Odisha Janamata : ଆୟୁଷ୍ମାନ ଆରୋଗ୍ୟ ମନ୍ଦିର ର 10 ମ ବର୍ଷ ପୂର୍ତ୍ତି ଉତ୍ସବ ପାଳିତ

ଆୟୁଷ୍ମାନ ଆରୋଗ୍ୟ ମନ୍ଦିର ର 10 ମ ବର୍ଷ ପୂର୍ତ୍ତି ଉତ୍ସବ ପାଳିତ

09-Jun-2026

ଆୟୁଷ୍ମାନ ଆରୋଗ୍ୟ ମନ୍ଦିର (PHC) ଶିକରପାଇରେ PMSMAର ୧୦ମ ବର୍ଷପୂର୍ତ୍ତି ଉତ୍ସବ ପାଳିତ,
ଓଡିଶା ଜନମତ ରାୟଗଡା , ୯/୬,

କାମେଶ୍ୱର କରକରିଆ :-----
ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ଶିକରପାଇ ସ୍ଥିତ ଆୟୁଷ୍ମାନ ଆରୋଗ୍ୟ ମନ୍ଦିର (PHC) ଠାରେ ପ୍ରଧାନମନ୍ତ୍ରୀ ସୁରକ୍ଷିତ ମାତୃତ୍ୱ ଅଭିଯାନ (PMSMA)ର ୧୦ମ ବର୍ଷପୂର୍ତ୍ତି ଅବସରରେ ଏକ ସ୍ୱତନ୍ତ୍ର ସ୍ୱାସ୍ଥ୍ୟ କାର୍ଯ୍ୟକ୍ରମ ମଙ୍ଗଳବାର ଅନୁଷ୍ଠିତ ହୋଇଯାଇଛି।
ଏହି ଅବସରରେ ଡାକ୍ତର ଚିନ୍ମୟ ରଞ୍ଜନ ନାୟକ, ଡାକ୍ତର ସର୍ବେଶ୍ୱର ବାହିନୀପତି ଓ ଫାର୍ମାସିଷ୍ଟ ଝରଣା ପଣ୍ଡାଙ୍କ ନେତୃତ୍ୱରେ ଗର୍ଭବତୀ ମହିଳାମାନଙ୍କର ରକ୍ତଚାପ, ରକ୍ତ ପରୀକ୍ଷା, HIV ପରୀକ୍ଷା, ହିମୋଗ୍ଲୋବିନ ସମେତ ବିଭିନ୍ନ ଆବଶ୍ୟକ ସ୍ୱାସ୍ଥ୍ୟ ଯାଞ୍ଚ କରାଯାଇଥିଲା। ଶିକରପାଇ, ବେଲକୋଣ, ବୁଡ଼ଗୁଡ଼ା, ଦେଉଳବାଡ଼ି ଓ ସେରିଗୁମା ଉପ-ସ୍ୱାସ୍ଥ୍ୟ କେନ୍ଦ୍ର ଅଞ୍ଚଳରୁ ଆସିଥିବା ମୋଟ ୧୦୫ ଜଣ ଗର୍ଭବତୀ ମା’ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ସକାଳ ୮ଟାରୁ ଆରମ୍ଭ ହୋଇଥିବା ଏହି ସ୍ୱାସ୍ଥ୍ୟ ଶିବିର ଦିନ ୧ଟା ପର୍ଯ୍ୟନ୍ତ ଚାଲିଥିଲା।ଗର୍ଭବତୀ ମହିଳାମାନଙ୍କ ସୁରକ୍ଷିତ ମାତୃତ୍ୱ ଏବଂ ସୁସ୍ଥ ଶିଶୁ ଜନ୍ମକୁ ଲକ୍ଷ୍ୟ କରି ଆୟୋଜିତ ଏହି କାର୍ଯ୍ୟକ୍ରମରେ ସମସ୍ତ ଉପସ୍ଥିତ ମା’ମାନଙ୍କ ପାଇଁ ମଧ୍ୟାହ୍ନ ଭୋଜନର ବ୍ୟବସ୍ଥା ମଧ୍ୟ କରାଯାଇଥିଲା।
କାର୍ଯ୍ୟକ୍ରମକୁ ସଫଳ କରିବାରେ ଶିକରପାଇ ଆୟୁଷ୍ମାନ ଆରୋଗ୍ୟ ମନ୍ଦିରର ସମସ୍ତ ସ୍ୱାସ୍ଥ୍ୟକର୍ମୀ ଓ କର୍ମଚାରୀ ସକ୍ରିୟ ସହଯୋଗ ପ୍ରଦାନ କରିଥିଲେ। PMSMAର ୧୦ ବର୍ଷ ପୂର୍ତ୍ତି ଅବସରରେ ଆୟୋଜିତ ଏହି ଶିବିର ମାତୃ ଓ ଶିଶୁ ସ୍ୱାସ୍ଥ୍ୟ ସୁରକ୍ଷା କ୍ଷେତ୍ରରେ ସଚେତନତା ବୃଦ୍ଧି ସହ ଗ୍ରାମାଞ୍ଚଳର ଗର୍ଭବତୀ ମହିଳାମାନଙ୍କୁ ଉତ୍ତମ ସ୍ୱାସ୍ଥ୍ୟସେବା ଯୋଗାଇବାରେ ସହାୟକ ହୋଇଛି।