Odisha Janamata : କୋତାଗୁଡା ରେ ମା ଧରଣୀ କ୍ରିକେଟ ପ୍ରିମିଏର ଲିଗ ର ଶୁଭାରମ୍ଭ |

କୋତାଗୁଡା ରେ ମା ଧରଣୀ କ୍ରିକେଟ ପ୍ରିମିଏର ଲିଗ ର ଶୁଭାରମ୍ଭ |

14-Jun-2026

କୋତାଗୁଡ଼ାରେ ମା’ ଧରଣୀ କ୍ରିକେଟ ପ୍ରିମିୟର ଲିଗ୍ ଶୁଭାରମ୍ଭ, ବିନାୟକ ଇଲେଭେନର ବିଜୟ

ଓଡିଶା ଜନମତ ରାୟଗଡା , ୧୪/୦୬,

କାମେଶ୍ୱର କରକରିଆ :-----

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଧାମଣୀପଙ୍କା ପଞ୍ଚାୟତ ଅନ୍ତର୍ଗତ କୋତାଗୁଡ଼ା ଗ୍ରାମରେ ଆଜି ମା’ ଧରଣୀ କ୍ରିକେଟ ପ୍ରିମିୟର ଲିଗ୍ (MDKPL) ର ଶୁଭ ଉଦ୍ଘାଟନ ରଜ ଉତ୍ସବ ଅବସରରେ ଉତ୍ସାହ ଓ ଉଦ୍ଦୀପନାର ସହ ଅନୁଷ୍ଠିତ ହୋଇଯାଇଛି। ସ୍ଥାନୀୟ କ୍ରୀଡ଼ାପ୍ରେମୀ, ଯୁବବର୍ଗ ଓ ଗ୍ରାମବାସୀଙ୍କ ବହୁଳ ଉପସ୍ଥିତିରେ ପ୍ରତିଯୋଗିତାର ଶୁଭାରମ୍ଭ ହୋଇଥିଲା। ଉଦ୍ଘାଟନୀ ଉତ୍ସବରେ ମୁଖ୍ୟ ଅତିଥି ଭାବେ ଯୁବ ସମାଜସେବୀ ଅଭିଳାଷ ମହାନନ୍ଦିଆ ଯୋଗଦେଇ ଖେଳାଳିମାନଙ୍କୁ ଉତ୍ସାହିତ କରିବା ସହ ଟୁର୍ଣ୍ଣାମେଣ୍ଟର ଶୁଭ ଉଦ୍ଘାଟନ କରିଥିଲେ। ନିଜ ବକ୍ତବ୍ୟରେ ସେ ଯୁବପିଢ଼ିଙ୍କ ମଧ୍ୟରେ କ୍ରୀଡ଼ା ମନୋଭାବ ବୃଦ୍ଧି ଓ ସାମାଜିକ ଏକତା ସୁଦୃଢ଼ କରିବାରେ ଏପରି ପ୍ରତିଯୋଗିତାର ଗୁରୁତ୍ୱ ଉପରେ ଆଲୋକପାତ କରିଥିଲେ। ଉଦ୍ଘାଟନୀ ମ୍ୟାଚ୍‌ରେ ବିନାୟକ ଇଲେଭେନ ଓ ଆର୍କେ ଇଲେଭେନ ମଧ୍ୟରେ ରୋମାଞ୍ଚକର ମୁକାବିଲା ଅନୁଷ୍ଠିତ ହୋଇଥିଲା। ପ୍ରଥମେ ବ୍ୟାଟିଂ କରିଥିବା ବିନାୟକ ଇଲେଭେନ ନିର୍ଦ୍ଧାରିତ ୧୦ ଓଭରରେ ୮୬ ରନ୍ ସଂଗ୍ରହ କରି ଆର୍କେ ଇଲେଭେନ ସମ୍ମୁଖରେ ଏକ ଚ୍ୟାଲେଞ୍ଜିଂ ଲକ୍ଷ୍ୟ ରଖିଥିଲା।
ଜବାବରେ ବ୍ୟାଟିଂ କରିଥିବା ଆର୍କେ ଇଲେଭେନ ବିନାୟକ ଦଳର ଶୃଙ୍ଖଳିତ ବୋଲିଂ ଆକ୍ରମଣ ଆଗରେ ତିଷ୍ଠି ପାରିନଥିଲା ଏବଂ ୬୪ ରନ୍‌ରେ ଅଲ୍‌ଆଉଟ୍ ହୋଇଯାଇଥିଲା। ଫଳରେ ବିନାୟକ ଇଲେଭେନ ୨୨ ରନ୍‌ରେ ବିଜୟୀ ହୋଇ ଟୁର୍ଣ୍ଣାମେଣ୍ଟରେ ବିଜୟର ସହ ଶୁଭାରମ୍ଭ କରିଛି। ଆଜିର ମ୍ୟାଚ୍‌ରେ ଜଳନ୍ଧର ମାଣ୍ଡିକା ଓ ସିଦ୍ଧାନ୍ତ କୁଲେସିକା ଏମ୍ପାୟାର ଦାୟିତ୍ୱ ତୁଲାଇଥିବା ବେଳେ ସ୍କୋରର ଭାବେ ମେଘ ଗାଣ୍ଟା କାର୍ଯ୍ୟ ନିର୍ବାହ କରିଥିଲେ। ପ୍ରତିଯୋଗିତାକୁ ସୁଚାରୁ ଭାବେ ପରିଚାଳନା କରିବାରେ ଆୟୋଜକ କମିଟିର ସଦସ୍ୟମାନେ ସକ୍ରିୟ ଭୂମିକା ଗ୍ରହଣ କରିଥିଲେ। ଖେଳକୁ ଉପଭୋଗ କରିବା ପାଇଁ ଆଖପାଖ ଅଞ୍ଚଳରୁ ହଜାର ହଜାର କ୍ରୀଡ଼ାପ୍ରେମୀ ଓ ଦର୍ଶକ ଯୋଗଦେଇଥିଲେ। ମାଠରେ ଦର୍ଶକଙ୍କ ଉତ୍ସାହ ଓ ଖେଳାଳିଙ୍କ ଜୋସ୍ ପ୍ରତିଯୋଗିତାକୁ ଅଧିକ ଆକର୍ଷଣୀୟ କରିଥିଲା। ଅଞ୍ଚଳର ଯୁବ ଖେଳାଳିମାନଙ୍କୁ ନିଜ ପ୍ରତିଭା ପ୍ରଦର୍ଶନ ପାଇଁ ଏହି ପ୍ରତିଯୋଗିତା ଏକ ଉତ୍କୃଷ୍ଟ ମଞ୍ଚ ସାବ୍ୟସ୍ତ ହେବ ବୋଲି ସ୍ଥାନୀୟ ବୁଦ୍ଧିଜୀବୀ ଓ କ୍ରୀଡ଼ାପ୍ରେମୀମାନେ ମତ ପ୍ରକାଶ କରିଛନ୍ତି।