Odisha Janamata : ନବେ ଟିକିଆ ହାତୀ ପଲ କୁ ଦେଖି ଚିନ୍ତାରେ ଚାଷୀ |

ନବେ ଟିକିଆ ହାତୀ ପଲ କୁ ଦେଖି ଚିନ୍ତାରେ ଚାଷୀ |

09-Dec-2025

ହାତୀପଲଙ୍କ ଉତ୍ପାତ, ଚିନ୍ତାରେ ଚାଷୀ,

ଓଡିଶା ଜନ ମତ ବ୍ୟୁରୋ,

ନବେ ଟିକିଆ ହାତୀପଲ କୁ ଦେଖି ଚିନ୍ତାରେ ଚାଷୀ ସେମାନେ ବର୍ତ୍ତମାନ ବିଲରେ ଥିବା ପାଚିଲା ଧାନ କୁ ଖାଇବା ସହିତ ଦଳା ଚକଟା କରିଦେବାର ଭୟ ଘାରିଛି | ଏପରି ଦୃଶ୍ୟ ଦେଖିବାକୁ ମିଳିଛି ତାଳଚେର ରେଞ୍ଜ ଏଫସିଆଇ ସେକ୍ସନ୍ ଗଣ୍ଠିଗାଡ଼ିଆ ବିଟ୍ ଅଞ୍ଚଳରେ | ୨ ଦିନ ହେବ ୯୦ ଟିକିଆ ହାତୀପଲଙ୍କ ଉତ୍ପାତ ଦେଖିବାକୁ ମିଳିଛି। ଚାଷ ଅମଳ ସମୟରେ ହାତୀପଲ ଚାଷୀଙ୍କ ଚିନ୍ତା ବଢ଼ାଇଛନ୍ତି। ଉକ୍ତ ଅଞ୍ଚଳରେ ଧାନ ଖାଇବା ସହ ପାଦରେ ଦଳି ବ୍ୟାପକ ନଷ୍ଟ କରୁଛନ୍ତି । ସନ୍ଧ୍ୟା ହେଲେ ପାଖ ଜଙ୍ଗଲରୁ ଗାଁକୁ ଆସି ରାତିସାରା ଉପଦ୍ରବ କରୁଛନ୍ତିହାତୀ ପଲ । ବନ ବିଭାଗ ଡ୍ରୋନ୍ ମାଧ୍ୟମରେ ହାତୀପଲଙ୍କ ଗତିବିଧି ଉପରେ ନଜର ରଖି ପଦକ୍ଷେପ ନେଉଥିଲେ ମଧ୍ୟ ଉକ୍ତ ବନଖଣ୍ଡର ପରିସର ବିସ୍ତୃତ ହୋଇଥିବା ଯୋଗୁଁ ହାତୀଙ୍କୁ ଟ୍ରାକ୍ କରିବା ସମ୍ଭବ ହେଉନାହିଁ। ତେବେ ଏହି ୯୦ ଟିକିଆ ହାତୀପଲ ଗତ ଦୁଇଦିନ ମଧ୍ୟରେ ସ୍ଥାନୀୟ ଭାଗବତପୁର, ନଳଟାଙ୍ଗରା, ବାଇଝାଲିଆ ସାହି, ଗଡ଼ସନ୍ତ୍ରୀ, ନରେନ୍ଦ୍ରପୁର, ତୁଳସୀପାଳ, ବନ୍ଦା, ଝଜିରବାହାଳ ଅଞ୍ଚଳରେ ଚାଷଜମି ନଷ୍ଟ କରିବା ସହ ଗଡ଼ସନ୍ତ୍ରୀ କାଳୀ ମନ୍ଦିରରେ କଦଳୀ ଗଛ ଭାଙ୍ଗି ନଷ୍ଟ କରିଛନ୍ତି। ତୁଳସୀପାଳ ଲଙ୍ଗୁଳିଆବେଡ଼ାରେ ଥିବା ଏକ ଗ୍ରୋସରୀ ଦୋକାନକୁ ଭାଙ୍ଗି ବିସ୍କୁଟ୍ କେକ୍ ଖାଇଥିବା ଦୋକାନୀ ଅଖିଳ ପରିଡ଼ା ଅଭିଯୋଗ କରିଛନ୍ତି।ନଳଟାଙ୍ଗରା ଶିବ ମନ୍ଦିର ପରିସର, ଗଡ ଠାକୁରାଣୀ ନିକଟରେ ଥିବା ପାର୍କ, ବିଜୟନଗରରେ ବିମଳ ସାହୁଙ୍କ ଚୁଡ଼ାକଳ ପରିସରରେ ଉତ୍ପାତ କରି ଭଙ୍ଗାରୁଜା କରିଥିବା ଜଣାପଡ଼ିଛି। ଏ ସମ୍ପର୍କରେ ତାଳଚେର ରେଞ୍ଜ ସେକ୍ସନ୍ ବନପାଳ କୁଶଧ୍ବଜ ନାୟକ କହିଛନ୍ତି, ବନ ବିଭାଗ ପକ୍ଷରୁ ପ୍ରତି ପଞ୍ଚାୟତରେ ଡାକବାଜି ଯନ୍ତ୍ର ଦ୍ବାରା ସଚେତନତା କରାଯାଉଛି। ଯେଉଁ ଚାଷୀଙ୍କର କ୍ଷୟକ୍ଷତି ହେଉଛି ସେମାନେ ଅନଲାଇନ୍‌ରେ ଆବେଦନ କଲେ ବନ ବିଭାଗ କ୍ଷୟକ୍ଷତି ଆକଳନ କରି ସହାୟତା ଯୋଗାଇବ ବୋଲି କହିଥିଲେ। ବିଭାଗ ପକ୍ଷରୁ ସମ୍ପୂର୍ଣ୍ଣଭାବେ ହାତୀପଲଙ୍କ ଉପରେ ନଜର ରହିଥିବା କୁହାଯାଇଛି। ତେବେ ଚାଷୀଙ୍କ ମନରୁ କେବେ ଏହି ହାତୀଭୟ ଦୁରହେବ ତାକୁ ଦେଖିବା କଥା |