Odisha Janamata : କଲ୍ୟାଣ ସିଂହ ପୁର ଗାଁରେ ପଶିଲେ ଦୁଇ ହାତୀ ବ୍ୟାପକ କଲେ କ୍ଷୟ କ୍ଷତି ||

କଲ୍ୟାଣ ସିଂହ ପୁର ଗାଁରେ ପଶିଲେ ଦୁଇ ହାତୀ ବ୍ୟାପକ କଲେ କ୍ଷୟ କ୍ଷତି ||

06-Aug-2026

କଲ୍ୟାଣସିଂହପୁରରେ ଗାଁ ମୁହାଁ ୨ ଜଙ୍ଗଲୀ ହାତୀ: କପା, ଚଣା ଓ ଧାନ ଫସଲ ନଷ୍ଟ, ଆତଙ୍କରେ ଗ୍ରାମବାସୀ
ଓଡିଶା ଜନମତ ରାୟଗଡା , ୬/୮,

କାମେଶ୍ୱର କରକରିଆ :------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ପଞ୍ଚାୟତ ଅନ୍ତର୍ଗତ କେଶବ ନାୟକଗୁଡ଼ା (ନୂଆସାହି) ଏବଂ ଘାଗୁଡ଼ିମାଳ ଅଞ୍ଚଳରେ ୨ଟି ଜଙ୍ଗଲୀ ହାତୀ ପ୍ରବେଶ କରି ବ୍ୟାପକ ଫସଲ ନଷ୍ଟ କରିଥିବାରୁ ସ୍ଥାନୀୟ ଅଞ୍ଚଳରେ ଆତଙ୍କର ପରିବେଶ ସୃଷ୍ଟି ହୋଇଛି। ବୁଧବାର ବିଳମ୍ବିତ ରାତିରେ ହାତୀ ଦୁଇଟି ଗାଁ ନିକଟକୁ ଚାଲିଆସି କପା, ଚଣା ଓ ନୂଆ ରୋପଣ କରାଯାଇଥିବା ଧାନ ଚାଷକୁ ମାଡ଼ି ବ୍ୟାପକ କ୍ଷତି କରିଥିବା ଜଣାପଡ଼ିଛି।ସୂଚନା ଅନୁସାରେ, ନିୟମଗିରିର କୃଷମୁଇଁ ଗାଁ ନିକଟରେ ଏକ ହାତୀପଲ ବିଚରଣ କରୁଥିଲେ। ସେହି ପଲରୁ ୨ଟି ହାତୀ ଅଲଗା ହୋଇ କେଶବ ନାୟକଗୁଡ଼ା ନୂଆସାହି ଓ ଘାଗୁଡ଼ିମାଳର ଲହରାସାହି ଆଡ଼କୁ ଚାଲିଆସିଥିଲେ। ହଠାତ୍ ଗାଁ ନିକଟରେ ହାତୀଙ୍କୁ ଦେଖି ଗ୍ରାମବାସୀ ଭୟଭୀତ ହୋଇପଡ଼ିଥିଲେ ଏବଂ ରାତିସାରା ସତର୍କ ଅବସ୍ଥାରେ ରହିଥିଲେ।
କେଶବ ନାୟକଗୁଡ଼ା ନୂଆସାହିରେ ଚାଷୀମାନଙ୍କ କପା ଓ ଚଣା ଚାଷକୁ ହାତୀ ଦଳି ନଷ୍ଟ କରିଥିବାବେଳେ, ଘାଗୁଡ଼ିମାଳର ଲହରାସାହିରେ ନୂଆ ରୋପଣ କରାଯାଇଥିବା ଧାନ ଚାଷ ମଧ୍ୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। ଫଳରେ କ୍ଷତିଗ୍ରସ୍ତ ଚାଷୀମାନେ ସରକାରଙ୍କ ନିକଟରୁ ଶୀଘ୍ର କ୍ଷତିପୂରଣ ପ୍ରଦାନ ପାଇଁ ଦାବି କରିଛନ୍ତି।
ଘଟଣାର ଖବର ପାଇ ଗୁରୁବାର ସକାଳେ ବନ ବିଭାଗର ଫରେଷ୍ଟର ଭଗବାନ ସାରାକା ଓ ତାଙ୍କ ସହକର୍ମୀମାନେ ଘଟଣାସ୍ଥଳରେ ପହଞ୍ଚି କ୍ଷୟକ୍ଷତିର ଆକଳନ କରିଥିଲେ। କ୍ଷତିଗ୍ରସ୍ତ ଚାଷୀମାନେ ଆବଶ୍ୟକ ନଥିପତ୍ର ଦାଖଲ କଲେ ସରକାରୀ ନିୟମାନୁସାରେ କ୍ଷତିପୂରଣ ପାଇଁ ପ୍ରସ୍ତାବ ପଠାଯିବ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ଏପଟେ ଘାଗୁଡ଼ିମାଳ ସମେତ ଆଖପାଖ ଗାଁଗୁଡ଼ିକରେ ହାତୀ ଆତଙ୍କ ଜାରି ରହିଥିବାରୁ ଲୋକମାନେ ଭୟଭୀତ ଅବସ୍ଥାରେ ଅଛନ୍ତି। ବନ ବିଭାଗ ପକ୍ଷରୁ ଗ୍ରାମବାସୀଙ୍କୁ ସତର୍କ ରହିବା, ରାତିରେ ଏକାକୀ ବାହାରକୁ ନଯିବା ଏବଂ ହାତୀଙ୍କ ବିଚରଣ ସମ୍ପର୍କରେ କୌଣସି ସୂଚନା ମିଳିଲେ ତୁରନ୍ତ ବନ ବିଭାଗକୁ ଅବଗତ କରିବାକୁ ପରାମର୍ଶ ଦିଆଯାଇଛି।