Odisha Janamata : ବ୍ୟାସ ନଗର ଅତିରିକ୍ତ କମିଶନର ବିଦାୟ ସମ୍ବର୍ଦ୍ଧନା ଅନୁଷ୍ଠିତ ||

ବ୍ୟାସ ନଗର ଅତିରିକ୍ତ କମିଶନର ବିଦାୟ ସମ୍ବର୍ଦ୍ଧନା ଅନୁଷ୍ଠିତ ||

01-Jun-2026

ଲୋକଙ୍କ ବିଶ୍ୱାସ ଜିତିଥିବା ଅତିରିକ୍ତ କମିଶନରଙ୍କୁ ଭାବବିହ୍ୱଳ ବିଦାୟୀ ସମ୍ବର୍ଦ୍ଧନା
ଓଡ଼ିଶା ଜନମତ, ଯାଜପୁର ,

ପ୍ରଦୀପ କୁମାର ମଲ୍ଲିକ , ୧/୬/୨୦୨୬ : ----

ଯାଜପୁର ଜିଲ୍ଲା ବ୍ୟାସନଗରସ୍ଥିତ ଅତିରିକ୍ତ କମିଶନର କାର୍ଯ୍ୟାଳୟରେ ଅତିରିକ୍ତ କମିଶନର ଅକ୍ଷୟ କୁମାର ମଲ୍ଲିକଙ୍କୁ ଶନିବାର ଭାବବିହ୍ୱଳ ପରିବେଶ ମଧ୍ୟରେ ବିଦାୟୀ ସମ୍ବର୍ଦ୍ଧନା ପ୍ରଦାନ କରାଯାଇଛି। ଦୀର୍ଘ ଦୁଇ ବର୍ଷର କାର୍ଯ୍ୟକାଳ ମଧ୍ୟରେ ସେ ନିଜର ଦକ୍ଷ ପ୍ରଶାସନିକ କାର୍ଯ୍ୟଦକ୍ଷତା, ମାନବିକ ଦୃଷ୍ଟିଭଙ୍ଗୀ ଓ ସାଧାରଣ ଲୋକଙ୍କ ପ୍ରତି ସମର୍ପିତ ଭାବନା ଯୋଗୁଁ ଲୋକମାନଙ୍କ ବିଶ୍ୱାସ ଭାଜନ ହୋଇପାରିଥିବା ଆଲୋଚନା କରାଯାଇଥିଲା। କମିଶନରଙ୍କ କାର୍ଯ୍ୟାଳୟରେ ଆୟୋଜିତ ଏହି ବିଦାୟୀ କାର୍ଯ୍ୟକ୍ରମରେ କର୍ମଚାରୀମାନଙ୍କ ପକ୍ଷରୁ ପୁଷ୍ପଗୁଚ୍ଛ, ଫୁଲମାଳା ପ୍ରଦାନ ସହ କେକ୍ କାଟି ସମ୍ମାନଜନକ ଭାବେ ସମ୍ବର୍ଦ୍ଧନା ଜଣାଯାଇଥିଲା। ଏହା ସହିତ ଯାଜପୁରରୋଡ଼ ଓକିଲ ସଂଘ ଓ ଆଇନଜୀବୀମାନଙ୍କ ପକ୍ଷରୁ ମଧ୍ୟ ଅକ୍ଷୟ କୁମାର ମଲ୍ଲିକଙ୍କୁ ଭବ୍ୟ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଏହି ଅବସରରେ ତାଙ୍କ ଚାକିରି ଜୀବନ ଉପରେ ଆଲୋକପାତ କରାଯାଇଥିଲା। ସେ ଜୀବନର ପ୍ରଥମ ପୋଷ୍ଟିଂ ଭଦ୍ରକରୁ ବଣାଇରେ ଯୋଗଦେଇଥିବା ବେଳେ ପରବର୍ତ୍ତୀ ସମୟରେ ବିଂଝାରପୁର, ଯାଜପୁର ସମେତ ବିଭିନ୍ନ ସ୍ଥାନରେ କାର୍ଯ୍ୟ କରିବାର ସୁଯୋଗ ପାଇଥିଲେ। କଳିଙ୍ଗନଗର କମିଶନର କାର୍ଯ୍ୟାଳୟରେ ଦୁଇ ବର୍ଷର କାର୍ଯ୍ୟକାଳ ମଧ୍ୟରେ ସେ ଅନେକ ଲୋକମୁଖୀ ଓ ପ୍ରଶାସନିକ କାର୍ଯ୍ୟ ସଫଳତାର ସହ ସମ୍ପାଦନ କରିଥିବା କୁହାଯାଇଥିଲା। ନିଜ ଅଭିଭାଷଣରେ ଅକ୍ଷୟ କୁମାର ମଲ୍ଲିକ ମାଟି ସହ ମଣିଷର ସମ୍ପର୍କକୁ ସବୁବେଳେ ଅତୁଟ ରଖିବା ଉପରେ ଗୁରୁତ୍ୱ ଆରୋପ କରିଥିଲେ। ସେ କହିଥିଲେ ଯେ, ୧୯୨୮ ମସିହାରୁ ରହିଆସୁଥିବା କୌଣସି ପରିବାରକୁ ଯଦି ସେଟେଲମେଣ୍ଟ ପ୍ରକ୍ରିୟାରେ ବଞ୍ଚିତ କରାଯିବ କିମ୍ବା ଲୋକଙ୍କୁ ତାଙ୍କର ଭିଟାମାଟିରୁ ଅଲଗା କରାଯିବ, ତାହା କେବେବି ଉଚିତ ନୁହେଁ। ସାଧାରଣ ଲୋକଙ୍କ ସ୍ୱର ଭାବେ ଆଇନଜୀବୀମାନେ ଆଗକୁ ଆସିବା ଆବଶ୍ୟକ ବୋଲି ସେ ମତପ୍ରକାଶ କରିଥିଲେ। ଲୋକଙ୍କ ସମସ୍ୟାର ସମାଧାନ ପାଇଁ ଆଇନଗତ ପଦକ୍ଷେପ, କାଗଜପତ୍ର ଓ କଲମର ସଠିକ୍ ବ୍ୟବହାରକୁ ପ୍ରାଧାନ୍ୟ ଦେବା ଉପରେ ସେ ଜୋର ଦେଇଥିଲେ। ଏହି ବିଦାୟୀ ସମାରୋହରେ ଅତିରିକ୍ତ କମିଶନର କାର୍ଯ୍ୟାଳୟର କର୍ମଚାରୀ, ଆଇନଜୀବୀ ଏବଂ ବହୁ ଶୁଭେଚ୍ଛୁ ଉପସ୍ଥିତ ରହି ତାଙ୍କ ଉଜ୍ଜ୍ୱଳ ଭବିଷ୍ୟତ ଓ ସୁସ୍ଥ ସୁଖମୟ ଜୀବନ କାମନା କରିଥିଲେ |