Odisha Janamata : ହାତୀ ଉପଦ୍ରଵ ରେ ବିଭିନ୍ନ ଫସଲ ହେଲା ନଷ୍ଟ ||

ହାତୀ ଉପଦ୍ରଵ ରେ ବିଭିନ୍ନ ଫସଲ ହେଲା ନଷ୍ଟ ||

18-Sep-2026

ପୁଣି ହାତୀ ଆତଙ୍କ, ନଷ୍ଟ ହେଲା ବିଭିନ୍ନ ଫସଲ

କଲ୍ଟି ମୌଜା ଓ ଗୁଣ୍ଡିରୀଗୁଡାରେ ହାତୀ ଉପଦ୍ରବ; ଧାନ, ମାଣ୍ଡିଆ ଓ ମକା ଚାଷ ନଷ୍ଟ

ଓଡିଶା ଜନମତ ରାୟଗଡା ୧୭/୯,

କାମେଶ୍ୱର କରକରିଆ : ----

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଅଞ୍ଚଳରେ ପୁଣି ହାତୀ ଆତଙ୍କ ଦେଖାଦେଇଛି। ହାତୀପଲ ଜନବସତି ନିକଟକୁ ପଶି ଚାଷ ଜମିରେ ଉପଦ୍ରବ କରିବା ସହ ବିଭିନ୍ନ ପ୍ରକାର ଫସଲ ଖାଇବା ଓ ଦଳିଚକଟି ନଷ୍ଟ କରୁଥିବାରୁ ଚାଷୀଙ୍କ ମଧ୍ୟରେ ଚିନ୍ତା ବଢ଼ିଛି। କିଛିଦିନ ପୂର୍ବରୁ ଅଞ୍ଚଳରେ ୧୩ଟିକିଆ ହାତୀପଲ ଘୁରି ବୁଲି ବିଭିନ୍ନ ଚାଷ ନଷ୍ଟ କରିଥିଲେ। ଏବେ ପୁଣି ଧାମୁଣିପଙ୍ଗା ପଞ୍ଚାୟତ ଅନ୍ତର୍ଗତ ଗୁଣ୍ଡିରୀଗୁଡା ଗାଁ ଓ କଲ୍ଟି ମୌଜା ଅଞ୍ଚଳରେ ହାତୀ ଉପଦ୍ରବ ଦେଖାଦେଇଛି। ହାତୀମାନେ ଚାଷ ଜମିରେ ପଶି ଧାନ, ମାଣ୍ଡିଆ, ମକା ଭଳି ବିଭିନ୍ନ ଫସଲ ଖାଇବା ସହ ଦଳିଚକଟି ନଷ୍ଟ କରିଛନ୍ତି। ଏଥିରେ ଚାଷୀ ସନମତି କାଡ୍ରାକା, ରାମସିଂ କାଡ୍ରାକା, ନାଗେଶ ମେଲାକା, ଚିଡିଗା ମାଣ୍ଡିକା ଓ ରଘୁ ମାଣ୍ଡିକାଙ୍କ ଚାଷ ନଷ୍ଟ ହୋଇଥିବା ଜଣାପଡ଼ିଛି।ବର୍ଷସାରା ପରିଶ୍ରମ କରି ଚାଷ କରିଥିବା ଫସଲ ହାତୀପଲ ନଷ୍ଟ କରିଦେବାରୁ ଚାଷୀମାନେ ଆର୍ଥିକ କ୍ଷତି ସହ ଚିନ୍ତାରେ ପଡ଼ିଛନ୍ତି। ବାରମ୍ବାର ହାତୀ ଗାଁ ଓ ଚାଷ ଜମିକୁ ପଶୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ରହିଛି।
ଚାଷୀମାନେ ନଷ୍ଟ ହୋଇଥିବା ଫସଲର ଶୀଘ୍ର ଆକଳନ କରି ସରକାରୀ ନିୟମ ଅନୁଯାୟୀ କ୍ଷତିପୂରଣ ପ୍ରଦାନ କରିବା ସହ ହାତୀପଲକୁ ଗାଁ ଓ ଚାଷ ଜମିଠାରୁ ଦୂରେ ରଖିବା ପାଇଁ ବନ ବିଭାଗ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି। ଏ ସମ୍ପର୍କ ରେ ଫରେଷ୍ଟର ବରଖା ପାତ୍ର ଫରେଷ୍ଟ ଗାର୍ଡ ପାରାଗାର୍ଡ ଓ ଗଜସାଥି ମାନଙ୍କ ସହ ହାତୀ ର ଗତିପଥ ଆକଳନ କରି ହାତୀକୁ ଜଙ୍ଗଲୀ ମୁହାଁ କରି ଲକଙ୍କୁ ସତର୍କତା କରାଯାଇଛି ବୋଲି କହିଛନ୍ତି।