Odisha Janamata : ଡ଼ି ଆଇ ଇ ଟି ପକ୍ଷରୁ ପ୍ରଥମ ମାସିକ କ୍ଲଷ୍ଟର ସରୀୟ ବୈଠକ ଅନୁଷ୍ଠିତ ||

ଡ଼ି ଆଇ ଇ ଟି ପକ୍ଷରୁ ପ୍ରଥମ ମାସିକ କ୍ଲଷ୍ଟର ସରୀୟ ବୈଠକ ଅନୁଷ୍ଠିତ ||

03-Jul-2026

ଡି. ଆଇ.ଇ.ଟି. ପକ୍ଷରୁ ପ୍ରଥମ ମାସିକ କ୍ଲଷ୍ଟର ସ୍ତରୀୟ ଅଭିମୁଖୀକରଣ ବୈଠକ ଅନୁଷ୍ଠିତ,

ଓଡିଶା ଜନ ମତ ବ୍ୟୁରୋ,

ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଗଂଜାମ, ଖଲ୍ଲିକୋଟ ପକ୍ଷରୁ ପ୍ରଥମ ମାସିକ କ୍ଲଷ୍ଟର ସ୍ତରୀୟ ଅଭିମୁଖୀକରଣ ବୈଠକ ପ୍ରତିଷ୍ଠାନର ସମ୍ମିଳନୀ କକ୍ଷରେ ଆନୁଷ୍ଠାନିକ ରୀତିରେ ଅନୁଷ୍ଠିତ ହୋଇଯାଇଛି । ସର୍ବ ପ୍ରଥମେ ଜଗତର ନାଥ ଶ୍ରୀଜଗନ୍ନାଥଙ୍କ ନିକଟରେ ସମୂହ ପ୍ରଦୀପ ପ୍ରଜ୍ଜ୍ୱଳନ କରାଯାଇଥିଲା । ପ୍ରତିଷ୍ଠାନର ଅଧ୍ୟକ୍ଷ ତଥା ବିଶିଷ୍ଟ ଶିକ୍ଷାବିତ୍ ଡକ୍ଟର ସନ୍ତୋଷ କୁମାର ପରିଡା ଉପସ୍ଥିତ ହୋଇ ସ୍ୱାଗତ ଅଭିଭାଷଣ ପ୍ରଦାନ କରିଥିଲେ ।ଚଳିତ ୨୦୨୬-୨୭ ଶିକ୍ଷା ବର୍ଷର ଗୁରୁତ୍ୱପୂର୍ଣ୍ଣ ପ୍ରଥମ ମାସିକ କ୍ଲଷ୍ଟର ସ୍ତରୀୟ ଅଭିମୁଖୀକରଣ ବୈଠକ ଉଭୟ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ, ବିଦ୍ୟାଳୟର ପ୍ରଧାନ ଶିକ୍ଷକ ଶିକ୍ଷୟିତ୍ରୀ, ଏଫ୍ ଏଫ୍ ଏନ୍ ଶିକ୍ଷକ ଶିକ୍ଷୟିତ୍ରୀ ସର୍ବୋପରି ଛାତ୍ରଛାତ୍ରୀଙ୍କ ଶିକ୍ଷଣ କାର୍ଯ୍ୟକ୍ରମକୁ ସରସ ସୁନ୍ଦର ରୁଚିପୂର୍ଣ୍ଣ କରିବା ପାଇଁ ଏପ୍ରକାର ବୈଠକର ଆବଶ୍ୟକତା, ନିପୁଣ ଓଡ଼ିଶା, ଗ୍ୟାଲେରୀ ପରିଭ୍ରମଣ, ଶୈକ୍ଷିକ ସମ୍ବଳ, ବିଗତ ବର୍ଷ ସମ୍ପାଦିତ ମାସିକ କ୍ଲଷ୍ଟର ସ୍ତରୀୟ ବୈଠକର ସଫଳତା, ସି ଆର୍ ସି ସି, ସି ଆର୍ ଜିଙ୍କ ଦ୍ୱାରା କିଭଳି ସୁବିଧା ଜନକ ସ୍ଥିତିରେ ବୈଠକ ସମ୍ପାଦିତ ହୋଇପାରିବ ଆଦି ବହୁବିଧ ଦିଗ ସମ୍ପର୍କରେ ଅଧ୍ୟକ୍ଷ ଡକ୍ଟର ପରିଡା ପୁଙ୍ଖାନୁପୁଙ୍ଖ ଆଲୋଚନା କରିଥିଲେ । ବରିଷ୍ଠ ଶିକ୍ଷକ ପ୍ରଶିକ୍ଷକ ବିଷ୍ଣୁ ନାରାୟଣ ଜେନା, ନବୀନ କୁମାର ପ୍ରମାଣିକ, ସୁକୁଲେଇ ଟୁଡୁ, ମୁକ୍ତିକାନ୍ତ ବେହେରା, ବରିଷ୍ଠ ଶିକ୍ଷକ ପ୍ରଶିକ୍ଷିକା ପ୍ରଜ୍ଞା ପାରମିତା, ଡକ୍ଟର ନୀହାରିକା ସାମନ୍ତରାୟ, ସୁଶ୍ରୀ ଗାୟତ୍ରୀ ସ୍ୱାଇଁ, କଲ୍ୟାଣୀ କୁମାରୀ ଗୈ।ଡ଼, ସରୋଜିନୀ ମିଶ୍ର ପ୍ରମୁଖ ଗଂଜାମ ଜିଲ୍ଲାର ସମସ୍ତ ବ୍ଲକରୁ ଆସିଥିବା ସି ଆର ସି ସିଙ୍କୁ ପ୍ରଶିକ୍ଷଣ ପ୍ରଦାନ କରିଥିଲେ । ଶିଶୁ ବାଟିକା ରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସମୟ ସାରଣୀ, ଶୈକ୍ଷିକ କ୍ୟାଲେଣ୍ଡର, ବହୁ ଶ୍ରେଣୀ ପାଠ ଯୋଜନା, ଯାଦୁପେଡିରେ ରହିଥିବା ସାମଗ୍ରୀର ସଠିକ୍ ପରିଚାଳନା, ଖେଳ ଭିତ୍ତିକ କାର୍ଯ୍ୟ, ଆକଳନ, ଶିକ୍ଷଣ ସୋପାନର ବ୍ୟବହାର ସମ୍ପର୍କରେ ପ୍ରଶିକ୍ଷକ ପ୍ରଶିକ୍ଷିକାମାନେ ପ୍ରଶିକ୍ଷଣ ପ୍ରଦାନ କରିଥିଲେ ।
ରିପୋର୍ଟ:-
ଡକ୍ଟର ଦ୍ୱାରିକାନାଥ ମହାରଣା
ଖଲ୍ଲିକୋଟ, ଗଂଜାମ