Odisha Janamata : ମହା ଆଡ଼ମ୍ବର ସହକାରେ ଶ୍ରୀଜୀଉ ଙ୍କ ବାହୁଦା ଯାତ୍ରା ଓ ରଥ ଟଣା |

ମହା ଆଡ଼ମ୍ବର ସହକାରେ ଶ୍ରୀଜୀଉ ଙ୍କ ବାହୁଦା ଯାତ୍ରା ଓ ରଥ ଟଣା |

24-Jul-2026

ବାହୁଡ଼ାଯାତ୍ରାରେ ଭକ୍ତଙ୍କ ଭିଡ଼ , ମହାଆଡମ୍ବରରେ ଶ୍ରୀଜୀଉଙ୍କ ରଥଟଣା

ଓଡିଶା ଜନମତ ରାୟଗଡା,୨୪/୭,

କାମେଶ୍ୱର କରକରିଆ : ------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି ଓ ଦେବୋତ୍ତର ବିଭାଗର ମିଳିତ ଆୟୋଜନରେ ପବିତ୍ର ବାହୁଡ଼ାଯାତ୍ରା ଗୁରୁବାର ବିଧିବଦ୍ଧ ଓ ମହାଆଡମ୍ବରରେ ପାଳିତ ହୋଇଯାଇଛି। ଅନୁକୂଳ ପାଗ ଯୋଗୁଁ ରାୟଗଡ଼ା ଜିଲ୍ଲାର ମୁନିଗୁଡ଼ା, ବିଷମକଟକ, କୋଲନରା, କାଶୀପୁର, ସଦର ଅଞ୍ଚଳ ସହ କଳାହାଣ୍ଡି ଜିଲ୍ଲାର ଲାଞ୍ଜିଗଡ଼ ଓ ଥୁଆମୂଳ ରାମପୁରରୁ ହଜାର ହଜାର ଭକ୍ତଙ୍କ ସମାଗମ ହୋଇଥିଲା। ସକାଳୁ ମଙ୍ଗଳ ଆଳତି, ଅବକାଶ ନୀତି ଓ ଖେଚୁଡ଼ି ଭୋଗ ଅର୍ପଣ ପରେ ପୂଜକମାନେ ଶ୍ରୀବିଗ୍ରହମାନଙ୍କୁ ପୁଷ୍ପମାଲ୍ୟରେ ସୁସଜ୍ଜିତ କରି ରଥ ପ୍ରତିଷ୍ଠା କରିଥିଲେ। ଦ୍ୱାଦଶ ପ୍ରହରରେ ମଙ୍ଗଳାରୋପଣ ନୀତି ସମ୍ପନ୍ନ ହେବା ପରେ ଅପରାହ୍ନ ପ୍ରାୟ ୩ଟାରେ ସେବାୟତମାନେ ପାରମ୍ପରିକ ‘ଗୋଟି ପହଣ୍ଡି’ରେ ମହାପ୍ରଭୁ ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର ଓ ଦେବୀ ସୁଭଦ୍ରାଙ୍କୁ ରଥାରୂଢ଼ କରାଇଥିଲେ। ରଥ ଉପରେ ଶ୍ରୀଜୀଉଙ୍କ ଦର୍ଶନ ପାଇ ଭକ୍ତମାନେ ଭାବବିହ୍ୱଳ ହୋଇଥିବାବେଳେ ପରେ ହରିବୋଲ ଓ ଜୟ ଜଗନ୍ନାଥ ଧ୍ୱନି ମଧ୍ୟରେ ରଥଟଣା ସମ୍ପନ୍ନ ହୋଇଥିଲା। ବାହୁଡ଼ାଯାତ୍ରାକୁ ସୁରୁଖୁରୁରେ ସମ୍ପନ୍ନ କରିବା ପାଇଁ ସ୍ଥାନୀୟ ପୋଲିସ ପକ୍ଷରୁ କଡ଼ା ଟ୍ରାଫିକ ବ୍ୟବସ୍ଥା କରାଯାଇଥିଲା। ସେହିପରି କୌଣସି ଅଘଟଣକୁ ଏଡ଼ାଇବା ପାଇଁ ସ୍ୱାସ୍ଥ୍ୟ ବିଭାଗ ଓ ଅଗ୍ନିଶମ ବିଭାଗର କର୍ମଚାରୀ ଓ ଡ୍ରାଇଭର ମହାସଂଘ ରହି ସହଜଗ କରିଥିଲେ। ଚଳିତ ବର୍ଷ ବାହୁଡ଼ାଯାତ୍ରା ଦିନ ଏକାଦଶୀ ତିଥି ପଡ଼ିଥିବାରୁ ଶ୍ରୀଜୀଉମାନଙ୍କୁ ଆସନ୍ତାକାଲି ନୀଳାଦ୍ରି ବିଜେ ପୂର୍ବରୁ ଶ୍ରୀମନ୍ଦିର ଅଭିମୁଖେ ପହଣ୍ଡିରେ ନିଆଯିବ ବୋଲି ମନ୍ଦିର ପରିଚାଳନା କମିଟି ପକ୍ଷରୁ ସୂଚନା ମିଳିଛି।