Odisha Janamata : ପୂଜାରୀ ଗୁଡା କସ୍ତୁରବା ଗାନ୍ଧୀ ବାଳିକା ବିଦ୍ୟଳୟ ରେ ସ୍କୁଲ କମିଟି ଚୟନ କୁ ନେଇ ବିବାଦ |

ପୂଜାରୀ ଗୁଡା କସ୍ତୁରବା ଗାନ୍ଧୀ ବାଳିକା ବିଦ୍ୟଳୟ ରେ ସ୍କୁଲ କମିଟି ଚୟନ କୁ ନେଇ ବିବାଦ |

11-Jul-2026

ବିଦ୍ୟାଳୟ ପରିଚାଳନା କମିଟି ଚୟନକୁ ନେଇ ବିବାଦ
ପୁନଃ ଗଠନ ପାଇଁ ଡିଇଓଙ୍କୁ ଦାବିପତ୍ର,

ଓଡିଶା ଜନମତ ରାୟଗଡା,୧୧/୭,

କାମେଶ୍ୱର କରକରିଆ :--

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ପୂଜାରୀଗୁଡା ସ୍ଥିତ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟର ପରିଚାଳନା କମିଟି ସଭାପତି ଚୟନକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ବିବାଦ ଦେଖାଦେଇଛି। ସରକାରୀ ନିୟମକୁ ଜଳାଞ୍ଜଳି ଦେଇ ଏହି ଚୟନ ପ୍ରକ୍ରିୟା କରାଯାଇଥିବା ଅଭିଯୋଗ କରି କନ୍ଧକୁଳ ସମାଜ ପକ୍ଷରୁ ଲିଖିତ ଆପତ୍ତି କରାଯାଇଛି। ଅଭିଯୋଗ ଅନୁଯାୟୀ, ବିଦ୍ୟାଳୟରେ ୯୦ ପ୍ରତିଶତରୁ ଅଧିକ ଅନୁସୂଚିତ ଜନଜାତିର ଛାତ୍ରୀ ପଢୁଥିବା ବେଳେ ସେହି ସମ୍ପ୍ରଦାୟର ଯୋଗ୍ୟ ଅଭିଭାବକଙ୍କୁ ବାଦ୍ ଦିଆଯାଇଛି।ତେବେ ଏ. ଶ୍ରୀନିବାସ ରାଓଙ୍କ ନିଜ ସନ୍ତାନ ଏଠାରେ ପଢୁନଥିଲେ ସୁଦ୍ଧା, ସେ ଏକ ଆଫିଡେଭିଟ୍ ବଳରେ ଅନ୍ୟ ଛାତ୍ରୀଙ୍କ ଅଭିଭାବକ ସାଜି ଦ୍ୱିତୀୟ ଥର ପାଇଁ ସଭାପତି ନିର୍ବାଚିତ ହୋଇଛନ୍ତି। କମିଟି ଗଠନରେ ୭୫ ପ୍ରତିଶତ ପ୍ରକୃତ ପିତାମାତା ରହିବା ବାଧ୍ୟତାମୂଳକ ଥିବା ବେଳେ ଏହି ନିୟମର ଖୋଲାଖୋଲି ଉଲ୍ଲଂଘନ ହୋଇଥିବା ଅଭିଭାବକମାନେ ପ୍ରଶ୍ନ ଉଠାଇଛନ୍ତି। ଏ ନେଇ କନ୍ଧକୁଳ ସମାଜ ପକ୍ଷରୁ ଜିଲ୍ଲା ଶିକ୍ଷା ଅଧିକାରୀ ବିଇଓ ଏବଂ ପ୍ରଧାନଶିକ୍ଷକଙ୍କୁ ସ୍ମାରକପତ୍ର ପ୍ରଦାନ କରାଯାଇ କମିଟିର ପୁନଃ ଗଠନ ପାଇଁ ଦାବି କରାଯାଇଛି। ଅପରପକ୍ଷରେ, ନବନିର୍ବାଚିତ ସଭାପତି ଶ୍ରୀ ରାଓ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ, ଆଫିଡେଭିଟ୍ ଆଧାରରେ ପଦବୀରେ ରହିବା ଆଇନଗତ ଭାବେ ବୈଧ ଏବଂ ପୂର୍ବରୁ ମଧ୍ୟ ତାଙ୍କ ପରିବାରର ସଦସ୍ୟ ଏଭଳି ଦାୟିତ୍ୱ ତୁଲାଇଛନ୍ତି। ତେବେ ଏହି ସମ୍ପର୍କରେ ବିଦ୍ୟାଳୟର ପ୍ରଧାନଶିକ୍ଷକ ନାଗଭୂଷଣ ରାଓ କହିଛନ୍ତି ଯେ, ସରକାରୀ ନିୟମାନୁସାରେ ହିଁ ସବୁ କାର୍ଯ୍ୟକାରୀ କରାଯାଉଛି ଏବଂ ଏଥିରେ କୌଣସି ବ୍ୟତିକ୍ରମ କରାଯିବ ନାହିଁ।ସେହିପରି ବ୍ଲକ ଶିକ୍ଷା ଅଧିକାରୀ ଶାନ୍ତିଲତା ମୁନ୍ନି କହିଛନ୍ତି ଯେ, ଅଭିଭାବକ ବ୍ୟତୀତ ଅନ୍ୟ କୌଣସି ସମ୍ପର୍କୀୟ କିମ୍ବା ବାହାର ଲୋକଙ୍କୁ ପରିଚାଳନା କମିଟିରେ ସାମିଲ କରିବା ସମ୍ପର୍କରେ କୌଣସି ସରକାରୀ ନିୟମ ନାହିଁ। ଏହି ଘଟଣାର ତଦନ୍ତ ଚାଲିଛି ଏବଂ ତଦନ୍ତ ରିପୋର୍ଟ ଆଧାରରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ସେ ପ୍ରକାଶ କରିଛନ୍ତି।ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଥିବା ବେଳେ ଶିକ୍ଷା ବିଭାଗର ତଦନ୍ତ ପରେ ପ୍ରକୃତ ଚିତ୍ର ସାମ୍ନାକୁ ଆସିବ ବୋଲି ସାଧାରଣରେ ଆଶା ପ୍ରକାଶ ପାଇଛି।