Odisha Janamata : ମୋଦିଙ୍କ76ତମ ଜନ୍ମ ଦିନରେ 70ଗୋଟି ବୃକ୍ଷ ରୋପଣ କରିଥିଲେ ବନ ଅଧିକାରୀ ||

ମୋଦିଙ୍କ76ତମ ଜନ୍ମ ଦିନରେ 70ଗୋଟି ବୃକ୍ଷ ରୋପଣ କରିଥିଲେ ବନ ଅଧିକାରୀ ||

18-Sep-2026

ମୋଦିଙ୍କ ଜନ୍ମଦିନରେ ଏକ ପେଡ୍ ମା କେ ନାମ ୩.୦
କଲଟିପଦରରେ ୭୦ଟି ଚାରାରୋପଣ, ପରିବେଶ ସୁରକ୍ଷା ନେଇ ସଚେତନତା
ଓଡିଶା ଜନମତ ରାୟଗଡା ୧୭/୦୯,

କାମେଶ୍ୱର କରକରିଆ : -----

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୭୬ତମ ଜନ୍ମଦିନ ଅବସରରେ ଏକ ପେଡ୍ ମା କେ ନାମ ୩.୦ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତ ଅନ୍ତର୍ଗତ କଲଟିପଦର ଗ୍ରାମ ପାର୍ଶ୍ୱ ଜଙ୍ଗଲରେ ଆଜି ଅପରାହ୍ନ ୪ଟା ସମୟରେ ବନ ବିଭାଗ ପକ୍ଷରୁ ସିଏସଆର ପ୍ଲାଣ୍ଟେସନ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ବନାଞ୍ଚଳ ଅଧିକାରୀ ସଚ୍ଚିଦାନନ୍ଦ ପରିଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଚାରାରୋପଣ କାର୍ଯ୍ୟକ୍ରମରେ ମୋଟ ୭୦ଟି ଗଛ ଲଗାଯାଇଥିଲା। ବନ ସୁରକ୍ଷା ସହ ପରିବେଶର ସନ୍ତୁଳନ ରକ୍ଷା, ସବୁଜିମା ବୃଦ୍ଧି ଏବଂ ଅଧିକରୁ ଅଧିକ ଚାରାରୋପଣ କରିବା ପାଇଁ ଏହି ଅବସରରେ ଗ୍ରାମବାସୀଙ୍କୁ ସଚେତନ କରାଯାଇଥିଲା। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ କଲ୍ୟାଣସିଂହପୁର ବ୍ଲକ ଚେୟାରମ୍ୟାନ ଅମ୍ବ୍ରିତା କାଡ୍ରାକା, ‘କ’ ଜୋନ୍ ଜିଲ୍ଲା ପରିଷଦ ସଦସ୍ୟ ଭି.ବି. ପ୍ରସାଦ ରାଓ ଏବଂ ସିଙ୍ଗାରି ସରପଞ୍ଚ ନେଲା ପ୍ରେରେପକା ପ୍ରମୁଖ ଯୋଗଦେଇ ଚାରାରୋପଣ କରିଥିଲେ। ଏଥିରେ ଛତାପଦର ଓ କରଞ୍ଜା ବନ ସୁରକ୍ଷା ସମିତି ସଦସ୍ୟଙ୍କ ସମେତ କରଞ୍ଜାର ମା ସନ୍ତୋଷୀ ଏସ୍‌ଏଚ୍‌ଜି ଓ ମା ସରସ୍ୱତୀ ଏସ୍‌ଏଚ୍‌ଜିର ମହିଳାମାନେ ଯୋଗଦେଇଥିଲେ। ଏହି କାର୍ଯ୍ୟକ୍ରମରେ କଲ୍ୟାଣସିଂହପୁର ସେକ୍ସନ ଓ ସିକରପାଇ ସେକ୍ସନର ବନ କର୍ମଚାରୀମାନେ ସକ୍ରିୟ ଭାବେ ସହଯୋଗ କରିଥିଲେ। ଫରେଷ୍ଟର, ଫରେଷ୍ଟଗାର୍ଡ, ପାରାଗାର୍ଡ, ଗଜସାଥୀଙ୍କ ସମେତ ଅନ୍ୟାନ୍ୟ ବନ କର୍ମଚାରୀ ଉପସ୍ଥିତ ରହି ଚାରାରୋପଣ ଓ କାର୍ଯ୍ୟକ୍ରମ ପରି ଚାଳନାରେ ସହଯୋଗ କରିଥିଲେ। କାର୍ଯ୍ୟକ୍ରମକୁ ନେଇ ସିଙ୍ଗାରି ଗ୍ରାମରୁ ପାରମ୍ପରିକ ଘୁମୁରା ବାଜା ଓ ବିଭିନ୍ନ ପାରମ୍ପରିକ ବାଦ୍ୟଯନ୍ତ୍ର ସହ ଅତିଥିମାନଙ୍କୁ ସ୍ୱାଗତ କରାଯାଇଥିଲା। ଏହା ଫଳରେ ପରିବେଶ ସୁରକ୍ଷା ସହ ସ୍ଥାନୀୟ ପାରମ୍ପରିକ କଳା ଓ ସଂସ୍କୃତିର ଏକ ସୁନ୍ଦର ସମନ୍ୱୟ ଦେଖିବାକୁ ମିଳିଥିଲା। ଚାରାରୋପଣରେ ବହୁସଂଖ୍ୟାରେ ଗ୍ରାମବାସୀ ସାମିଲ ହୋଇଥିଲେ। ଲଗାଯାଇଥିବା ଚାରାଗୁଡ଼ିକର ନିୟମିତ ଯତ୍ନ ନେବା, ଜଙ୍ଗଲ ସୁରକ୍ଷା କରିବା ଏବଂ ପରିବେଶକୁ ସୁସ୍ଥ ଓ ସବୁଜ ରଖିବା ପାଇଁ ବନ ବିଭାଗ ପକ୍ଷରୁ ଲୋକଙ୍କୁ ସଚେତନ କରାଯାଇଥିଲା। ଗଛ ଲଗାଇବା ସହ ଗଛକୁ ବଞ୍ଚାଇବା ହିଁ ପରିବେଶ ସୁରକ୍ଷାର ମୁଖ୍ୟ ଆଧାର ବୋଲି ଏହି ଅବସରରେ ବାର୍ତ୍ତା ଦିଆଯାଇଥିଲା।