Odisha Janamata : ଲଗାଣ ବର୍ଷା ରେ ଚାଷୀ ବେହାଲ |

ଲଗାଣ ବର୍ଷା ରେ ଚାଷୀ ବେହାଲ |

21-Dec-2024

ଲଗାଣ ବର୍ଷା ସାଜିଲା ଚାଷୀଙ୍କୁ କାଳ,

ଓଡିଶା ଜନମତ ବ୍ୟୁରୋ,

କୁକୁଡାଖଣ୍ଡି: କୁକୁଡାଖଣ୍ଡି ଶୁକ୍ରବାର ଦିନ ଠାରୁ ତୁହାକୁ ତୁହା ବର୍ଷା ଲାଗି ରହିଛି। ଲଗାଣ ବର୍ଷାରେ ବେହାଲ ହୋଇପଡ଼ିଛି ଜନଜୀବନ ଗତରାତିରୁ ବର୍ଷାର ମାତ୍ରା ବଢ଼ିଚାଲିଛି। ଫଳରେ ଧାନ ଓ ପନିପରିବା ଚାଷ କ୍ଷତିଗ୍ରସ୍ତ ହେବା ନେଇ ଆଶଙ୍କା ଦେଖା ଦେଇଛି। ଅମଳ ଧାନକୁ ଚାଷୀ ସୁରକ୍ଷିତ ଭାବେ ରଖିବା ପାଇଁ ବହୁ ଚେଷ୍ଟା କଲେ ମଧ୍ୟ ଜମିରେ ରହିଥିବା ପାଚିଲା ଅମଳ ଧାନ ନଷ୍ଟ ହୋଇଛି | ବର୍ଷା ଯୋଗୁଁ କିଛି ବିଲରେ ପାଣି ଜମି ଧାନ ସବୁ ଭିଜି ଯାଇଛି।ଶୁକ୍ରବାର ଓ ଶନିବାର ଦିନତମାମ ଲଗାଣ ବର୍ଷା ଫଳରେ କୁକୁଡାଖଣ୍ଡି ବ୍ଲକ ଅଧିନସ୍ଥ ବିଭିନ୍ନ ଗ୍ରାମ ର ଚାଷ ଜମି ରେ ଥିବା ପାଚିଲା ଧାନ କିଆରିରେ ବର୍ଷା ବିପଦ ସାଜିଛି। ଯାହା ଫଳରେ କଟା ଯାଇଥିବା ଧାନ ଗଛ ସବୁ ପାଣିରେ ବୁଡ଼ି ରହିଥିବା ଦେଖିବାକୁ ମିଳିଛି।ଠିକ୍ ଅମଳ ବେଳକୁ ଅଦିନିଆ ବର୍ଷା ଯୋଗୁଁ ଧାନଫସଲ ସମ୍ପୂର୍ଣ୍ଣ ଉଜୁଡ଼ିବାକୁ ବସିଛି | ବିଲରେ ପାଚିଲା ଧାନ ଆଗକୁ ଗଜା ହେବ ବୋଲି ଅନୁମାନ କରିଛନ୍ତି ଚାଷୀ | ମାସକ ଭିତରେ ଦୁଇ ଦୁଇ ଥର ଲଗାଣ ବର୍ଷା କୁକୁଡାଖଣ୍ଡି ଚାଷୀଙ୍କ ଅଣ୍ଟାଭାଙ୍ଗି ଦେଇଛି। କୁକୁଡାଖଣ୍ଡି ବ୍ଲକ ଅଧିନସ୍ଥ ବିଭିନ୍ନ ଗ୍ରାମ ରେ ଚଳିତବର୍ଷ ୯୨୨୪ ହେକ୍ଟର ଜମିରେ ଧାନଚାଷ ହୋଇଥିବା ବେଳେ ବର୍ତ୍ତମାନ ସୁଦ୍ଧା୬୦/ ୭୦ ପ୍ରତିଶତ ଧାନକଟା ସରିଛି| ଆହୁରି ଅନେକ ଧାନ ବିଲରେ ପଡ଼ି ରହିଛି। ବ୍ଲକ ର ବିଭିନ୍ନ ସ୍ଥାନରେ କଟା ଯାଇଥିବା ଧାନ ବିଲରେ ରହିଛି। ବର୍ତମାନ କିଛି ପଂଚାୟତ ବୁଲି ଚାଷୀ ଙ୍କ କ୍ଷୟକ୍ଷତି ଅନୁଧ୍ୟାନ କରା ଯାଇଛି ଏବଂ ସରକାର ଙ୍କ ପଦକ୍ଷେପ ଅନୁଯାୟୀ କାର୍ଯ୍ୟ କରାଯିବ ନେଇ ସୂଚନା ଦେଇଛନ୍ତି ବ୍ଲକ କୃଷି ଅଧିକାରୀ ସୁବ୍ରତ କୁମାର ବାରିକ। କୁକୁଡାଖଣ୍ଡି , ରାମଚନ୍ଦ୍ରପୁର, ବଉଳଝୋଳି, ଜଗଦଲପୁର,ସିହଳା,ବାଘ ଲଟି,ଡେଙ୍ଗାପଦର,ବାଲିପଡା, ଅନନ୍ତେଇ , ଇତ୍ୟାଦି ବିଭିନ୍ନ ଗ୍ରାମ ର ଚାଷ ଜମି ରେ ଫସଲ ବର୍ଷା ପାଣିରେ ପଚି ନଷ୍ଟ ହେବା ସହ ରବି ଚାଷ ପ୍ରଭାବିତ ହେବା ଆଶଙ୍କା ମଧ୍ୟ ବଢ଼ିଛି। ସ୍ଥାନୀୟ ବିଧାୟକ ଚାଷୀ ଙ୍କ କ୍ଷୟକ୍ଷତି ଉପରେ ଦୃଷ୍ଟି ଦେବାକୁ ଚାଷୀମାନେ ଦାବି କରିଛନ୍ତି।