Odisha Janamata : ପ୍ରଶାସନ ନଶୁଣିବାରୁ ଚାରିଗାଁର ଚାଷୀ ନିଜ ଅର୍ଥରେ 3,କିମି କେନାଲ ମରାମତି କଲେ |

ପ୍ରଶାସନ ନଶୁଣିବାରୁ ଚାରିଗାଁର ଚାଷୀ ନିଜ ଅର୍ଥରେ 3,କିମି କେନାଲ ମରାମତି କଲେ |

20-Jul-2026

ଶୁଣିଲାନି ପ୍ରଶାସନ, ନିଜ ଅର୍ଥରେ ୩ କି.ମି. କେନାଲ ମରାମତି କଲେ ୪ ଗାଁର ଚାଷୀ
ଓଡିଶା ଜନମତ ରାୟଗଡା , ୨୦/୭,

କାମେଶ୍ୱର କରକରିଆ : -----

ପ୍ରଶାସନର ଦୀର୍ଘଦିନର ଅବହେଳା ପରେ ଶେଷରେ ଚାଷୀମାନେ ନିଜେ ଆଗକୁ ଆସି କେନାଲ ମରାମତି କରିବା ଘଟଣା ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକରେ ଚର୍ଚ୍ଚାର ବିଷୟ ପାଲଟିଛି। ନାରାୟଣପୁର ପଞ୍ଚାୟତ ଅନ୍ତର୍ଗତ ବୁଡ଼ାରଜା କେନାଲର ମରାମତି ପାଇଁ ନାରାୟଣପୁର, କେନ୍ଦୁଗୁଡ଼ା, ଦୁଲଦୁଲିଗୁଡ଼ା ଓ ଖସିଗୁଡ଼ା ଗାଁର ଚାଷୀ ଓ ଗ୍ରାମବାସୀମାନେ ନିଜସ୍ୱ ଅର୍ଥ ସଂଗ୍ରହ କରି ଶ୍ରମଦାନରେ କାମ ଆରମ୍ଭ କରିଛନ୍ତି।
ହାତରେ କୋଦାଳ, ମୁଣ୍ଡରେ ଠେକି ଧରି ପିଲାଠାରୁ ବୃଦ୍ଧ ପର୍ଯ୍ୟନ୍ତ ସମସ୍ତେ କେନାଲ ସଫା ଓ ମରାମତି କାର୍ଯ୍ୟରେ ସାମିଲ ହୋଇଛନ୍ତି। କେହି କେନାଲରୁ ମାଟି କାଢ଼ୁଥିବା ବେଳେ ଆଉ କେହି ଘାସ ଓ ଆବର୍ଜନା ସଫା କରୁଥିବା ଦେଖିବାକୁ ମିଳିଛି। ପ୍ରଶାସନ ନିକଟରେ ବାରମ୍ବାର ଦାବି କରି ନିରାଶ ହେବା ପରେ ଶେଷରେ ଗ୍ରାମବାସୀମାନେ ନିଜେ କାମ ହାତକୁ ନେଇଥିବା କହିଛନ୍ତି।ଗ୍ରାମବାସୀଙ୍କ ସୂଚନା ଅନୁଯାୟୀ, ଚାରି ଗାଁର ଚାଷୀମାନେ ବୈଠକ କରି ପ୍ରତ୍ୟେକ ପରିବାରରୁ ଅର୍ଥ ସଂଗ୍ରହ କରିଥିଲେ। ସେହି ଅର୍ଥରେ ପ୍ରାୟ ୩ କିଲୋମିଟର ଲମ୍ବ ବୁଡ଼ାରଜା କେନାଲର ମରାମତି କାମ ଗତ ଛଅ ଦିନ ଧରି ଚାଲିଛି।ଏହି କେନାଲ ଉପରେ ପ୍ରାୟ ୧୫୦ ଏକରରୁ ଅଧିକ ଚାଷଜମି ନିର୍ଭରଶୀଳ। ସମୟରେ କେନାଲ ମରାମତି ନ ହେଲେ ଚାଷଜମିକୁ ପାଣି ମିଳିବ ନାହିଁ ଏବଂ ଖରିଫ ଚାଷ ବ୍ୟାପକ ଭାବେ ପ୍ରଭାବିତ ହେବ ବୋଲି ଲକ୍ଷ୍ମୀନାରାୟଣ ପୂଜାରୀ, ଭୀମସେନ ବିଡ଼ିକା, ନବୀନ ପୂଜାରୀ, ଘନ କୌଶଲ୍ୟା ଓ ଋଷିକେଶ ପୂଜାରୀ ପ୍ରମୁଖ କହିଛନ୍ତି।ଗ୍ରାମବାସୀଙ୍କ ଅଭିଯୋଗ ଅନୁଯାୟୀ କେନାଲ ମରାମତି ପାଇଁ ବାରମ୍ବାର ପ୍ରଶାସନ ଏବଂ ଆଇଟିଡିଏ ଅଧିକାରୀଙ୍କୁ ଦାବି ଜଣାଇଥିଲେ ମଧ୍ୟ କୌଣସି ସ୍ଥାୟୀ ପଦକ୍ଷେପ ନିଆଯାଇନଥିଲା। ଫଳରେ ଚାଷୀମାନେ ବାଧ୍ୟ ହୋଇ ନିଜ ଅର୍ଥ ଓ ଶ୍ରମଦାନରେ କେନାଲ ମରାମତି କାମ କରୁଛନ୍ତି।ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ଅଶୋକ କୁମାର ସେଠୀଙ୍କୁ ପଚାରିବାରୁ ସେ କହିଛନ୍ତି ଘଟଣାସ୍ଥଳ ପରିଦର୍ଶନ କରି ତଦନ୍ତ କରାଯିବ ଏବଂ ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ନିଆଯିବ।