୍ନାକୁ ଆଣିବାକୁ ଦାବି କରିଛନ୍ତି।ଅନ୍ୟପଟେ ଆଜିର ଡାଇରେକ୍ଟର ବୈଠକରେ ଲେମ୍ପ୍ସ୍‌ର ଚାବି, ଚେକ ବହି, ରସିଦ ବହି, ବ୍ୟାଙ୍କ ପାସବୁକ୍‌, ବିହନ ଲାଇସେନ୍ସ, ସାର ଲାଇସେନ୍ସ ସହ ଅନ୍ୟାନ୍ୟ ଜରୁରୀ ନଥିପତ୍ର ଓ ଲେଜର ଦୁଇ ଦିନ ମଧ୍ୟରେ ହସ୍ତାନ୍ତର କରିବାକୁ ପ୍ରସ୍ତାବ ଉପସ୍ଥାପନ କରାଯାଇଥିବା ସୂଚନା ମିଳିଛି। ତଦନ୍ତ ପ୍ରକ୍ରିୟାକୁ ସୁଚାରୁ କରିବା ପାଇଁ ସମସ୍ତ ରେକର୍ଡ ଶୀଘ୍ର ହସ୍ତାନ୍ତର ଆବଶ୍ୟକ ବୋଲି ବୈଠକରେ ମତ ପ୍ରକାଶ କରିଛନ୍ତି।