Odisha Janamata : ସିଙ୍ଗାରି ପଞ୍ଚାୟତ ରେ ଆବାସ ଯୋଜନାରେ ଅନିମିୟତା ଅଭିଯୋଗ ||

ସିଙ୍ଗାରି ପଞ୍ଚାୟତ ରେ ଆବାସ ଯୋଜନାରେ ଅନିମିୟତା ଅଭିଯୋଗ ||

10-Jul-2026

ଆବାସ ଯୋଜନାରେ ଅନିୟମିତତା ଅଭିଯୋଗ: ୫ ବର୍ଷ ହେଲା କାର୍ଯ୍ୟାଦେଶ, ମିଳିନି ଟଙ୍କା; ଥାନାରେ ଲିଖିତ ଅଭିଯୋଗ,

ଓଡିଶା ଜନମତ ରାୟଗଡା , ୧୦/୭

କାମେଶ୍ୱର କରକରିଆ :-------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତର ତିଡିମସ୍କା ଗ୍ରାମରେ ପ୍ରଧାନମନ୍ତ୍ରୀ ଆବାସ ଯୋଜନା (ପିଏମ୍ ଆବାସ) କାର୍ଯ୍ୟକାରିତାକୁ ନେଇ ସଙ୍ଗୀନ ଅନିୟମିତତା ଅଭିଯୋଗ ସାମ୍ନାକୁ ଆସିଛି। ୨୦୨୧-୨୨ ଆର୍ଥିକ ବର୍ଷରେ ଜଣେ ଅବିବାହିତା ମହିଳାଙ୍କ ନାମରେ ଆବାସ ମଞ୍ଜୁର ହୋଇ କାର୍ଯ୍ୟାଦେଶ ଜାରି ହୋଇଥିଲେ ମଧ୍ୟ ପାଞ୍ଚ ବର୍ଷ ବିତିଯାଇଥିଲେ ସୁଦ୍ଧା ତାଙ୍କ ବ୍ୟାଙ୍କ ଖାତାକୁ ପ୍ରଥମ କିସ୍ତିର ଅର୍ଥ ଜମା ହୋଇନଥିବା ଅଭିଯୋଗ ହୋଇଛି। ଅବିବାହିତା ସମ୍ବାରୀ କୃଷିକା (୩୫) କହିବା ଅନୁଯାୟୀ ମୋ ନାମରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ମଞ୍ଜୁର ହୋଇଥିଲା। ଏହାର କାର୍ଯ୍ୟାଦେଶ ନମ୍ବର (ଓ.ଆର ୧୫୪୨୮୨୫୨୨) ରହିଛି। କିନ୍ତୁ ଏପର୍ଯ୍ୟନ୍ତ ତାଙ୍କ ଖାତାକୁ କୌଣସି କିସ୍ତିର ଅର୍ଥ ଆସିନଥିବାରୁ ସେ ଘର ନିର୍ମାଣ କାମ ଆରମ୍ଭ କରିପାରିନାହାନ୍ତି। ହିତାଧିକାରୀଙ୍କ କହିବା ଅନୁଯାୟୀ ନ୍ୟାୟ ପାଇଁ ସେ ବାରମ୍ବାର ଗ୍ରାମ ପଞ୍ଚାୟତ ଓ ବ୍ଲକ କାର୍ଯ୍ୟାଳୟକୁ ଦୌଡ଼ି ଦୌଡ଼ି ହତାଶ ହୋଇପଡ଼ିଛନ୍ତି। ଶେଷରେ ସେ କଲ୍ୟାଣସିଂହପୁର ଥାନାରେ ମଧ୍ୟ ଏକ ଲିଖିତ ଅଭିଯୋଗ କରିଥିଲେ। ତେବେ ଅଭିଯୋଗ ପରେ ମଧ୍ୟ କୌଣସି ଦୃଶ୍ୟମାନ ପଦକ୍ଷେପ ଗ୍ରହଣ କରାଯାଇନଥିବା ସେ ଅଭିଯୋଗ କରିଛନ୍ତି। ଅଭିଯୋଗରେ ଆହୁରି ଦର୍ଶାଯାଇଛି