Breaking
News
Breaking
News
Breaking
News
13-Jun-2026
ଥାନା ଅଧିକାରିଣୀଙ୍କ ଦୁର୍ବ୍ୟବହାର ଅଭିଯୋଗରେ ଥାନା ସମ୍ମୁଖରେ ଉତ୍ତେଜନା, ଶେଷରେ କ୍ଷମା ମାଗିଲେ ଆଇଆଇସି,
ଓଡିଶା ଜନମତ, ରାୟଗଡା,୧୩/୬,
କାମେଶ୍ୱର କରକରିଆ:---
ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଶିକରପାଇ ଅଞ୍ଚଳରେ କଲ୍ୟାଣସିଂହପୁର ଥାନା ଆଇଆଇସି କଳ୍ପନା ବେହେରାଙ୍କ ବିରୋଧରେ ଦୁର୍ବ୍ୟବହାର ଅଭିଯୋଗକୁ କେନ୍ଦ୍ର କରି ଗୁରୁବାର ରାତିରେ ଥାନା ସମ୍ମୁଖରେ ଉତ୍ତେଜନା ପ୍ରକାଶ ପାଇଥିଲା। ଗ୍ରାମବାସୀମାନେ ଥାନା ଘେରାଉ କରି ପୋଲିସର ଆଚରଣ ପ୍ରତି ତୀବ୍ର ଅସନ୍ତୋଷ ବ୍ୟକ୍ତ କରିଥିଲେ।ସୂଚନା ଅନୁଯାୟୀ, ଶିକରପାଇ ଅଞ୍ଚଳରେ ରେଳ ବିଭାଗ ପକ୍ଷରୁ ଚାଲିଥିବା କାର୍ଯ୍ୟ ପାଇଁ ଭାରୀ ଯାନବାହନ ଗ୍ରାମ ମଧ୍ୟ ଦେଇ ଚଳାଚଳ କରୁଛି। ଫଳରେ ରାସ୍ତାରେ ଅତ୍ୟଧିକ ଧୂଳି ଉଡ଼ିବା, ଯାତାୟାତ ବାଧାପ୍ରାପ୍ତ ହେବା ଏବଂ ଲୋକଙ୍କ ଦୈନନ୍ଦିନ ଜୀବନ ଅସୁବିଧାରେ ପଡ଼ୁଥିବା ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରିଥିଲେ। ରାସ୍ତା ଉପରେ ପାଣି ଛିଞ୍ଚିବା ଦାବିରେ କିଛି ଗାଡ଼ିକୁ ଅଟକାଇ ରଖାଯାଇଥିଲା।ଏହି ସମୟରେ କଲ୍ୟାଣସିଂହପୁର ଥାନା ଆଇଆଇସି କଳ୍ପନା ବେହେରା ଘଟଣାସ୍ଥଳରେ ପହଞ୍ଚିଥିଲେ। ତେବେ ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ସେ ସମସ୍ୟାର ସମାଧାନ କରିବା ପରିବର୍ତ୍ତେ ଅଶୋଭନୀୟ ଓ ଅପମାନଜନକ ଭାଷାରେ କଥାବାର୍ତ୍ତା କରିଥିଲେ। ଏହାକୁ ନେଇ ଲୋକଙ୍କ ମଧ୍ୟରେ କ୍ଷୋଭ ପ୍ରକାଶ ପାଇଥିଲା ଏବଂ ପରେ ଥାନା ସମ୍ମୁଖରେ ଉତ୍ତେଜନା ଦେଖାଦେଇଥିଲା।ଗ୍ରାମବାସୀଙ୍କ କହିବା ଅନୁଯାୟୀ, ଏହା ପ୍ରଥମ ଘଟଣା ନୁହେଁ। ପୂର୍ବରୁ ମଧ୍ୟ ବିଭିନ୍ନ ଅଭିଯୋଗ ନେଇ ଥାନାକୁ ଯିବା ସମୟରେ ସାଧାରଣ ଲୋକଙ୍କ ସହ ଦୁର୍ବ୍ୟବହାର ହୋଇଥିବା ଅଭିଯୋଗ ରହିଛି। ଲୋକମାନଙ୍କ ଅଭିଯୋଗ ଯେ, ଜଣେ ପୋଲିସ ଅଧିକାରୀ ଭାବେ ଶୃଙ୍ଖଳା, ସଂଯମ ଓ ଜନସେବାର ମନୋଭାବ ରଖିବା ଉଚିତ, କିନ୍ତୁ ବାରମ୍ବାର ଅଶ୍ଳୀଳ ଓ କଠୋର ଭାଷା ବ୍ୟବହାର କରାଯିବା ସାଧାରଣ ଲୋକଙ୍କୁ ଆଘାତ ପହଞ୍ଚାଉଛି। ଲୋକଙ୍କ ମତରେ, ଆଇନର ରକ୍ଷକ ହିସାବରେ ପୋଲିସ ଉପରେ ଲୋକଙ୍କ ବିଶ୍ୱାସ ରହିବା ଦରକାର, ଭୟ ନୁହେଁ।ପରିସ୍ଥିତି ଉତ୍ତେଜନାପୂର୍ଣ୍ଣ ହେବା ପରେ ରାୟଗଡ଼ା ଏସଡିପିଓ ଗୌରହରି ସାହୁ ଓ ଚାନ୍ଦିଲି ଥାନା ଅଧିକାରୀ ଉତ୍ତମ କୁମାର ସାହୁ ଘଟଣାସ୍ଥଳରେ ପହଞ୍ଚି ଲୋକଙ୍କ ସହ ଆଲୋଚନା କରିଥିଲେ। ପରେ ବୁଝାସୁଝା ମାଧ୍ୟମରେ ପରିସ୍ଥିତିକୁ ଶାନ୍ତ କରାଯାଇଥିଲା। ଗ୍ରାମବାସୀଙ୍କ କହିବା ଅନୁଯାୟୀ, ଶେଷରେ ଆଇଆଇସି କଳ୍ପନା ବେହେରା ନିଜ ବ୍ୟବହାର ପାଇଁ କ୍ଷମା ପ୍ରାର୍ଥନା କରିବା ପରେ ଆନ୍ଦୋଳନ ଶାନ୍ତ ପଡ଼ିଥିଲା।ତେବେ ଘଟଣାକୁ ନେଇ ଏସଡିପିଓଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ମିଳିପାରିନାହିଁ। ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିବା ବେଳେ ପୋଲିସ-ଜନତା ସମ୍ପର୍କକୁ ନେଇ ମଧ୍ୟ ପ୍ରଶ୍ନ ଉଠିଛି।
Copyright @ 2024 All rights reserved. ଓଡିଶା ଜନମତ
BACK TO TOP