ଯେ ସେତେବେଳର ପଞ୍ଚାୟତ ଅଧିକାରୀ କାମାକ୍ଷୀ ନେମାଲପୁରୀ ଓ ସେତେବେଳର ବିପିସି ଉତ୍ତମ କୁମାର ବେହେରାଙ୍କୁ ବାରମ୍ବାର ଅବଗତ କରାଯାଇଥିଲେ ମଧ୍ୟ କୌଣସି ସମାଧାନ ହୋଇନଥିଲା। ପରେ ଉତ୍ତମ କୁମାର ବେହେରାଙ୍କର ଅନ୍ୟତ୍ର ବଦଳି ହୋଇଥିବା ଜଣାପଡ଼ିଛି। ବର୍ତ୍ତମାନର ଗୋଷ୍ଠୀ ଉନ୍ନୟନ ଅଧିକାରୀ ମନୀଷା ଦାସଙ୍କୁ ମଧ୍ୟ ବିଷୟରେ ଅବଗତ କରାଯାଇଥିଲେ ସୁଦ୍ଧା ଏପର୍ଯ୍ୟନ୍ତ କୌଣସି ଫଳପ୍ରଦ ପଦକ୍ଷେପ ନିଆଯାଇନଥିବା ଅଭିଯୋଗ ହୋଇଛି।ସବୁଠାରୁ ଗୁରୁତର ଅଭିଯୋଗ ହେଉଛି, ବ୍ଲକର ଆବାସ ଯୋଜନା ଦାୟିତ୍ୱରେ ଥିବା ଜଣେ କର୍ମଚାରୀ ଚଞ୍ଚକତା କରି ହିତାଧିକାରୀଙ୍କ ପରିବର୍ତ୍ତେ ଅନ୍ୟ ଜଣଙ୍କ ବ୍ୟାଙ୍କ ଖାତାକୁ ଦୁଇଟି କିସ୍ତିରେ ୮୦ ହଜାର ଟଙ୍କା ପଠାଇଥିବା ନେଇ ସମ୍ବାରୀ କୃଷିକା ଅଭିଯୋଗ କରିଛନ୍ତି। ଏହି ଅଭିଯୋଗର ସତ୍ୟତା ନେଇ ପ୍ରଶାସନ ପକ୍ଷରୁ ତଦନ୍ତ ହେଲେ ପ୍ରକୃତ ଘଟଣା ପଦାକୁ ଆସିବ। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଅନେକ ପ୍ରଶ୍ନ ଉଠିଛି। କାର୍ଯ୍ୟାଦେଶ ଜାରି ହେବା ପରେ ମଧ୍ୟ ହିତାଧିକାରୀଙ୍କ ଖାତାକୁ ଅର୍ଥ କାହିଁକି ପଠାଯାଇନାହିଁ? କେଉଁ ଆଧାରରେ କାର୍ଯ୍ୟାଦେଶ ଜାରି କରାଯାଇଥିଲା? ଯଦି ଅନ୍ୟ ଖାତାକୁ ଟଙ୍କା ଯାଇଥାଏ ତେବେ ଏଥିପାଇଁ କିଏ ଦାୟୀ ଏବଂ ଦୋଷୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ହେବ? ଏହାକୁ ନେଇ ସାଧାରଣରେ ତୀବ୍ର ଚର୍ଚ୍ଚା ଚାଲିଛି। ଏପରି ପରିସ୍ଥିତିରେ ହିତାଧିକାରୀ ସମ୍ବାରୀ କୃଷିକା ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ନିକଟରେ ଘଟଣାର ନିରପେକ୍ଷ ତଦନ୍ତ କରାଯିବା ସହ ତାଙ୍କୁ ତୁରନ୍ତ ପ୍ରଧାନମନ୍ତ୍ରୀ ଆବାସ ଯୋଜନାର ପ୍ରାପ୍ୟ ଅର୍ଥ ପ୍ରଦାନ କରି ନ୍ୟାୟ ଦେବାକୁ ଦାବି କରିଛନ୍ତି।